Ɛsitɛɛ 1 - Bibeli do fee

Jingaui ilaalu Asuerusi

¹ Faaji iyi à waa ceu ihɛ̃ í cei si waatii ilaalu Asuerusi, nŋu iyi wa jɛ ilaalui ilɛ cifa do mɛɛje, hai Ɛndi hee ku bɔ Etiopi.

^2-3 Si adɔ̃ mɛɛtasiai bomma ku jɛɛ, si bɛi wa buba si kitãi bommaɛ si ilui Suze ilu nlau, í cea ilaalu do akawe nlaɛ ŋa jingau. Inɛ ngboi soogei ilɛi Pɛɛsi ŋa do ilɛi Mɛɛdi ŋa do ilaalu ŋa, do ilu ilɛ ŋau, aŋa fei à tɔtɔɔ bi tɛɛ bɛ.

⁴ Nɔ wa nyisi inɛ ŋa bɛi kulai amanii bommaɛ í to do bɛi bommau í nɛ bɛɛrɛ. Jingauu í kpɛ ntɔ ntɔ, à ce jingauui ajɔ cĩɔ do cinɛ.

⁵ Iyi waatii inɛ nŋu í lɔ, ŋɔi ilaaluu í cea inɛi ilui Suze fei jingau, hai ilu fia hee do ilu are ŋa fei. Jingauu azuma akãi à jɔɔ si bantumai lamboi kpasɛ̃ɛ.

⁶ Sɔbe ŋa iyi à gbe do dimii kuta kusĩa gɔ ŋai à wa bɛ, si bii à dĩ isɔ fũfũ gɔ ŋa iyi à ce bɛi lɛlɛawɔ. Si isɔ ŋaui à kɔa acɔ fũfũ jiida ŋa do nkpa, à dĩ ŋa do ikũ fũfũ do nkpa à ce boodaɛ. À jilɛ kitãi wura sisɔ ŋa, do kitãi isɔ fũfũ sisɔ ŋa si ilɛ iyi à tɛsi dimii kuta kusĩa gɔ ŋa, gɔgɔ ŋa à jɛ nkpa, gɔgɔ ŋa mɔ fũfũ do dũdũ do fũfũ fɛɛ fɛɛ.

⁷ Nɔ mii iyi inɛ ŋa à waa mɔ fei do kɔɔfui wura dimi ikã ikãi à ya mɔò. Nɔ wee atɛ̃ vɛ̃ɛ wa kɔ̃i si kpasɛ̃i ilaaluu nɔ í wasi ku na inɛ ŋa nkpɔ nkpɔ do inɔ akã.

⁸ Amma a kù waa tilasi inɛ kãma ku mɔ, domi ilaaluu í sɔ̃ inɛi kpasɛ̃ɛ ŋa fei í ni a na inɛ fei zaka bɛi idɔɛ í bi.

⁹ Nɔ Vasiti aboi ilaaluu mɔ í nya jingau iyi í jɛ ti inaabo ŋa si inɔ kpasɛ̃i mɔkɔu.

Vasiti í donda mɔkɔɛ

¹⁰ Si ajɔ mɛɛjesiai jingauu ilaaluu í wɛɛò inɔ didɔ̃ na atɛ̃ vɛ̃ɛu iyi í mɔ. Ŋɔi í kpe inɛmɔkɔ bantãm mɛɛje ŋa iyi à jɛ woo ce icɛɛ waati kãma feiu. Iri nŋa wee. Mehumaa do Bizitaa do Haabona do Bigitaa do Abaguta do Zetaa do Kaakasi,

¹¹ nɔ í sɔ̃ ŋa í ni a gbã Vasiti aboi nŋu wa do fulai bommaɛ a naaɛ wa si wajui nŋu ku ba ku nyisi akawe nla ŋau do inɛ ŋa iyi à wa bɛ fei zaka bɛi kusĩaɛ í to, domi abou í sĩai ntɔ ntɔ.

