Ɛsitɛɛ 9 - Bibeli do fee

Ide ku kɔ̀i Zuifu ŋa

¹ Ŋɔi ajɔ maatɛtasiai cukpa maateejisiau si bii ilaalu í jilɛ woodaɛu í to. Nɔ mbɛɛi Zuifu ŋau à tamaa bɛi aŋa aa jɛ ŋa igũi amma kù ce bɛɛbɛ. Zuifu ŋaui à jɛ mbɛɛ nŋa ŋau igũ.

² Zuifu ŋau à tɔtɔɔ si ilu nŋa ŋau si ilɛi ilaalu Asuerusiu fei ku ba a to inɛ ŋa iyi à waa dɛ ku kpa ŋa ŋau fei awɔ, nɔ inɛ kãma kù yɔkɔ ku leekĩ si waju nŋa, domi njo nŋa iyi inɛ ŋa à waa ceu í to si inɛ baa yooma fei.

³ Ŋɔi inɛ ngboi ilɛ ŋau do ilaalu ŋa do inɛ ŋa iyi à waa mu ilɛu do akawe nla ŋau, aŋa fei anyii Zuifu ŋaui à wa domi à waa ce njoi Maadosee.

⁴ Maadosee í nɛ gbugbã si inɔ kpasɛ̃i ilaaluu, nɔ iriɛ í bɔ bii fei si ilɛu si na iyi í jɔ̀ gbugbãɛ í la wa kɔ̃ɔsi.

⁵ Zuifu ŋau à cea mbɛɛ nŋa ŋa bɛi à bi, à kpa aŋa fei do taakuba.

⁶ Si ilu nlai Suzeu Zuifu ŋau inɛmɔkɔ cĩɔ miiui à kpa.

^7-10 Nɔ à kpa ama mɛɛwai mbɛɛ nŋa Hamaa amai Hamedata. Iri nŋa wee. Paasanedata do Dalifɔ̃ɔ do Asipata do Porata do Adalia do Aridata do Paamaseta do Arisai do Aridai do Vazata. Amma a kù so mii ndu ŋa ŋa má.

¹¹ Ajɔ nŋu bɛ mɔi à sisia ilaaluu jiai amanɛ ŋa iyi à kpa si ilu nlai Suzeu.

¹² Ŋɔi ilaaluu í sɔ̃ Ɛsitɛɛ í ni, si ilu nlai Suzeu Zuifu ŋa à kpa inɛmɔkɔ cĩɔ miiu do ama mɛɛwai Hamaa ŋau. Bɛbɛi fɛloi aa kpa si bubui ilɛu iyi í gbe má. Amma do nŋu fei, bii ì nɔ ì bi n ceɛ ngɔgɔ má, an naɛ kpãa i coo. Mii iyi ì bi fei an ceɛ.

¹³ Ŋɔi Ɛsitɛɛ í jɛaa í ni, bii ì yɔɔ iyi í sĩa, na Zuifu ŋa iyi à wa Suzeu wooda, bɛi à ce nnyiu a ce bɛɛbɛ má ala, nɔ i jɔ̀ a koo a kɔa ikui ama mɛɛwai Hamaa ŋau si jĩi.

¹⁴ Ŋɔi ilaaluu í nyi í na ŋa wooda nŋu mɔ má nɔ à fangaaɛ si ilui Suzeu bii fei. Nɔ í jɔ̀ à koo à kɔa ikui ama mɛɛwai Hamaa ŋau si jĩi.

¹⁵ Nɔ Zuifu ŋa iyi à wa ilui Suzeu à tɔtɔɔ má si ajɔ maatɛ̃ɛsiai cukpai Adaau, nɔ à kpa inɛmɔkɔ cĩɔ mɛɛta. Amma a kù so nkãma nŋa.

¹⁶ Wee Zuifu ŋa iyi à wa ilu mmu ŋa, aŋa mɔ à tɔtɔɔ ku ba a kɔ̀ò ara nŋa. À kpa mbɛɛ nŋa ŋa aŋa dubu kita do maatũ à bɛi à sĩmi. Amma a kù so amani nŋa ŋa.

¹⁷ Inɛ nŋu bɛ í cei si ajɔ maatɛtai cukpai Adaa. Nɔ si ajɔ maatɛ̃ɛsiau à sĩmi nɔ à jɛ jingau do inɔ didɔ̃.

¹⁸ Amma Zuifu ŋa iyi à wa ilui Suze à kpa mbɛɛ nŋa ŋa si ajɔ maatɛtasia do si ajɔ maatɛ̃ɛsiai cukpau nɔ à sĩmi si ajɔ maatũsiaɛ à jɛ jingau do inɔ didɔ̃.

