Ezai 14 - Bibeli do fee

Kubaai inɛi Izirɛli ŋa iyi à mu aru ŋau

¹ Ntɔ ntɔ Aɔ̃ Lafɛ̃ɛ á ce araarei tɔkui Zakɔbu ŋau. Á nyisi má iyi nŋu í cica inɛi Izirɛli ŋau, nɔ ku teese ku jilɛ ŋa si ilɛ nŋa má. Inɛ njoo ŋa aa dede a koo a ba ŋa, nɔ aŋaò ŋa a tɔtɔɔ a jɛ zamaai Zakɔbu.

² Inɛi ilɛ mmu ŋai aa gbã inɛi Izirɛli ŋa a baaò ŋa wa si ilɛ nŋa, nɔ inɛi Izirɛli ŋa aa gba ŋai a jɛ tubu nŋa. Nɔ tengi bɛ, si ilɛ iyi í jɛ ti Aɔ̃ Lafɛ̃ɛu, inɛi Izirɛli ŋau aa mu inɛmɔkɔ do inaabo ŋa arui. Inɛ ŋa iyi à tako à mu ŋa aru wo, aŋa mɔ aa mu lafɛ̃ɛ ŋa arui. Izirɛlii á baa ku jɛ lafɛ̃ɛi inɛ ŋa iyi à tako à kãmiaɛ ŋau wo.

Kɔɔi kuwɛɛi ilaalui Babilɔni

³ Iŋɛ inɛi Izirɛli ŋa, waati iyi Aɔ̃ Lafɛ̃ɛ á na ku mu nŋɛ kusĩmi si anyii wahala nkpɔ nkpɔ nŋɛ ŋa do si anyii icɛi aru kugaabu iyi à dasi ŋɛu,

⁴ aa maa kɔ̃ iri ŋai si gãmɛi ilaalui Babilɔniu i maa ni, woo taa inɛ gbugbãu kù wɛɛ má. Gbugbã ku taa inɛ ŋau í leekĩ.

⁵ Aɔ̃ Lafɛ̃ɛ í cɛ goloi ilu inɔ kukãu. Í cɛ goloi inɛ iyi wa taa inɛ ŋa gbugbãu,

⁶ nŋu iyi si idɔɔkɔ̃ɛ í ya maa cã inɛ ŋa hai nɛ kɔɔ, nɔ si idɔɔkɔ̃ɛ í kãmia inɛi ilɛ ŋa, nsɛi, nŋu mɔ á ba ijuukpã ntɔ ntɔ.

⁷ Ilɛu fei wa sĩmii bɛbɛi nɔ í wɛɛò laakai ku sũ. Inɛ fei wa kɔ̃ irii do inɔ didɔ̃.

⁸ Jĩi ndii sipɛrɛɛsi ŋa do jĩi ndii sɛɛdii Libãa ŋau mɔ à wɛɛò inɔ didɔ̃, à waa ni, hai waati iyi ilu inɔ kukãu í cuku, inɛ kãma ci ya naa ku da wa má.

⁹ Bi kuwai iku ŋau à waa yaga na kutoi awɔ ilu inɔ kukã iyi à waa ce cenkã wau. Na iriɛi à jɔ̀ iku ŋa à jĩ, aŋa iyi à tako à jɛ ilaalu nlai ilɛ ŋau. À jɔ̀ ilaalui andunya ŋa iyi à wa si kitãi bomma nŋa ŋau fei, à dede.

¹⁰ Ŋɔi aŋa fei à so ide à ni, awɔ mɔ i kù nɛ gbugbã má bɛi awa mɔ. Awɔ mɔ ì baa ì yɛ mbɛ bɛi awa mɔ.

¹¹ Faauɛ fei í baa í nyi wa si bi kuwai iku ŋa ihɛ̃ do imui mɔɔlɔɛ ŋau fei. Bɛbɛi, konkombii á jɛ daayiɛ, nɔ kokoo ŋai aa jɛ acɔ ku biiɛ.

¹² Awɔ iyi ì yɛ bɛi angua iyi wa daana amɛɛjuumá, wee ì cuku wa nsɛi hai lelei Aɔ̃. À kɛkɛɛ wa hee ilɛ, awɔ iyi ì kãmia inɛi ilɛ ŋa wo.

¹³ Awɔ iyi ì waa fɔ si idɔɛ ì waa ni aa gũ hee lelei Aɔ̃ i koo i jilɛ kitãi bommaɛ do lelei leleaɔ̃ ŋau. Ì waa ni aa koo i maa bubai si iri kuta tengi bii [iwɛ̃ ŋa] à ya ce kutɔtɔɔ nŋa hee do ikpa kɔɔi awɔ njɛi kpãai inunu.

¹⁴ Ì waa ni aa gũi hee si antaii kudũi ijĩ ŋau, nɔ awɔ do Ilaaɔ̃ iyi í wa leleu aa jɛ saa ŋai.

¹⁵ Amma wee nsɛi, à kitaɛ wa si bi kuwai iku ŋa ihɛ̃, nɔ ì bɔi hee lɛlɛi ilɛ.

¹⁶ Inɛ ŋa iyi à hɔ̃nnɛɛ ì waa naa, à kãsiɛ ijui à waa cɔɛ kɔnkɔn, nɔ à bee ara nŋa ide à waa ni, kú jɛ inɛ iyi í ya jɔ̀ andunyau ku maa yagau mbɛ de. Inɛ iyi í ya maa fɔtɔtɔi bomma ŋau.