¹² Inɛ ŋau à koo à sɔ̃ Vasiti bɛi ilaaluu í dɔ̃, amma í kɔ̀ ku koo. Ŋɔi idɔi ilaaluu í kɔ̃ ntɔ ntɔ.

¹³ Ŋɔi ilaaluu í sɔ̃ ilu bisi ŋa, aŋa iyi à nɛ kumài waati ŋau. Bɛɛbɛi ilaaluu í ya ce wũaɛ ŋa si wajui inɛ ŋa iyi à mà wooda ŋa do asaiya ŋa.

¹⁴ Si inɔ nŋa, inɛ mɛɛje ŋa iyi à ya wa bi ilaalu waati kãma feiu à tɔtɔɔ. Iri nŋa wee. Kaasena do Setaa do Adimata do Taasi do Merɛsi do Maasena do Memukani, aŋai à jɛ akawe nla mɛɛjei ilɛi Pɛɛsi do Mɛɛdi. Ilaaluu wa naanɛ ŋa nɔ icɛ nŋa í nɛ gbugbã si bommau í re.

¹⁵ Nɔ ilaaluu í sɔ̃ ŋa í ni, amu ilaalu ǹ na woo ce icɛm ŋa wooda iyi aa koo a sɔ̃ Vasiti, nɔ í kɔ̀ kù jirima idem. Si wooda, ijuukpã yoomai aa nyisiɛ.

¹⁶ Ŋɔi Memukani í sɔ̃ ilaaluu do akawe nla ŋau í ni, ilaalu, Vasiti í rarai, nɔ kù jɛ baa si wajui awɔ ilaalu Asuerusi awɔ akã, amma hee do si wajui awa akaweɛ ŋau feii, do inɛ ŋa iyi à wa si ilɛ ikã ikãi bommaɛ fei.

¹⁷ Awɔ ilaalu, kucei aboɛu á na ku to si inaabo ŋa fei nɔ ku jɔ̀ a donda mɔkɔ nŋa ŋa. Aa na a na ara nŋa ntɔ a maa ni, ilaalu Asuerusi í ni a naaò Vasiti wa si wajui nŋu nɔ í kɔ̀ ku koo.

¹⁸ Hai nnyi aboi akawe nlai ilɛi Pɛɛsi do ilɛi Mɛɛdi ŋau aa gbɔ bɛi awɔ ilaalu aboɛ í ce, nɔ aa na a maa ba bɛi aa maa sɔ̃ mɔkɔ nŋa ŋa nɔ a donda ŋa. Inaabo ŋa aa na a maa dede idɔɔkɔ̃i mɔkɔ nŋa ŋa.

¹⁹ Awɔ ilaalu, bii ì yɔɔ iyi í sĩa, na wooda iyi kaa nɛ ku kpaasi Vasiti ku maà naa bi tɛɛ má, nɔ i jɔ̀ a fɔ woodau si bantuma, nɔ a kɔɔ si woodai inɛi Pɛɛsi ŋa do inɛi Mɛɛdi ŋa. Nɔ i cica inaabo gɔ iyi í nɛ jirima í re i naa bommau.

²⁰ Bii ide iyi ì fɔu í fangaa bii fei si bomma nlaɛu, inaabo fei á sũa mɔkɔɛ iri ilɛ hai mɔkɔ ilu fia hee do ilu are ŋa fei.

²¹ Ŋɔi ide iyi Memukani í fɔu í dɔ̃a aŋa fei si, nɔ ilaaluu í ce bɛɛbɛ.

²² Í jɔ̀ à kɔ tiau do fee ikã ikã iyi inɛ ŋa à ya fɔ si ilɛu fei. Si tiau í ni, inɛmɔkɔi í sĩa ku jɛ inɛ ngboi kpasɛ̃ɛ. Nɔ í samba tiau si ilɛ ikã ikã iyi í wa si bommaɛ.