Ɛsitɛɛ 7 - Bibeli do fee

Anyɔi Hamaa do ikuɛ

^1-2 Si ajɔ minjisiau ŋɔi ilaaluu do Hamaa à bɔ jingau ku jɛ idei Ɛsitɛɛ. Waati iyi à waa mɔ vɛ̃ɛu ŋɔi ilaaluu í bee Ɛsitɛɛ má í ni, mii ì bi n ceɛ Ɛsitɛɛ. Baa bii í jɛ bubui bommam nii ì bi aa baa.

³ Ŋɔi Ɛsitɛɛ í jɛaa í ni, bii í jɛ ǹ ba didɔ̃ si wajuɛi, nɔ bii ì yɔɔ iyi í sĩa, jɔ̀ n ba kuwɛɛ, amu do inɛm ŋa. Mii iyi ǹ bi mbɛ.

⁴ Ntɔ ntɔ amu do inɛm ŋa à ta wai a koo a saka wa a kpa wa nɔ a ce nfe nwa mam mam araare kù maa wa si. Bii í jɛ bɛi à ta wa ka jɛ aru nŋu akãi wo n kaa n fɔ ide kãma, domi inɛ nŋu kù to n maa n bitandiɛ.

⁵ Ŋɔi ilaalu Asuerusi í bee Ɛsitɛɛ í ni, yooi í ce lasabu dimi bɛɛbɛ, nɔ iwoi í wa.

⁶ Nɔ Ɛsitɛɛ í jɛa í ni, mbɛɛ nwa iyi wa kpã wa iju, nŋui í jɛ Hamaa inɛ laalɔu ihɛ̃. Ŋɔi njo í mu Hamaa si wajui ilaaluu do si wajui Ɛsitɛɛ.

⁷ Nɔ si bɛi idɔi ilaaluu í kɔ̃, í dede í fita hai bi ku ce jingauu í koo í lɔ inɔ lamboi kpasɛ̃ɛu. Ŋɔi Hamaa í gbe bɛ í wasi ku tɔɔ Ɛsitɛɛ suuru, domi í mà tã iyi ilaalu Asuerusi á kpa nŋui.

⁸ Nɔ í kanju í koo í sɛɛbata si daayi bii Ɛsitɛɛ í wau. Ŋɔi gbakã ilaalu wa baa hai lambou wa naa ku lɔ ileu. Nɔ í la siɛ í ni, ì nyi ì waa bi i tɔtɔɔ sɛ̃ɛ do Ɛsitɛɛ má bi tom ihɛ̃ hee si inɔ ilem? Hai ilaalu í fɔ bɛɛbɛ gbakã, woo ce icɛɛ ŋau à naa à bii wajui Hamaa do acɔ.

⁹ Nɔ Haabona inɛ akãi woo ce icɛ ŋau í sɔ̃ ilaaluu í ni, Hamaa í ce sɔɔlui jĩi bii aa bagãm Maadosee inɛ iyi í faabaɛ í jɔ̀ a kù ba a kù kpaɛu. À lɔ jĩi nɔu idei Hamaa takaɛ bɛ, kugbokaɛ agbãawɔ ciitaai. Ŋɔi ilaaluu í ni a bagãm Hamaa si bɛ.

¹⁰ Nɔ à bagãm Hamaa si jĩi iyi wa bi ku bagãm si Maadoseeu. Ŋɔi idɔɔkɔ̃i ilaaluu í bɛi í sũ.