Ezai 12 - Bibeli do fee

Ka saabu Ilaaɔ̃ woo faaba

¹ Iŋɛ inɛi Izirɛli ŋa, iŋɛ iyi Aɔ̃ Lafɛ̃ɛ í faaba, ajɔ nŋu bɛi aa ni ŋa, à waa saabuɛ Aɔ̃ Lafɛ̃ɛ, domi baa do iyi idɔɛ í kɔ̃ si wa fei wo, idɔɔkɔ̃ɛu í sũ nɔ ì tũ idɔ nwa.

² Ntɔ ntɔ Ilaaɔ̃i í jɛ woo faaba nwa, siɛi naanɛ nwa í wa, a kù nɛ zigiida má. Aɔ̃ Lafɛ̃ɛi í jɛ gbugbã nwa, nŋui aa ka kɔ̃aa iri. Nŋui í jɛ woo faaba nwa.

³ Na ŋɔi í jɔ̀ aa ba i kpã inyi do inɔ didɔ̃ hai si isɔ̃i faabau ŋa.

⁴ Ajɔ nŋu bɛi aa ni ŋa, i saabu Aɔ̃ Lafɛ̃ɛ, nɔ i tɔɔɛ ŋa. I jɔ̀ inɛ ŋa a mà mii nla nla ŋa iyi í ce ŋa nɔ i ye inɛ fei gigi bɛi Aɔ̃ Lafɛ̃ɛ í nya iri ŋa.

⁵ I kɔ̃a Aɔ̃ Lafɛ̃ɛ iri ŋa, domi í ce mii nla nla ku sĩa ŋa i jɔ̀ inɛ ŋa a mà mii ŋa iyi í ce si andunya fei.

⁶ I dɔ̃ anu do inɔ didɔ̃ iŋɛ inɛi Siɔ̃ɔ ŋa, domi Aɔ̃ Lafɛ̃ɛ í wa anini nŋɛ nɔ í la ntɔ ntɔ. Nŋui í jɛ Inɛ Kumái Izirɛliu.