Ezai 1 - Bibeli do fee

¹ Kuyɛ iyi walii Ezai í ce si gãmɛi bommai Zudaa do ilui Zeruzalɛmu. Ezai amai Amɔɔsu í ce kuyɛui si waatii bomma ku jɛi Oziasi do Yotamu do Ahazi do Ezekiasi ilaalui Zudaa ŋau.

Zamaa iyi kù waa gbɔ yaasei nkãma

² Lele, sotĩ i gbɔ, ilɛ, sotĩ i gbɔ. Aɔ̃ Lafɛ̃ɛi wa fɔ ide, í ni, ǹ bíi amu ŋa, nɔ ǹ kɔ ŋa, amma wee à dedeò ide ku kɔ̀ si gãmɛm.

³ Kɛtɛ í ya mà lafɛ̃ɛɛ, nɔ gbankɛlɛ mɔ í ya mà lafɛ̃ɛɛ iyi í ya náa sɔnda. Amma inɛi Izirɛli ŋa a kù mà nkãma. Zamaam nɔu kù waa gbɔ yaasei nkãma.

Nkãma kù wɛɛ dee dee si ilɛi Zudaa má

⁴ Iŋɛ inɛi Zudaa ŋau, inɔ kufɔi í jɛ tu ŋɛ iŋɛ ilu dulum ŋa. Laalɔi ì ya maa ce ŋa. Iŋɛ dimii woo ce laalɔ ŋai. Ama yaamɔi ì jɛ ŋa. Ì fũsi Aɔ̃ Lafɛ̃ɛ awɔ ŋa, ì donda Inɛ Kumái Izirɛliu, nɔ ì sinda ì toaa anyi ŋa.

⁵ Si bɛi ì kɔ̀ ì waa mɔsi do ide ku kɔ̀ nŋɛ ŋa, si afe iwoi ì bi ku cã ŋɛ bɛbɛi. Iri nŋɛ ŋa à ba kumɛɛ bii fei, nɔ idɔ nŋɛ ŋa a kù waa nɛ baani.

⁶ Hai iri nŋɛ ŋa hee ku koo si isɛ nŋɛ ŋa, kãma nŋa kù wɛɛ dee dee. Aŋa fei à ba kumɛɛ ŋai na golo ŋau, nɔ à nɛ juju ŋa nla nla. Inɛ kãma kù wiɛ juju ŋau, nɔ a kù dĩ ŋa hee má jɛ a jɔ́ nŋa si ikpo.

⁷ Ilɛ nŋɛu í baa í kpɔò bommai. À dasi ilu nŋɛ ŋau ina. Inɛ njoo ŋa à bɛjɛ amaajɛi iko nŋɛ ŋa si waju nŋɛ hee nkãma kù gbe nŋɛ má nɔ aa ni bɛi inɛ njoo ŋaui à waa naaò ijuukpãu wa.

⁸ Ilui Siɔ̃ɔ nŋu akãi à jɔ̀ bɛi kusu iyi í wa si inɔi jĩi ndii rezɛ̃ɛ ŋa, do bɛi kusu iyi í wa iko tengi bii à gbɛ̃ gbɛ̀sɛɛna ŋa, do bɛi ilu iyi mbɛɛ ŋa à kaakoɛ.

⁹ Bii Aɔ̃ Lafɛ̃ɛi lele do ilɛ kù jɔ̀ nwa inɛ ŋa baa keeke wo, aa ka yɛi bɛi ilui Sodomu do Gomɔɔ.

Kutɔɔ iyi ci ya dɔ̃a Ilaaɔ̃ si

¹⁰ Iŋɛ inɛ ngbo laalɔ ŋa iyi ì yɛ bɛi inɛi Sodomu ŋa, i sotĩ i gbɔ bɛi Aɔ̃ Lafɛ̃ɛ wa fɔ ŋa. Nɔ iŋɛ zamaa ŋau mɔ, iŋɛ iyi ì jɛ inɛ laalɔ bɛi inɛi Gomɔɔ ŋau, i sotĩ i gbɔ ikɔi Ilaaɔ̃ Lafɛ̃ɛ nwau ŋa.

¹¹ Bɛi Aɔ̃ Lafɛ̃ɛ í ni má wee. Í ni, n kù nɛ bukaatai kuwee nkpɔ nkpɔ nŋɛ ŋa. Kuwee ŋa iyi à ce do angudã kombo ŋa iyi à jo si ina fei sãa sãa do ti ikpoi ama kɛtɛ ŋau í to. N kù nɛ inɔ didɔ̃ kãma si njɛi kɛtɛ kombo ŋa do ti ama angudã ŋa do ti iwo kombo ŋa.

¹² Iyi ì ya maa naa bi tom ŋa, amui n kpe ŋɛ i naa inɔ kpasɛ̃m do yaase bɛɛbɛ ŋa ba.

¹³ Amua nŋɛ ŋau a kù nɛ aranfãani kãma. I maà naaò wa má. I leekĩ cuai kuwee nŋɛ ŋau ŋa, domi mii laalɔi bi tom. I leekĩ jingaui cukpa titɔ̃ ŋau ŋa do ti ajɔi kusĩmi ŋau hee do ti iyi à gbe ŋau fei. N kaa n gba kutɔɔ iyi í tɔtɔɔò laalɔ.

¹⁴ Ǹ cé jingaui cukpa titɔ̃ nŋɛ ŋau, nɔ n kù bi jingau nŋɛ ŋau kãma. Fei ndɛɛ asoi wa jɛɛm, nɔ ǹ gbɛɛjiò ku so nŋa bɛbɛi.

