Ezai 11 - Bibeli do fee

Davidi titɔ̃

¹ Amaawɔ mmu gɔ á la wa hai si Izai icu nwou. Kuyɔ mmu gɔ á fita wa hai si icãɛ ŋau nɔ ku so.

² Hundei Aɔ̃ Lafɛ̃ɛ á wa siɛ, nɔ hundeui í ya jɔ̀ inɛ ku wũaa mii ŋa nɔ í ya jɔ̀ inɛ ku jɛ ilu laakai nɔ ku jɛ woo muaa inɛ ikɔ nɔ ku jɛ woo muaa inɛ gbugbã. Hundeui í ya jɔ̀ inɛ ku mà Aɔ̃ Lafɛ̃ɛ nɔ ku ya maa jirimaɛ.

³ Aɔ̃ Lafɛ̃ɛ ku jirimaui á ya jɛaa inɔ didɔ̃ ntɔ ntɔ. Kaa kiiti inɛ ŋa si bɛi à reò njɛ do bɛɛrɛ, nɔ kaa ceò ide ku sisii amanɛ ŋa icɛ si mii iyi á jilɛ.

⁴ Á cea ilu are ŋa kiiti dee dee. Á cea hai nɛ gbugbã ŋa iyi à wa si ilɛu kiiti si ntɔ. Ideɛ á ya yɛi bɛi golo iyi wa cãò inɛi ilɛ ŋau. Kiitiɛ á kpa inɛ laalɔ.

⁵ Kiitiɛ do dee dee ku jɛɛ á yɛi bɛi santiiki iyi á ya dĩ si gbankili waati kãma fei.

⁶ Waati bɛɛbɛi mbo do ama angudã ŋa aa tɔtɔɔ a wa inya akã, nɔ muãa do ama iwo ŋa aa ce kolo nŋa inya akã. Ama kɛtɛ do ama muusu nla ŋa aa ya tɔtɔɔ a jɛi inya akã, nɔ ama keeke gɔi á ya maa degbe ŋa.

⁷ Kɛtɛ iye do mɛɛmui sako kugaabu gɔ aa gbɔsi njɛ a maa jɛ inya akã, nɔ koloi ama nŋa ŋa kaa jĩò njɛ. Muusu nla do kɛtɛ ŋa, fɔfɔi aŋa fei aa ya ŋɔ.

⁸ Ama kpɔtɔɔ á maa cɛi tengi bii njo wukuku í wa. Nɔ ama kpoto á yɔkɔ ku dasi awɔɛ si inɔ isa bii njo wukuku í wa.

⁹ A kaa ya cea njɛ laalɔ hee má jɛ a ce asɔɔi ngɔgɔ má si iri kuta iyi à nya ikã í jɛ ti Aɔ̃ Lafɛ̃ɛu. Si ilɛu fei inɛ ŋa aa mà Aɔ̃ Lafɛ̃ɛi, nɔ kumàɛu á kɔ̃i si ilɛ fei bɛi inyi í ya kɔ̃ tenku.

¹⁰ Si waati nŋu bɛ tɔkui Izaii á jɛ nyinda bi zamaau nɔ inɛi ilɛ fei á maa dɛdɛɛi. Nɔ amboei Ilaaɔ̃ á wa tengi bii í wa.

Kubaai inɛ ŋa iyi à waa jɛ aru ilɛ mmu ŋau

¹¹ Si waati nŋu bɛi Aɔ̃ Lafɛ̃ɛ á dasi baa isɛ gbeejisia má ku ya zamaaɛ ŋa iyi à gbe si ilɛ mmu ŋau ku jɔ̀ a nɛ ara nŋa. Hai inɛ ŋa iyi à wa ilɛi Asiri do Ezibiti do Patɔɔsi do Etiopi do Elamu do ilɛi Babilɔni, do Amati do ilɛi itĩi inyi ŋau.

¹² Aɔ̃ Lafɛ̃ɛ á ce nyinda gɔ ku faò laakaii inɛi andunya ŋa si gãmɛi mii iyi wa bi ku ce. Á tɔtɔɔ inɛi Izirɛli ŋa iyi à mu aru ŋau wa nɔ ku tɔtɔɔ inɛi Zudaa ŋa iyi à fangaa si andunya gonta mɛɛu fei wa.

¹³ Waati bɛɛbɛ, njɛ ku wãi inɛi Efaraimu ŋa do inɛi Zudaa ŋau á kpa iri. Aa kpa mbɛɛi inɛi Zudaa ŋau. Inɛi Efaraimu ŋa a kaa maa wã inɛi Zudaa ŋa, nɔ inɛi Zudaa ŋa a kaa maa mu inɛi Efaraimu ŋa do mbɛɛtɛ má.

¹⁴ Aa ce anu akãi a koo si inɛi Filisi ŋa iyi à wa iri kuta ŋau do ikpa nunui alɛ, nɔ aa koo si zamaai inɛi nunui daakɔ ŋau mɔ a ko amani nŋa ŋa. Aa koo si inɛi Edɔmu do inɛi Moabu ŋau mɔi, nɔ a kãmia inɛi Amɔɔ ŋau.

¹⁵ Aɔ̃ Lafɛ̃ɛ á ceekpe tenkui Ezibitiui ku jɔ̀ inyiɛ ku gbɛ. Á wu awɔɛ lelei si inyii idoi Efaratau nɔ ku jɔ̀ fufu nla nla ku dede siɛ hee ku kpɛ̃ inyii idou ikɔ mɛɛje nɔ baa bii inɛ í na í lɔ inɔɛ wa kua, kaa nɛ bukaatai baataɛ ŋa ku bɔ, domi inyiu á gbɛi.

¹⁶ Kpãa á nyi ku wɛɛ má iyi á jɛ ti zamaaɛ ŋa iyi aa gbe si ilɛi Asiri bɛi inɛi Izirɛli ŋau à tako à ba wo waati iyi à fita wa hai ilɛi Ezibitiu.