Ɛsitɛɛ 8 - Bibeli do fee

¹ Ajɔ nŋu bɛ mɔi ilaalu Asuerusi í na Ɛsitɛɛ mii ndii Hamaa ŋa fei, nŋu iyi í jɛ mbɛɛi Zuifu ŋau. Nɔ Ɛsitɛɛ í sɔ̃ ilaaluu í ni Maadosee nyaanzei nŋui wa jɛ. Ŋɔi ilaaluu í ni Maadosee ku naa wa.

² Iyi Maadosee í koo ŋɔi ilaaluu í nya lɛlɛawɔɛ iyi í tako í na Hamaau í so í naa. Si anyiɛ nɔ Ɛsitɛɛ í jilɛ Maadosee si kpasɛ̃i Hamaa ku maa cɔɔa.

Woodai ilaalu iyi á faaba Zuifu ŋa

³ Nɔ Ɛsitɛɛ í nyi í sisi wa tɔɔ ilaaluu suuru má. Í koo í gulɛ si wajuɛ do kukpata wa tɔɔɛ ku ganji laalɔ iyi Hamaa tɔkui Agagi í jilɛ ku ba a kpa Zuifu ŋau.

⁴ Ŋɔi ilaaluu í toa Ɛsitɛɛ goloi wurau, nɔ í dede í leekĩ si wajuɛ

⁵ í ni, bii í jɛ ì yɔɔ iyi í sĩa nɔ bii í jɛ ǹ ba didɔ̃ si wajuɛi, bii í jɛ í dɔ̃ɛ si nɔ bii ǹ jɛ jiida si wajuɛi, kɔ tia i ganji ide iyi Hamaa amai Hamedata tɔkui Agagi í jilɛu, si bɛi í kɔɔ í jilɔɔ si a kpa Zuifu ŋa iyi à wa si ilɛu fei.

⁶ Nɔ í ni má, bɛirei an ce n maa n yɛ laalɔ iyi wa naa si inɛm ŋa do bɛi à waa kpa ŋa nɔ n maa n coko.

⁷ Ŋɔi ilaalu Asuerusi í jɛa Ɛsitɛɛ do Maadosee Zuifuu í ni, ǹ jɔ̀ à bagãm Hamaa si jĩi si na iyi í jɔ̀ wa kpã Zuifu ŋa iju, nɔ andi mii iyi í jɛ amaniɛ fei ǹ so ǹ na awɔ Ɛsitɛɛ.

⁸ Amma n kaa n yɔkɔ n kpaasi woodau, domi tia iyi à kɔ do irii ilaalu nɔ à mási sɛɛdaɛ, inɛ gɔ kaa yɔkɔ ku ganji idei tiau. Na nŋu, iŋɛ mɔ i kɔ tia do irim na aranfãanii Zuifu ŋa si bɛi í sĩa nŋɛ si, nɔ i mási sɛɛdai amu takam ŋa.

⁹ Ajɔ nŋu bɛ, si ajɔ kɔnfia do mɛɛtasiai cukpa mɛɛtasia iyi à ya kpe Sivãau à kpe woo kɔ tiai ilaalu ŋau wa. Bɛi Maadosee í fɔ fei, bɛɛbɛi inɛ ŋau à kɔɔ. À kɔa Zuifu ŋa do amanlu ŋau do inɛ ngboi ilɛ ŋau do inɛ ŋa iyi à jɛ inɛ ngbo si ilɛ cifa do mɛɛje ŋa iyi à wa si bommau hai Ɛndi hee ku bɔ Etiopi. À kɔɔi do feei inɛ fei do yaase bɛi dimi ŋa iyi à wa si ilɛ ikã ikã ŋau fei à ya fɔ, do si feei Zuifu ŋa taka nŋa, do si yaase bɛi à ya kɔ.

¹⁰ Ŋɔi à kɔ tiau do irii ilaaluu nɔ à mási sɛɛdai nŋu takaɛ. Nɔ à ni masa ŋa a gũ acĩ ŋa iyi à wa inɔ kaai ilaaluu a dabii a kpɛ̃ tia ŋau.

¹¹ À kɔ sii à ni, ilaalu í na Zuifu ŋa iyi à wa si bommau tengi bii à wa fei wooda í ni a tɔtɔɔ a kɔ̀ò ara nŋa. Í mu nŋa kpãa a kpa inɛ ŋa iyi aa na a ba ŋa igũ ku ce si ilɛ iyi í wa si bommau fei do si dimi baa yooma fei. Aa yɔkɔ a kpa baa abo nŋa ŋa mɔm do ama nŋa ŋa, nɔ a wusɛ amani nŋa ŋa a soo.

¹² Nɔ fei ndɛɛ aa cooi ajɔ akã si ilɛi ilaalu Asuerusiu fei si ajɔ maatɛtasiai cukpa maateejisia iyi à ya kpe Adaau.

¹³ Si ilɛu fei tiau í nɛ ku jɛi bɛi wooda, nɔ í sĩa a sɔ̃ inɛ fei ku gbɔ iyi Zuifu ŋau à tã sɔɔlu a kɔ̀ ide si wajui mbɛɛ nŋa ŋa bii ajɔ iyi á dau í to.

¹⁴ Hai ilaalu í na woodau gbakã, inɛ ŋa iyi à jɛ woo dabii ku sisi laabaau ŋau à gũ acĩ ŋa iyi à wa inɔ kaai ilaaluu à waa nɛ do saasa. Nɔ à fangaa woodau bii fei hee do si ilu nlai Suzeu.

¹⁵ Ŋɔi Maadosee í fita wa hai idei ilaaluu, wa dasi ibɔi amanlu. Ibɔu í yɛ boogu nɔ í nɛ fũfũ. Nɔ í dasi fulai wura nla nla gɔ do ibɔ kumboo nkpa gɔ. Ŋɔi si inɔ ilui Suze bii fei inɛ ŋa à wasi ku dɔ̃ anu do inɔ didɔ̃.

¹⁶ Ajɔ nŋu bɛ, inɔ didɔ̃ nla nlai í jɛ ti Zuifu ŋa domi à yɔɔ iyi aŋa à nɛ bɛɛrɛ.

¹⁷ Si ilɛu fei do si ilu bii woodai ilaaluu í to fei, Zuifu ŋau à ya wɛɛò inɔ didɔ̃i ntɔ ntɔ nɔ à nya kujɛ ŋa. Ŋɔi si ilɛu inɛ nkpɔ nkpɔ í kpaasi araɛ Zuifu, domi à waa ce njo nŋa.