Ɛsitɛɛ 3 - Bibeli do fee

Njɛ hai gbɔa iyi í wa si gãmɛi Hamaa do Maadosee

¹ Si anyii nŋu, ŋɔi ilaalu Asuerusi í kɔ̃ɔsi gbugbãi Hamaa amai Hamedata tɔkui Agagi. Í soo lele í jɔ̀ í jɛ minjisiaɛ, nɔ í jɛ inɛ ngboi akaweɛ ŋa.

² Woo ce icɛi ilaalu ŋau fei à ya maa gulɛi a maa sɛɛbata si wajui Hamaa, domi ilaaluui í na wooda bɛɛbɛ. Í gbe Maadosee nŋu akã iyi í kɔ̀ ku ce bɛɛbɛ.

³ Ŋɔi woo ce icɛ ŋa iyi à gbeu à waa beeɛ à ni, bɛirei í ce ì waa donda woodai ilaaluu.

⁴ Ajɔ fei à ya maa beeɛi amma ci ya gbɔ ide nŋa. Ŋɔi ajɔ nŋu gɔ í sɔ̃ ŋa í ni nŋu Zuifui. Ŋɔi à sisia Hamaa ku ba a cɔ mà á nyi ku kɔ̀ ku sɛɛbata má.

⁵ Ŋɔi Hamaa í ba wee ntɔ ntɔi Maadosee í kɔ̀ ku sɛɛbata si wajui nŋu, nɔ idɔɛ í kɔ̃.

⁶ Amma kù bi ku dasi Maadosee nŋu akã awɔ. Si bɛi à sɔ̃ɔ à ni Maadosee Zuifui, ŋɔi í bi ku kpa Zuifu ŋa iyi à wa si bommau fei.

⁷ Si adɔ̃ maateejisiai bomma ku jɛi ilaalu Asuerusi, si cukpa sinte iyi à ya kpe Nisãa, Hamaa í jɔ̀ à ta kpasa gɔ iyi à ya kpe Purimu ku ba ku mà si cukpa do si ajɔ iyi á sĩa nŋu ku kpa ŋa. Ŋɔi í koo í cuku si cukpa maateejisia iyi à ya kpe Adaa.

Hamaa wa ce sɔɔlui Zuifu ŋa ku kpa

⁸ Ŋɔi Hamaa í koo í sɔ̃ ilaalu Asuerusi í ni, dimi gɔ ŋa à wa si ilɛu ihɛ̃, à wɛɛ ikã nɔ à fangaa bii fei si bommaɛu. Wooda nŋa ŋa à jɛ ikã do ti inɛ ŋa iyi à gbe nɔ a kù waa jirima woodaɛ ŋa. Kaa jɛɛ aranfãani bii ì jɔ̀ inɛ ŋau sɛ̃ɛ.

⁹ Bii awɔ ilaalu ì yɔɔ iyi í sĩa, na wooda a kpa ŋa. Nɔ an na akawe woo ce icɛɛ ŋau isɔ fũfũ iyi kuwoɛ í to tɔnu cĩɔ mɛɛta a na a dasi amaniɛ.

¹⁰ Ŋɔi ilaaluu í nya lɛlɛawɔɛ iyi í jɛ sɛɛdai nŋu takaɛ í na Hamaa mbɛɛi Zuifu ŋau. Hamaau amai Hamedatai nɔ wa jɛ tɔkui Agagi.

¹¹ Nɔ í sɔ̃ɔ í ni, mu fiaɛ. Inɛ ŋau mɔ, ce nŋa bɛi ì bi.

¹² Ŋɔi si ajɔ maatɛtasiai cukpa sinteu à kpe woo kɔ tiai ilaalu ŋau, nɔ bɛi Hamaa wa sɔ̃ ŋa fei à wasi ku kɔɔ. Nɔ amanlu ŋai à waa kɔa do inɛ ngboi ilɛ ŋau do inɛ ŋa iyi à jɛ inɛ ngbo si dimi ikã ikã fei. À kɔ tiaui ikã ikã si dimii kukɔ iyi inɛ ŋa à mà, do si fee iyi inɛ ŋa à waa fɔ fei si bommau. À kɔɔi do irii ilaaluu do sɛɛdai nŋu takaɛ.

¹³ Woo bɛ ŋa à so tia ŋau à waa kpɔ̃ɔ si ilɛu fei si bommai ilaaluu. Si tiau à na woodai à ni a saka Zuifu ŋa nɔ a kpa aŋa fei a maà ce araare nŋa, hai awaasũ do mɔkɔ ngbo fei, inaabo do ama keeke fei, nɔ a wusɛ amani nŋa ŋa a soo. Fei ndɛɛ aa cooi ajɔ akã si ajɔ maatɛtasiai cukpa maateejisia iyi à ya kpe Adaa.

¹⁴ Si ilɛu fei tiau í nɛ ku jɛi bɛi wooda, nɔ a sɔ̃ inɛ fei ku gbɔ ku ba a tã sɔɔlu a ce bɛi à fɔu bii ajɔ iyi à dau í to.

¹⁵ Woo bɛ ŋau à kooi gbãa gbãa si bɛi ilaaluu í na wooda, nɔ ideu í fangaa hee do si ilu nlai Suzeu fei. Nɔ waati iyi inɛi ilui Suze ŋau fei à wɛɛò inɔ kufɔ nla nla, waati bɛɛbɛi ilaaluu do Hamaa à buba à waa mɔ atɛ̃ nŋa.