¹⁵ Bɛbɛi bii ì wu awɔ nŋɛ ŋa lele ì waa ce kutɔɔ ŋa, an ya n fà ijum nii ku ba n maà n yɛ ŋɛ. Aa ce kutɔɔ hee i gbɛɛji ŋa, amma n kaa n gbɔ nŋɛ, domi awɔ nŋɛ ŋa í kɔ̃i do njɛ.

¹⁶ Na nŋu, i wɛ i ce bukii ara ku maaju ŋa. I nya kuce laalɔ nŋɛ ŋau hai si wajum ŋa. I maà ce laalɔ má ŋa.

¹⁷ I kɔkɔ jiida ku ce ŋa. I ya ce iyi í jɛ dee dee ŋa. I baaò woo taa inɛ ŋa gbugbã wa si kpãa jiida ŋa. I cea kɔyɔ ŋa iyi í jɛ dee dee ŋa, i maà jɛ a takii jaaɔ̃ ŋa.

Bii ì waa leekĩ si ide ku kɔ̀ ŋa

¹⁸ Aɔ̃ Lafɛ̃ɛ í ni, na nŋu, i naa wa ka busi njɛ ŋa. Bii dulum du ŋɛ ŋa à kpã bɛi njɛ, an jɔ̀ a fũuta pai pai bɛi iwu. Bii í nɔ í jɛ à yɛ bɛi bulam bulam nii, an jɔ̀ ku fũuta pai pai bɛi ikũ fũfũ.

¹⁹ Bii ì na ara nŋɛ i gbɔ idem nɔ i jirimam ŋa, aa ba amaajɛ jiidai ilɛu i jɛ ŋa.

²⁰ Amma bii i kù jɛ ŋa, bii ì kɔ̀ ì waa leekĩ si ide ku kɔ̀ nŋɛ ŋa, taakubai á na ku kpa ŋɛ. Aɔ̃ Lafɛ̃ɛi í fɔ bɛɛbɛ.

Yaase bɛi Zeruzalɛmu á ce ku maaju

²¹ Bɛirei Zeruzalɛmu, ilu dee deeu í ce í na í jɛ woo ce sakara. Tako wo, ntɔ do dee dee ku jɛi í wa si iluu. Amma nsɛi, woo kpa inɛ ŋai à wa bɛ.

²² Zeruzalɛmu í baa í yɛi bɛi isɔ fũfũ iyi kù nɛ bɛɛrɛ má, do bɛi vɛ̃ɛ iyi à cuusi inyi.

²³ Inɛ ngboi Zeruzalɛmu ŋa, woo kɔ̀ ide ŋai, nɔ kpaasii ile ŋai. Amua ŋa iyi à sinda lasabu nŋai à ya bi ku gba, nɔ a ci ya kɔ̀ò kɔyɔ ŋa si gãmɛi mii ŋa iyi í nɛ ku jɛ tu ŋa. A ci ya gbɔa jaaɔ̃ ŋa baa bii à waa tɔɔ a sobi aŋa.

²⁴ Na ŋɔi í jɔ̀ amu Aɔ̃ Lafɛ̃ɛi lele do ilɛ, amu iyi ǹ jɛ ilu gbugbãi Izirɛliu ǹ ni, an fũsi ŋɛ awɔ, an kɔ̀ ide si gãmɛi iŋɛ mbɛɛm ŋa. An sã nŋɛ kuce nŋɛ iŋɛ mbɛɛm ŋa.

²⁵ Awɔ Zeruzalɛmu, ì ba ide mbɛ do amu. An dasiɛ inai bɛi à ya cea kãma, nɔ n nya mii ŋa iyi a kù maaju siɛ bɛi à ya ce bii à dasi isɔ fũfũ ina.

²⁶ An jɔ̀ woo kiitiɛ ŋau a yɛi bɛi woo kiitii tako ŋa, inɛ ŋa iyi aa jɛ woo kɔɛ ŋa mɔ a yɛ bɛi woo kɔi tako ŋa. Bii ǹ ceɛ bɛɛbɛ, aa yɔkɔ a kpeɛ ilu iyi í ya kiiti si ntɔ, do ilui inɛ dee dee ŋa.

²⁷ Bii inɛi Siɔ̃ɔ ŋa à kpaasi à waa kiiti si ntɔ, nɔ à waa nɛ dee dee, aa ba faaba.

²⁸ Amma ilu dulum ŋa, do hai jirima wooda ŋa, do inɛ ŋa iyi à sinda à toa Aɔ̃ Lafɛ̃ɛ anyi aa yɛ ijuukpã. Inɛ nŋu ŋau aa ce nfei.

²⁹ Ntɔ ntɔ aa yɛ anyɔ ŋai si na iyi í jɔ̀ ì nɛ buki ŋa iyi ì ya maa ce si abɛ jĩi ŋau ihɛ̃ ŋa nɔ bɛi idɔ nŋɛ fei í wa. Aa yɛ inɔ kufɔ ntɔ ntɔ ŋa si na iyi í jɔ̀ ì cica jĩi ndii lambo ŋau ihɛ̃ a jɛ bi ku ce buki nŋɛ ŋa.

³⁰ Iŋɛ mɔ aa na i yɛi bɛi jĩi ŋau bɛ ŋa waati iyi wua nŋa ŋa aa na a wɔ waati iyi a kù waa ba inyi.

³¹ Inɛ iyi í re do gbugbã á yɛi bɛi jĩi ngbɛ, nɔ mii iyi wa ce á lai bɛi ina, aŋa minji fei aa joi ajɔ, nɔ inɛ kãma kaa yɔkɔ ku kpa inau.