¹⁹ Na ŋɔi í ce Zuifu ŋa iyi à wa ilɛɛko ŋa do si ilu hai nɛ bindi ŋau à ya jɛ jingau si ajɔ maatɛ̃ɛsiai cukpai Adaa. À ya jɛ jingauui do inɔ didɔ̃ ntɔ ntɔ, nɔ à sambaa njɛ amua ŋa.

À jilɛ jingau

²⁰ Ŋɔi Maadosee í kɔ laabaau ŋau fei, nɔ í sambaa Zuifu ŋa iyi à wa si bommai ilaalu Asuerusiu fei tiau, hai inɛ ŋa iyi à wa amɛɛ hee do inɛ ŋa iyi à wa jĩijĩ fei.

²¹ Í sɔ̃ ŋa í ni, adɔ̃ fei si cukpai Adaa si ajɔ maatɛ̃ɛsiaɛ do si ajɔ maatũsiaɛ í sĩa ka ya jɛ jingau,

²² domi si ajɔ ŋau bɛi awa Zuifu ŋa à fita hai si awɔi mbɛɛ nwa ŋa. Si cukpau bɛ inɔ kufɔ nwa í kpaasi inɔ didɔ̃, nɔ iyi wa jɛ nwa mii laalɔ í baa í jɛ nwa jiida. Í sĩa ka ya jɛ jingau do inɔ didɔ̃ ka maa yeò gigii ajɔ ŋau bɛ nɔ ka ya sambaa njɛ amua ŋa nɔ ka ya cea ilu are ŋa amua ŋa.

²³ Nɔ Zuifu ŋau à too si ide iyi Maadosee í kɔu. Nɔ jingauu í baa í jɛ dedemba nŋa iyi aa maa too si adɔ̃ fei si bɛi Maadosee í kɔɔu.

²⁴ Maadosee wa ye ŋa gigi í ni, Hamaa amai Hamedata tɔkui Agagi, nŋu iyi í jɛ mbɛɛi awa Zuifu ŋau, í lasabui wo nŋu ku kpa wa. Nɔ í ta kpasa gɔ iyi à ya kpe Purimu ku ba ku mà dee dee ajɔ iyi nŋu á kpa wa fei sãa sãa.

²⁵ Amma Ɛsitɛɛ í koo í ba ilaalu, nɔ ilaaluu í na wooda í jɔ̀ à kɔɔ si tia à ni a jɔ̀ laalɔ iyi Hamaa í cea Zuifu ŋa sɔɔluɛu ku bii si irii nŋu takaɛ, nɔ a bagãɛ si jĩi nŋu do amaɛ ŋa.

²⁶ Na ŋɔi í ce à waa kpe ajɔ ŋau Purimu, waatɔ kpasa. Ide iyi Maadosee í kɔ si tiau, Zuifu ŋau à waa ceò icɛ, do si mii iyi à yɛ do iyi í ce si gãmɛ nŋa fei.

²⁷ Zuifu ŋa à so ajɔ ŋau bɛi í baa í jɛ jingaui dedemba iyi a kaa yɔkɔ a kpaasiɛ. Aa ya maa cooi hee koo too si tɔku nŋa ŋa. Nɔ inɛ ŋa mɔ iyi à kpaasi ara nŋa Zuifu, aŋa mɔ aa ya cooi. Adɔ̃ fei aa ya cooi ajɔ minji si bɛi à kɔɔu bii waatiɛ í to.

²⁸ Jingauui á jɔ̀ Zuifu ŋa a maa ye gigii ajɔ ŋau hee do ajɔ fei si inɔ kpasɛ̃ nŋa ŋa, do si ilɛu fei, do si ilu ŋau fei. Zuifu ŋau do tɔku nŋa ŋa fei kù sĩa a kpa kuceu bɛ, nɔ kù sĩa a gbɛjɛ mii iyi í tako í ce í lɔu.

²⁹ Ŋɔi Ɛsitɛɛ aboi ilaaluu, amai Abihaili, do Maadosee Zuifuu à kɔ tia minjisia si gãmɛi jingaui Purimu. À kɔ tiaui do yiiko iyi à nɛ.

³⁰ Tia titɔ̃ iyi à kɔu, à sambaa Zuifu ŋa fei si ilɛ cifa do mɛɛje iyi í wa si bommai ilaalu Asuerusiu fei. Si tiau idei laakai ku sũi à fɔ ntɔ ntɔ.

³¹ Nɔ à kɔ má à ni Zuifu ŋau a jɛ jingaui Purimu si waati iyi à dau, si bɛi à tako à fɔ wo. Zuifu ŋa aŋa taka nŋai à jilɛ jingauu ti aŋa taka nŋa do tɔku nŋa ŋa, nɔ à ni aa ce anu ku dĩ do kukpata a bɛi a jɛ jingauu.

³² Bɛɛbɛi wooda iyi Ɛsitɛɛ í nau í jɔ̀ a mà iyi à jilɛ jingaui Purimu, nɔ à kɔɔ si tiai bommau.