Ɛsitɛɛ 2 - Bibeli do fee

À cica Ɛsitɛɛ ku jɛ aboi ilaalu

¹ Si anyii fei ndɛɛ, waati iyi idɔɔkɔ̃i ilaalu Asuerusi í na í sũ, ŋɔi í ye gigii Vasiti si mii iyi í tako í ce do ide iyi nŋu mɔ í jilɛ na iriɛ.

² Ŋɔi woo ce icɛi ilaalu ŋau à sɔ̃ɔ à ni, í sĩa a dɛdɛɛ mudɛ̃ɛ ŋa wa iyi à sĩa nɔ a kù mà mɔkɔ.

³ Na nŋu nsɛi, cica akawe ŋa iyi à wa ilɛ mmu ŋa si bommaɛ a tɔtɔɔ mudɛ̃ɛ ŋa iyi à sĩa wa si ilui Suze, inɛ ŋa iyi a kù mà mɔkɔ. Nɔ i jɔ̀ Hegai inɛmɔkɔ bantãm woo degbe inaabo ŋau ku maa cɔ ŋa si inɔ kpasɛ̃ bi kuwai inaabo ŋa iyi à jɛ aboɛ ŋa awɔ ilaalu. Nŋui á maa na ŋa mii ku ce booda ŋa.

⁴ Nɔ mudɛ̃ɛ iyi ì bi ilaalu, nŋui á jɛ nsũi Vasiti. Ŋɔi ideu í dɔ̃a ilaaluu si nɔ í ce bɛɛbɛ.

⁵ Wee Zuifu gɔ í wa Suze bɛ à ya kpoo Maadosee. Amai Yaiii nɔ wa jɛ tɔkui Simei, Simei mɔ tɔkui Kisii si dimii Bɛnzamɛɛ.

⁶ Nŋu mɔ í wa si inɔi inɛ ŋa iyi Nebukanɛsaa ilaalui Babilɔniu í mu wa hai Zeruzalɛmu si waati iyi í mu Yekonia ilaalui Zudaau.

⁷ Nŋui wa mu Hadasa iyi à ya kpe Ɛsitɛɛu. Amai asiɛi wa jɛ, domi iyeò baaɛ ŋa a kù wɛɛ, nɔ í soo ku jɛ bɛi amai nŋu takaɛ. Nɔ í jɛ ama inaabo gɔ iyi í sĩa ntɔ ntɔ.

⁸ Waati iyi à fangaa woodai ilaaluu bii fei, mudɛ̃ɛ nkpɔ nkpɔi í tɔtɔɔ Suze. Ŋɔi à so Ɛsitɛɛ mɔ à dasi inɔ nŋa bɛ si inɔ kpasɛ̃i ilaaluu, nɔ Hegai wa cɔ ŋa.

⁹ Ŋɔi Ɛsitɛɛ í sĩaa Hegai si nɔ í ceaa didɔ̃. Ŋɔi í naa mii baa yooma fei iyi á jɔ̀ ku maa maaju, nɔ í ya maa naa sɔnda jiida. Nɔ si inɔ kpasɛ̃i ilaaluu í cicaa ama mudɛ̃ɛ mɛɛje ŋa iyi aa ya maa ceaa icɛ, nɔ í dasiɛ inɔ ile iyi í sĩa í re si inɔ kpasɛ̃ bii inaabo ŋa à wau.

¹⁰ Ɛsitɛɛ kù sɔ̃ inɛ kãma iyi nŋuu Zuifui domi Maadosee í ni ku maà fɔ.

¹¹ Nɔ ajɔ fei Maadosee í ya koo maa dabiii bi anu koofai bantuma bii inaabo ŋau à wa ku maa cɔ baanii Ɛsitɛɛ, nɔ ku maa cɔ bɛi à waa ceaa.

