Ɛsitɛɛ 5 - Bibeli do fee

Ɛsitɛɛ í bɔ bi ilaalu

¹ Iyi anu ku dĩi ajɔ mɛɛtau í kpa iri, ŋɔi Ɛsitɛɛ í dasi ibɔi ilaaluɛ í koo í leekĩ si inɔ bantumai kpasɛ̃i ilaaluu tengii anui ileɛ. Wee ilaaluu í wa kabaɛ wa buba si kitãi bommaɛ kɔkɔi anui ileu.

² Iyi í yɛ Ɛsitɛɛ wa leekĩ si bantumau, ŋɔi í cɔɔ do iju jiida nɔ í toaa goloi wura iyi wa mu si awɔu. Ŋɔi Ɛsitɛɛ í nɛ wa í naa í mu imɔi golou.

³ Ŋɔi ilaaluu í beeɛ í ni, mii í ce Ɛsitɛɛ. Mii ì bi. Ǹ tã sɔɔlu n naɛ baa bubui bommam.

⁴ Ŋɔi Ɛsitɛɛ í jɛaa í ni, bii á sĩaɛ si, ǹ bi awɔ do Hamaa ì naa idem nnyi ŋa i naa i jɛ jingau iyi ǹ ceɛ sɔɔluɛ.

⁵ Nɔ ilaaluu í bɛ ama í ni ku sɛi koo kpe Hamaa wa, domi bɛɛbɛi Ɛsitɛɛ í bi. Ŋɔi aŋa minji fei à koo à jɛ jingau iyi Ɛsitɛɛ í ce sɔɔluɛu.

⁶ Iyi à jɛ à tã ŋɔi ilaaluu í bee Ɛsitɛɛ í ni, mii aa tɔɔm. Ǹ tã sɔɔlu n ceɛ mii iyi ì bi fei. Baa bii bubui bommam nii ì bi an yɔkɔ n naɛ.

⁷ Ŋɔi Ɛsitɛɛ í jɛaa í ni, mii iyi ǹ wa n tɔɔɛ wee.

⁸ Bii í jɛ ǹ ba didɔ̃ si wajuɛi, nɔ bii ì tã sɔɔlu i nam mii iyi ǹ bi feii, ǹ bi awɔ do Hamaa i nyi wa i naa i jɛ jingau iyi an ce nŋɛ má ala. Waati bɛɛbɛ an sɔ̃ɛ mii iyi ǹ bi.

Hamaa wa dɛ Maadosee ku kpa

⁹ Ajɔ nŋu bɛ Hamaa í fita hai inɔ kpasɛ̃i ilaalu inaabou do inɔ didɔ̃. Amma iyi í yɛ Maadosee bi anu koofai ilaaluu, nɔ í ba wee kù dede mɔm hee má jɛ ku jirima nŋu, ŋɔi idɔɛ í kɔ̃ siɛ ntɔ ntɔ.

¹⁰ Amma do nŋu fei í temua í nɛ̀ ideɛ. Ŋɔi í kpe kpaasiɛ ŋa do Zerɛsi aboɛ í tɔtɔɔ ŋa.

¹¹ Ŋɔi Hamaa wa tɔɔ fufu si waju nŋa na amaniɛ ŋa iyi í nɛ do bɛi kukpɔi amaɛ ŋa í to do bɛi ilaaluu í jɔ̀ í nɛ bɛɛrɛ nla nla í re woo ce icɛ ŋau fei do akawe ŋau.

¹² Si anyiɛ nɔ Hamaa í ni má iyi nŋu akãi Ɛsitɛɛ í kpe í ni nŋu ku sì ilaaluu wa a koo a jɛ jingau ajɔ nŋu. Nɔ í nyi í kpe nŋu do ilaaluu í ni a naa wa má ala.

¹³ Amma do nŋu fei, nŋu ci ya nɛ inɔ didɔ̃ bii nŋu í na í yɛ Maadosee Zuifuu wa buba anu koofai ilaaluu.

¹⁴ Ŋɔi Zerɛsi aboɛ do kpaasiɛ ŋau fei à sɔ̃ɔ à ni, dɛdɛ jĩi iyi kusɔɛ í to agbãawɔ ciitaa, ala daakɔ nɔ i sɔ̃ ilaaluu i ni ku jɔ̀ a bagãm Maadosee. Bii ì ce bɛɛbɛ aa yɔkɔ i sì ilaaluu jingauu do inɔ didɔ̃. Si bɛi ideu í dɔ̃a Hamaa si, ŋɔi í ce sɔɔlui jĩi nɔu.