Ezai 10 - Bibeli do fee

Inɛ ŋa iyi à waa dede idɔɔkɔ̃i Aɔ̃ Lafɛ̃ɛ

¹ Inɔ kufɔi í jɛ ti woo jilɛ wooda hai jɛ dee dee ŋa. Wooda ŋa iyi à kɔui í ya naa inɛ ŋa inɔ kufɔ wa.

² A ci ya na hai nɛ gbugbã ŋa ntɔ bi ku ce kiiti, nɔ ilu are ŋa mɔ a ci ya na ŋa iyi í nɛ ku jɛ tu ŋa. À ya maa takii jaaɔ̃ ŋai nɔ a gba mii ndii kɔyɔ ŋa.

³ Bɛirei aa ce ŋa waati iyi Aɔ̃ Lafɛ̃ɛ á naaò ijuukpã wa si ŋɛ hai jĩijĩ. Bi yooi aa sa i bɔ ŋa ku ba ku faaba ŋɛ. Nɔ bi yooi aa koo i singa amani nŋɛ ŋa.

⁴ Aa yɛ ijuukpã ŋai do inɛ ŋa iyi aa mu si igũ, walakɔ mɔ aa ku ŋai. Amma do nŋu fei idɔɔkɔ̃i Aɔ̃ Lafɛ̃ɛ kaa sũ. Awɔɛ á kɔ̀ ku maa wa lelei ku ba ku kpã ŋɛ iju.

Inɛi Asiri ŋa à ce à lɔ si

⁵ Inɔ kufɔ nla nlai í jɛ ti Asiri nŋu iyi í jɛ bɛi kpɔtɔɔ iyi an nyisiò idɔɔkɔ̃m. Golo iyi wa mu si awɔɛu bɛi í jɛ jĩnɛi idɔɔkɔ̃m.

⁶ Nŋui an bɛ ku koo si inɛi ilɛ ŋa iyi a kù waa jirimam. Bii í koo, an jɔ̀ ku ko mii ndu ŋa ŋa wai, aŋa iyi à dede idɔɔkɔ̃m, nɔ ku jojo si ŋa bɛi pɔkɔdɔ iyi í wa si kpãa.

⁷ Amma kù jɛ yaase bɛi ilaalui Asiri njɛ wa lasabu bɛ. Inɛ nŋu lasabu mmui í nɛ. Wa lasabui nŋu ku kpa zamaai ilɛ nkpɔ nkpɔ bii í jɛ á ce.

⁸ Bɛi í ni wee. Bɛɛrɛi inɛ ngboi soogem ŋa kù to bɛɛrɛi ilaalu ŋaui?

⁹ Mii iyi í ba ilui Kalineu, nŋu si í ba ilui Kaakemisi mɔ bɛ? Ǹ cea Amatii bɛi ǹ tako ǹ cea Aapadi, nɔ ǹ cea Samari bɛi ǹ tako ǹ cea Damasi.

¹⁰ Yaase bɛi ǹ kãmia bomma ŋa do gbugbãm, aŋa iyi à waa tɔɔ iwɛ̃ ŋa iyi kukpɔ nŋa í re ti Zeruzalɛmu do ti Samari,

¹¹ nŋui an mɔngɔ ku cea Zeruzalɛmu do iwɛ̃ɛ ŋa bɛi ǹ cea iwɛ̃i Samari ŋau?

¹² Waati iyi Aɔ̃ Lafɛ̃ɛ á na ku kpa irii icɛɛ iyi í nɛ ku ce si iri kutai Siɔ̃ɔ do Zeruzalɛmu fei, waati bɛɛbɛi á sãa ilaalui Asiri ilu faau iyi ilu ku cɔɛ kù sĩau mii iyi í ce.

¹³ Nŋui í ya fɔ ku maa ni, mii iyi ǹ ce fei, ǹ cooi do gbugbãi amu takam, do kumà ku cem, domi amui ǹ nɛ bisi ǹ re. Amui ǹ tale kɔɔi ilɛ ŋa, nɔ amui ǹ ko amani nŋa ŋa. Ǹ cei bɛi ilu gbugbã ǹ jɔ̀ à kita amanlu ŋa si bomma.

¹⁴ Bɛi à ya dasi awɔ si antɛi yɛi, bɛɛbɛi ǹ ko amanii zamaau. Nɔ bɛi à ya ko njɛ ŋa iyi à sa à jɔ̀, ǹ ko fei ndɛɛi si andunya, nɔ inɛ kãma kù yaga ikpa, hee má jɛ ku cĩ gɛlɛ ku dɔ̃ anu.

¹⁵ Dagba á yɔkɔ ku tɔɔ fufu bi inɛ iyi wa looɛ ba. Mà sii á yɔkɔ ku tɔɔ fufu si gãmɛi inɛ iyi wa looɛ. Mà golo á yɔkɔ ku cea inɛ iyi wa wuu lele bɛi í bi. Mà golo á yɔkɔ ku wu inɛ iyi wa looɛ lele ba.

¹⁶ Ŋɔi í jɔ̀ Aɔ̃ Lafɛ̃ɛi lele do ilɛ á jɔ̀ inɛ ŋa iyi à nɛ kaato ŋa a gbɛ. Nɔ si gãmɛi ilu bɛɛrɛɛ ŋau, ina á dedei bɛi gooba.