¹⁷ Inɛ iyi í ya jɔ̀ andunya ku baa ku jɛ gbaau. Nŋu iyi í ya ce asɔɔi ilu nla ŋa, nɔ ci ya jɔ̀ inɛ ŋa iyi í mu ŋau.

¹⁸ Ilaalui ilɛ ŋau fei à sũi à waa sĩmi do bɛɛrɛ, inɛ fei si inɔ balɛɛ.

¹⁹ Amma awɔ, à nyɔɛi waduude i kù ba baa balɛ. Ì yɛi bɛi amaawɔi jĩi iyi inɛ ŋa a kù bi. Ì yɛi bɛi ikui inɛ iyi à kpa do taakuba, nɔ à soo à nyɔɔ si kuta ŋa í koo í dasi isa. Ì yɛi bɛi iku iyi inɛ ŋa à waa tɛɛsɛ.

²⁰ A kaa tɔtɔɔ iŋɛò ŋa si inɔ balɛ akã, domi ì ce nfei ilɛɛ, nɔ ì kpa zamaaɛ. Nɔ aa gbɛjɛ irii dimii awɔ inɛ laalɔui hee do ajɔ fei.

²¹ I ce sɔɔlui amu ŋa ku kpa na laalɔ ku cei baa nŋa ŋau ku ba a maa na a dede a nyi a gba ilɛu má, nɔ a biiɛ do laalɔ ŋa má.

²² Ŋɔi Aɔ̃ Lafɛ̃ɛi lele do ilɛ í nyi í fɔ má í ni, an kpa irii Babilɔnii hee do mii iyi í gbe iyi í jɛ titɛɛ fei, do tɔkuɛ ŋa, do dimiɛ fei.

²³ Nɔ Aɔ̃ Lafɛ̃ɛi lele do ilɛ í nyi í ni má, an jɔ̀ bi kuwaɛu ku baa ku jɛ bi kuwai luulugu ŋai, nɔ ku baa ku jɛ cɔɔ. Nɔ an kpãai do angɔ ku ce nfei amanɛ.

Iri kukpai gbugbã ku taa inɛ ŋa

²⁴ Aɔ̃ Lafɛ̃ɛi lele do ilɛ í ce kuwã do kugbasi í ni, iyi ǹ dasi idɔu, á cei nɔ iyi ǹ jilɛu, á na ku cei.

²⁵ An lɛgɛ gbugbãi inɛi Asiri ŋai si ilɛm. An tɛɛsɛɛi si iri kutam ŋau. An nya zuuguɛ iyi í dĩa inɛm ŋaui. Nɔ asoɛ iyi í le nŋa si kɔngɔ nŋa ŋau, an nyaai.

²⁶ Ide iyi Aɔ̃ Lafɛ̃ɛ í jilɛ mbɛ na irii andunyau fei. Idei ijuukpã iyi í fɔ mbɛ si gãmɛi inɛi ilɛ mmu ŋau fei.

²⁷ Aɔ̃ Lafɛ̃ɛi lele do ilɛi í ce lasabuu bɛ í jilɔɔ. To, yooi á yɔkɔ ku ganjiɛ. Í to awɔɛ wa, yooi á yɔkɔ ku sindaɛ.

Ide iyi à sɔ̃ inɛi Filisi ŋa

²⁸ Si adɔ̃ iyi ilaalu Ahazi í ku, idei ijuukpã gɔ iyi à ni á na ku naa wee.

²⁹ Iŋɛ inɛi Filisi ŋa, i maà jɔ̀ i wɛɛò inɔ didɔ̃ ŋa si na iyi í jɔ̀ golo iyi wa cã ŋɛu í cɛ, domi hai si njo iyi í ku, hai bɛi njo kugaabu mmuɛ iyi á re baa ti sinteu á fita wa má, nɔ hai si njɛɛ bɛi akandama iyi á ya maa fo á fita wa.

³⁰ Waati bɛɛbɛ, ama yemmai ilu are ŋau aa yɛi bɛi mɛɛmu gaa ŋa iyi à waa jɛ. Ilu are ŋau aa ba kusĩmi nɔ a nɛ laakai ku sũ. Amma iŋɛ inɛi Filisi ŋa, an jɔ̀ ari ku naa si ŋɛ nɔ ku ce nfe nŋɛ hee do icã nŋɛ fei, nɔ iyi í gbe nŋɛ fei, an kpaai.

³¹ Iŋɛ ilu ku nɛ gbugbã ŋau, i kɔ̃ irii akũ i maa kpataò nɔ i dɔ̃ anu ŋa. Wɔɔkɔi inɛi Filisi ŋau fei í tã mbɛ, domi cua wa naa hai do ikpa awɔ njɛi kpãai inunu wa. Nɔ bi mbɛɛ ŋa, inɛ kãma kaa gbe iyi kù tɔtɔɔ wa bɛ.

³² Bɛirei aa jɛa woo bɛi inɛi Filisi ŋau ihɛ̃. Aa jɛ nŋai a ni, Aɔ̃ Lafɛ̃ɛi í jilɛ icui Siɔ̃ɔ, nɔ inɛ ŋa iyi à jɛ ilu are si zamaaɛ ŋau aa ba bi ku manji.