Ɛsitɛɛ 4 - Bibeli do fee

Maadosee í ni Ɛsitɛɛ ku dasi ideu gɛlɛ

¹ Waati iyi Maadosee í gbɔ ideu í ga ibɔɛ ŋa, nɔ í dasi ibɔi saaki nɔ í fãsi ilúlu si iriɛ. Nɔ wa dabii si inɔ iluu bii fei wa dɔ̃ò anu do ara kuro nla nla.

² Iyi í to anu koofai ilaaluu nɔ í leekĩ, domi wooda kù wɛɛ inɛ kãma ku lɔ bɛ do jĩnɛi inɔ kufɔ.

³ Si ilɛ iyi í wa si bommau fei, bii tiai ilaaluu í to fei, Zuifu ŋa à ya wɛɛò inɔ kufɔ nla nlai. Ŋɔi à ya dĩ anu a maa kpataò, nɔ inɛ nkpɔ nkpɔ nŋa ibɔi saakii à ya dasi a maa sũò si ilúlu.

⁴ Ŋɔi inaabo woo ce icɛi Ɛsitɛɛ ŋau do woo degbeɛ ŋa à naa à sisiaa mii ŋa iyi aŋa à yɛ, ŋɔi zigiɛ í da ntɔ ntɔ. Nɔ í sambaa Maadosee ibɔ ŋa ku ba ku bɔ ibɔi saakiu ku nyɔɔ, amma í kɔ̀ ku gba.

⁵ Ŋɔi Ɛsitɛɛ í kpe Hataku inɛ akãi woo degbeɛ ŋa iyi ilaalu í jilɛau, nɔ í bɔɔ koo bee Maadosee mii iyi wa ce, do mii iyi í jɔ̀ wa ce bɛɛbɛ.

⁶ Ŋɔi Hataku í koo í ba Maadosee bi bantuma iyi í wa wajui kabai bommau.

⁷ Ŋɔi Maadosee í sisiaa ideu fei sãa sãa, nɔ í sɔ̃ɔ idei fia iyi Hamaa í ni nŋu á sã bii à kpa Zuifu ŋa.

⁸ Nɔ í naa tia si bii à kɔ wooda iyi à fangaa si ilui Suze ku ba a kpa Zuifu ŋau, nɔ í sɔ̃ɔ í ni ku sisia Ɛsitɛɛ yaasei ideu fei nɔ ku nyisiɛ tia si bii à kɔ woodau. Nɔ í ni Ɛsitɛɛ ku bɔ bi ilaaluu ku tɔɔɛ suuru nɔ ku ce araarei inɛɛ ŋa.

⁹ Ŋɔi Hataku í naa í sisia Ɛsitɛɛ ide ŋa iyi Maadosee í fɔu fei.

¹⁰ Nɔ Ɛsitɛɛ í bɛ Hataku koo sɔ̃ Maadosee má,

¹¹ ku ni, inɛ fei hai woo ce icɛi ilaalu ŋau do inɛi ilɛ ŋa iyi à wa si bommaɛ fei à mà iyi wooda wa ganji inɛ ŋa a lɔ bi ilaalu. Inɛmɔkɔ walakɔ inaabo iyi í lɔ si inɔ bantumai kpasɛ̃i ilaaluu, bii kù jɛ ilaalui í kpoo, lafɛ̃ɛ á kui, í gbe bii ilaaluu í toaa goloi wuraɛ. Iyi í jɛ ti idei amu takam, ajɔ kuntaai ihɛ̃ bɛbɛi iyi a kù kpem bi ilaaluu.

¹² Iyi Maadosee í gbɔ bɛi Ɛsitɛɛ í jɛaa

¹³ ŋɔi nŋu mɔ í jɛaa má í ni, maà na i tamaa bɛi si inɔi Zuifu ŋa awɔ akãi aa fita si, si na iyi í jɔ̀ ì wa kpasɛ̃i ilaalu.

¹⁴ Bii ì kɔ̀ ku dasi ideu gɛlɛ nsɛi, Zuifu ŋa aa ba sobi wa hai bii gɔ nɔ a ba faaba, amma awɔi aa na i ku, nɔ kpasɛ̃i baaɛ ku kpa iri. Nɔ á yɔkɔ ku jɛ na ide dimi bɛ ihɛ̃i í jɔ̀ ì jɛ aboi ilaalu.

¹⁵ Ŋɔi Ɛsitɛɛ í ni a koo a sɔ̃ Maadosee

¹⁶ koo tɔtɔɔ Zuifu ŋa iyi à wa Suzeu fei a cea nŋu anu ku dĩ ajɔ mɛɛta do idũ mɛɛta, a maà jɛ nɔ a maà mɔ nkãma. Bɛɛbɛ mɔi í ni nŋu takai nŋu á dĩ anu do woo ce icɛi nŋu ŋa nɔ baa do iyi wooda í ganji fei, nŋu á bɔ bi ilaaluu, nɔ bii í jɛ nŋu á kui, nŋu ku ku.

¹⁷ Ŋɔi Maadosee í koo í ce bɛi Ɛsitɛɛ í sɔ̃ɔu.