¹⁷ Inya Kumái Izirɛli á baa ku yɛi bɛi ina, nɔ nŋu iyi í jɛ Inɛ Kumáui á jɛ amɛi ina iyi á jo agũ ikã ikã fei si ajɔ akã.

¹⁸ Bii inau í dede, á jo mii feii mam mam. Hai agbo kusĩa ŋa hee do ikoi jĩi ŋa fei. Ilɛu á yɛi bɛi aa yɛ inɛ gɔ iyi bɔ̃ɔ í jɔ̀ í kua gbugbã.

¹⁹ Jĩi iyi á gbe si agboi Asiri kaa kpɔ. Baa ama keeke á yɔkɔ ku ka ŋa ku mà jia nŋa.

Inɛi Izirɛli ŋa iyi à fita si

²⁰ Si ajɔ nŋu bɛ, inɛi Izirɛli ŋa iyi à gbeu, waatɔ kpasɛ̃i Zakɔbu ŋa iyi à ba à fita siu a kaa maa na gbugbã si inɛ iyi wa cã ŋa má. Amma si Aɔ̃ Lafɛ̃ɛ Inɛ Kumái Izirɛlii aa na gbugbã ntɔ ntɔ.

²¹ Inɛ mbɔi tɔkui Zakɔbu ŋau aa sinda a nyi wa bi Ilaaɔ̃ ilu gbugbã.

²² Iŋɛ inɛi Izirɛli ŋa, baa bii kukpɔ nŋɛ í to bɛi sãai itĩi tenku, do nŋu fei inɛ mbɔ nŋɛ ŋai aa nyi wa. Aɔ̃ Lafɛ̃ɛ í fɔ idei nfe ku ce nŋɛ í jilɔɔ tã, nɔ kiitiu á cei dee dee.

²³ Nɔ bɛi Aɔ̃ Lafɛ̃ɛi lele do ilɛ í fɔu bɛɛbɛi á ce si ilɛu fei. Á ce nfei ilɛui si bɛi í fɔɔ tã.

I maà jɔ̀ zigi nŋɛ ku daò inɛi Asiri ŋa

²⁴ Na nŋu, ide iyi Aɔ̃ Lafɛ̃ɛi lele do ilɛ í fɔ wee. Í ni, iŋɛ zamaam ŋa iyi ì wa Siɔ̃ɔ, i maà jɔ̀ zigi nŋɛ ku daò inɛi Asiri ŋa iyi à wu awɔ à waa cã ŋɛ do golo bɛi inɛi Ezibiti ŋa mɔ à tako à ce wo.

²⁵ Waati iyi í gbe idɔɔkɔ̃m ku leekĩ kù sɔ má. Waatiu kekeekei, waati bɛɛbɛi an sinda si ŋa n ce nfe nŋa.

²⁶ Amu Aɔ̃ Lafɛ̃ɛ an so golom n cãò inɛi Asiri ŋa bɛi ǹ tako ǹ cã inɛi Madiãa ŋa kɔkɔi iri kutai Ɔrɛbuu. An wu golom lele má bɛi ǹ tako ǹ ce si tenkuu si wajui inɛi Ezibiti ŋa.

²⁷ Ajɔ nŋu bɛi an sɔ̀ɔɛ aso iyi wa tɛ kɔngɔɛu do zuugu iyi wa tɛ kɔ̃ɔɛu. Nɔ aa lai hee zuuguu ku cɛ.

Mbɛɛu í ce amɛɛ do Zeruzalɛmu wa

²⁸ Mbɛɛu wa to kɔkɔi Aya. Í tooi do ikpa Migɔrɔ̃ɔ nɔ í koo í jilɛ asoɛ ŋa Mikimasi.

²⁹ Í ce isɛɛnɛ í kua nɔ í ni, ka ce asɔ Geba ihɛ̃. Inɛi Rama ŋa à waa yaya do njo. Gibea ilui Sauluu, inɛ ŋa à waa sa.

³⁰ Iŋɛ inɛi Galimu ŋa, i dɔ̃ anu ŋa. Iŋɛ inɛi ilui Laisa ŋa, i sotĩ i gbɔ ŋa. Inɛi Anatɔti ŋa, ilu inɔ kufɔ ŋai.

³¹ Inɛi ilui Madimenaa ŋa à waa sa, nɔ inɛi Gebimu ŋa à waa dɛ bi ku manji.

³² Hai ajɔ nŋu bɛ gbakãi mbɛɛu í to Nɔbu. Ŋɔi í fĩ awɔ ku ba ku cã Siɔ̃ɔ iri kutai Zeruzalɛmu.

³³ Aɔ̃ Lafɛ̃ɛi lele do ilɛ í jɔ̀ amaawɔi jĩi ŋa à ga à waa cuku wa do gbugbã. Í kɛkɛ jĩi ŋa iyi à wa hee lele ŋau. Iyi à gboka à re ŋau fei í nyɔ ŋa wa ilɛ.

³⁴ Jĩi kusii inɔ agbo ŋa iyi wa dau à waa cuku, nɔ í jɔ̀ jĩi ndii sɛɛdi kusĩai Libãa ŋau à waa cuku do gbugbã.