¹² Mudɛ̃ɛ fei, cukpa maateejii í nɛ ku ce, bɛi à jilɛa inaabo ŋau. Waati bɛɛbɛ boodai aa ce cukpa mɛɛfa sinteu do ikpoi miru, cukpa mɛɛfa iyi ihɔ̃ mɔ do tuae do mii mmu ŋa iyi inaabo ŋa à ya ceò booda. Si anyi nŋu, aŋa fei aa bɔ bi ilaaluui akã akã.

¹³ Mudɛ̃ɛ iyi í dede wa bɔ bi ilaaluu, mii iyi í bi fei à ya naai.

¹⁴ Alɛ, mudɛ̃ɛ akãi í ya bɔ bi ilaaluu, nɔ bii iju í má daakɔ à ya gbãa à bɔòɛ si ile minjisiaui, nɔ Sasigazi inɛmɔkɔ bantãm woo degbe aboi ilaalu ŋaui í ya maa cɔ ŋa. A kaa nyi bi ilaaluu má í gbe bii ilaaluu takaɛ í bi ku bɛi ku kpe ŋa do iri nŋa.

¹⁵ Waati í to si bii Ɛsitɛɛ amai Abihaili nŋu iyi í jɛ asiii Maadosee á bɔ bi ilaaluu. Nɔ kù tɔɔ nkãma, í gbe mii iyi Hegai woo degbe inaabo ŋau í naa. Ɛsitɛɛ í ba didɔ̃ bi inɛ ŋa iyi à waa yɔɔ fei.

¹⁶ À bɔò Ɛsitɛɛ kpasɛ̃i ilaaluu si cukpa mɛɛwasia iyi à ya kpe Tebɛti si adɔ̃ mɛɛjesiai bomma ku jɛɛ.

¹⁷ Nɔ ilaaluu í bi Ɛsitɛɛ í re inaabo ŋa iyi à gbe fei nɔ í ba didɔ̃ do bɛɛrɛ si wajui ilaaluu í re mudɛ̃ɛ ŋa iyi à gbe fei, nɔ í daa si fulai bommau si iriɛ, nɔ í coo ilaalu si agbɛi Vasiti.

¹⁸ Ŋɔi í nya jingau nla nla na iriɛ nɔ í kpe woo ce icɛɛ ŋa do akawe nla ŋau fei, nɔ í mua inɛ ŋa kusĩmi ajɔ nŋu, nɔ í cea inɛ ŋa amua ŋa do inɔ akã.

¹⁹ Ŋɔi à sisi à waa tɔtɔɔ mudɛ̃ɛ ŋa má. Waati bɛɛbɛ Maadosee wa ce icɛi bi ilaaluu.

²⁰ Ɛsitɛɛ kù sɔ̃ inɛ kãma iyi nŋu í jɛ Zuifu domi Maadosee í ni ku maà fɔ. Bɛɛbɛ mɔi í jirimaɛ wa koo bɛi waati iyi í wa si awɔɛ.

Maadosee í faaba ilaalu

²¹ Ajɔ nŋu gɔ Maadosee wa ce icɛ kpasɛ̃i ilaalu. Ŋɔi Bigitani do Terɛsi inɛmɔkɔ bantãm minji gɔ ŋa iyi à jɛ woo degbe andɛ koofai inɔ ile ŋau, idɔ nŋa í kɔ̃ si ilaaluu, nɔ à waa busi njɛ bɛi aa ce a kpaa.

²² Ŋɔi Maadosee í gbɔ ideu nɔ í koo í sɔ̃ Ɛsitɛɛ, ŋɔi Ɛsitɛɛ mɔ í sisia ilaaluu ideu í ni Maadoseei í sɔ̃ nŋu.

²³ Ŋɔi à wusɛ ideu nɔ à ba wee ntɔi. Nɔ à gbã inɛ minji ŋau à koo à bagãm ŋa. Nɔ à kɔ ideu si waatii ilaaluu si tiai ide ŋa iyi í ce si bommau.