Ɛsitɛɛ 6 - Bibeli do fee

Tilasii Hamaa ku jirima Maadosee

¹ Idũ ajɔ nŋu ilaaluu kù yɔkɔ kù sĩ njoo. Ŋɔi í ni a koo a soa nŋu tiai ide ŋa iyi í ce si bommau wa, nɔ à koo à soo wa à naa à cioaa.

² Ŋɔi à cio tengi bii wa fɔ yaase bɛi Bigitani do Terɛsi inɛmɔkɔ bantãm minji ŋa iyi à jɛ woo degbe andɛ koofai inɔ ilei ilaalu ŋau à waa busi njɛ bɛi aa ce a kpa ilaaluu nɔ Maadosee í jɔ̀ ide nŋau í fita gbugbãa.

³ Ŋɔi ilaaluu í bee í ni, to. Bɛɛrɛ yoomai Maadosee í ba na ideu bɛ. Ŋɔi woo ce icɛɛ ŋau à ni, aawo, a kù cea nkãma.

⁴ Ŋɔi ilaaluu í bee í ni, inɛ gɔ kù wa si bantumai kpasɛ̃u bɛ? Wee í ko Hamaa í lɔ wa si inɔ bantumau, wa naa ku sɔ̃ ilaaluu ku jɔ̀ a bagãm Maadosee si jĩi iyi nŋu í ce sɔɔluɛu.

⁵ Ŋɔi woo ce icɛ ŋau à jɛaa à ni, Hamaai í wa bantumau bɛ. Ŋɔi ilaaluu í ni ku lɔ wa.

⁶ Iyi Hamaa í lɔ wa ŋɔi ilaaluu í beeɛ í ni, bɛirei an cea inɛ iyi ǹ bi ku jɛ ilu bɛɛrɛ. Ŋɔi Hamaa wa lasabu si idɔɛ í ni, inɛ mmu yoomai ilaaluu wa bi ku jɔ̀ ku jɛ ilu bɛɛrɛ bii kù jɛ amu má.

⁷ Nɔ Hamaa í jɛaa í ni, inɛ iyi ì bi ku jɛ ilu bɛɛrɛ

⁸ í gbe i naa ibɔ iyi awɔ takaɛ ì ya dasi nɔ i naa acĩi awɔ takaɛ iyi iriɛ í nɛ fulai ilaalu.

⁹ Nɔ i jɔ̀ inɛ akã iyi wa jɛ inɛ ngboi akawe ŋau ku daa lafɛ̃ɛ si ibɔi awɔ takaɛu, nɔ ku lesi lafɛ̃ɛu si antaii acĩɛu nɔ ku mu acĩu ku maa dabiiɛ si inɔ ilu nlau, nɔ ku fɔ hee lele do wajuɛ ku maa ni, i cɔ bɛi ilaalu í ya cea inɛ iyi í bi ku jɛ ilu bɛɛrɛ ŋa.

¹⁰ Ŋɔi ilaaluu í sɔ̃ Hamaa í ni, to. Nsɛi nsɛi koo so ibɔu nɔ i mu acĩu wa i na i cea Maadosee Zuifu iyi wa buba anu ilem nɔu bɛ dee dee bɛi ì sɔ̃m nɔu. Maà jɔ̀ gɔgɔɛ gɔ ku gaizia.

¹¹ Ŋɔi Hamaa í dede í koo í so ibɔu wa nɔ í mu acĩu wa. Nɔ í daa Maadosee si ibɔu, í lesiɛ si antaii acĩu, nɔ í gbãa í dabiiɛ si inɔ ilu nlau, nɔ wa fɔ hee lele si wajuɛ wa ni, i cɔ bɛi ilaalu í ya cea inɛ iyi í bi ku jɛ ilu bɛɛrɛ ŋa.

¹² Iyi Maadosee í na í sinda í baa anu koofai ilaaluu, ŋɔi Hamaa í ce saasa wa nɛ ideɛ do inɔ kufɔ nla nla nɔ í bii wajuɛ ku ba ku singa anyɔɛ.

¹³ Ŋɔi iyi í to ide í sisia aboɛ do kpaasiɛ ŋau fei mii iyi í ba nŋu. Nɔ aboɛu do woo naa ikɔ ŋa à sɔ̃ɔ à ni, Maadosee nŋu iyi ì sinti ku cuku si wajuɛu Zuifui. Na ŋɔi í jɔ̀ i kaa yɔkɔ i ceaa nkãma, amma kù nɛ sika kãma aa kaye i maa kooi si wajuɛ.

¹⁴ Si bɛi wa fɔ ideu gbakã, ŋɔi inɛ ŋa iyi ilaaluu í bɛ siɛu à to wa, nɔ kù kpɛ má á gbãa í koo jingau iyi Ɛsitɛɛ í ce nŋa sɔɔluɛu.