Ezai 13 - Bibeli do fee

Iri kukpai Babilɔni

¹ Ezai amai Amɔɔsu í ce kuyɛi ijuukpã iyi á na ku naa si Babilɔni.

² Aɔ̃ Lafɛ̃ɛ í ni, i gũ nyinda gɔ si iri kuta iyi kù nɛ nkãmau ŋa. Nɔ i dɔ̃ si woo ja igũ ŋa anu hee lele, i wu awɔ i ce nŋaò nyinda i sɔ̃ ŋa i ni a naa a lɔ hai do andɛ bii ilu bɛɛrɛ ŋa à ya lɔòu.

³ Inɛ ŋa iyi ǹ nya ikã ŋau, ǹ na ŋa wooda. Ǹ kpe woo ja igũm ŋau, aŋa iyi à ya wɛɛò inɔ didɔ̃ si igũ ku jɛm nɔu ku ba n nyisi idɔɔkɔ̃m.

⁴ I de itĩ i gbɔ iba gɔ si iri kuta ŋau ŋa. Aa ni ibai zamaa nla nlai. I de itĩ i gbɔ anu ku dɔ̃i ilaalui ilɛ ŋa iyi à tɔtɔɔ. Aɔ̃ Lafɛ̃ɛi lele do ilɛi í teese wa cɔ sooge ku ce igũɛ ŋa.

⁵ À waa naai hai ilɛ jĩijĩ, hai si kɔɔi lelei Aɔ̃ ŋa. Aɔ̃ Lafɛ̃ɛ do inɛ ŋa iyi í sou, aŋai aa ce nfei ilɛu fei ku nyisiò idɔɔkɔ̃ɛ.

⁶ Na nŋu, i kpata i maa weeweaò ŋa, domi ajɔi Aɔ̃ Lafɛ̃ɛ í maai wa. Wa naai bɛi laalɔ iyi á ce nfei mii fei. Wa naai hai bi Aɔ̃ Lafɛ̃ɛ ilu gbugbã.

⁷ Na ŋɔi í jɔ̀ inɛi ilɛ ŋau fei à kua gbugbã, nɔ inɛ kãma kù nɛ wɔɔkɔ má.

⁸ Ŋɔi zigii aŋa fei í da, nɔ à waa kakaa do ara kuro iyi í naa si ŋa. À waa gbɔ ara kuroi bɛi inaabo iyi wa bi ku bí. Aŋa fei à waa cɔ njɛi akã akã do biti, nɔ waju nŋa fei í kpaasi.

⁹ Ajɔi Aɔ̃ Lafɛ̃ɛu wee wa maai wa. Ajɔu, ajɔ kugaabui, nɔ ajɔi idɔɔkɔ̃ nla nlai iyi á jɔ̀ ilɛu ku ce nfe, nɔ nŋui á ce nfei ilu dulum ŋa.

¹⁰ Waati bɛɛbɛ, leleaɔ̃ ŋa a kaa má inya má. Hai inunu wa la wa gbakã á ya dũi, nɔ cukpa mɔ kaa má inya má.

¹¹ Aɔ̃ Lafɛ̃ɛ í ni, an kpã inɛi andunya ŋa ijui na inɔ kukã nŋa, inɛ laalɔ ŋau mɔ, an kpã ŋa ijui na kurara nŋa ŋa. An leekĩ faaui inɛ ŋa iyi à waa so ara nŋa hee leleui, nɔ n kaye inɛ ŋa iyi faau nŋa í jɔ̀ à waa kpã kpaasi ŋa ijuu.

¹² An jɔ̀ a maa dɛdɛ amanɛ ŋai bɛi à ya dɛdɛ wura alala. An jɔ̀ a maa dɛdɛ amanɛ ŋai bɛi à ya dɛdɛ wura iyi wa naa hai ilɛi Ɔfii.

¹³ Na nŋu, lelei Aɔ̃ á yagai, nɔ ilɛ mɔ ku yaya hee si icuɛ na idɔɔkɔ̃i Aɔ̃ Lafɛ̃ɛi lele do ilɛu si ajɔi idɔɔkɔ̃ nlaɛu.

¹⁴ Waati bɛɛbɛ, inɛ ŋa aa yɛi bɛi angbãi ŋa iyi à da zigi nŋa, walakɔ bɛi angudã ŋa iyi a kù nɛ inɛ kãma iyi á tɔtɔɔ ŋa. Inɛ fei á sindai ku nyi bi inɛɛ ŋa, nɔ inɛ fei á sai ku nɛ ikpa ilɛɛ.

¹⁵ Inɛ ŋa iyi à ba fei, aa ta ŋa afai, nɔ inɛ ŋa iyi à ba à mu fei, aa kpa ŋai do taakuba.

¹⁶ Aa tɛɛsɛ ama nŋa ŋa ilɛi si waju nŋa. Aa ko mii ndii inɔ ile nŋa ŋai, nɔ a bata abo nŋa ŋa do gbugbã a sũò ŋa.

¹⁷ Aɔ̃ Lafɛ̃ɛ í ni, an jɔ̀ inɛi Mɛɛdi ŋa a naa si ŋa. Inɛ ŋau lasabu nŋa kù wa si isɔ fũfũ, nɔ a kù nɛ kɔdɛɛi wura.

¹⁸ Aa ta awaasũ ŋa afa a kpa ŋa, nɔ a kaa jɔ̀ baa ama kpɔtɔɔ ŋa. A kaa nɛ araarei amu ŋa.

¹⁹ Nɔ Babilɔni iyi wa jɛ bɛi boodai bomma ŋau, iyi í jɛ bɛi booda iyi inɛi Kaladee ŋa à waa tɔɔò fufuu, á na ku baa ku yɛ bɛi Sodomu do Gomɔɔ iyi Ilaaɔ̃ í ce nfe nŋau.

²⁰ Inɛ kãma kaa wa si iluu má. Á maa wɛɛ ngbɛi hee do ajɔ fei. Woo degbe kãma kaa gũ ilei acɔɛ bɛ, nɔ woo degbe ŋau a kaa ya leekĩ bɛ.

²¹ Inyau, bi kuwai muusui sako ŋai á jɛ. Gbĩgbĩ ŋai aa lɔ si ile nŋa ŋau a kɔ̃, nɔ bɛi á jɛ bi kuwai taataa ŋa, nɔ bɛi iwo kombo ŋa aa ya fo a maa dingaa.

²² Mbo ŋai aa ya maa dɔ̃ anu si ile ku nɛ gbugbã nŋa ŋau, nɔ ajaako ŋai aa ya wa si kabai bomma kusĩa ŋau. Waatii ijuukpãu í nɔ í ce amɛɛ wa mbɛ, nɔ a kaa kɔ̃ɔsi kukpɔi ajɔ ŋau má.