Efɛɛzu 6 - Bibeli do fee

Amu ŋa do baa nŋa ŋa

¹ Iŋɛ amu ŋa, i jirima inɛ ŋa iyi à waa mu ŋɛ si bɛi Ilaaɔ̃ í bi, domi bɛɛbɛi í sĩa.

² Wooda sinte iyi Ilaaɔ̃ í ceò kuwã wee. I jirima iyeò baa nŋɛ ŋa

³ ku ba i nɛ inɔ didɔ̃ ŋa nɔ hunde nŋɛ ku sɔ si ilɛ.

⁴ Iŋɛ baa ŋa, i maà ya kɔ̃ idɔi ama nŋɛ ŋa, amma i bi ŋa, i dasi ŋa iju ŋa i kɔ ŋa si idei Aɔ̃ Lafɛ̃ɛ ŋa.

Aru do lafɛ̃ɛɛ

⁵ Iŋɛ aru ŋa, i jirima lafɛ̃ɛ nŋɛ ŋa si andunyau ihɛ̃ do bɛɛrɛ do kuyaya, ku maà jɛ do muafiti, nɔ kú yɛ bɛi Kirisii ì waa cea ŋa.

⁶ Ku maà jɛ bii à leekĩ à waa cɔ ŋɛ nŋu akã. Bii í jɛ waati iyi à waa cɔ ŋɛ nŋu akãi, í yɛ bɛi amanɛ ŋai ì waa cea ŋa ku ba ku dɔ̃ nŋa si. Amma i jɔ̀ i ce idɔɔbii Ilaaɔ̃ do idɔ nŋɛ fei bɛi arui Kirisi ŋa.

⁷ Icɛ iyi à dasi ŋɛ, i jɔ̀ i coo do himma ŋa, nɔ kú yɛ bɛi Ilaaɔ̃i ì waa cea ŋa, ku maà ti ku jɛ amanɛ nŋu akã.

⁸ Ì mà sãa sãa ŋa iyi Ilaaɔ̃ á sãa inɛ fei ribai icɛ jiida iyi í ce, baa bii aru, walakɔ inɛ iyi í nɛ araɛi.

⁹ Iŋɛ lafɛ̃ɛ ŋa mɔ, i cea aru nŋɛ ŋa bɛɛbɛ, i maà ya ta nŋa gbugbã. I mà ŋa iyi iŋɛò ŋa fei Lafɛ̃ɛ akãi ì nɛ lele bii inɛ gɔ kù re inɛ gɔ.

Jĩnɛi igũi woo dasi Jesu naanɛ

¹⁰ Ide iyi í gbe ǹ wa n bi n sɔ̃ ŋɛ wee. Si anu akã nŋɛ do Lafɛ̃ɛ i jɔ̀ gbugbã nlaɛ ku mua iŋɛ mɔ gbugbã ŋa.

¹¹ I dĩ jĩnɛi igũ ŋa iyi Ilaaɔ̃ wa mu nŋɛ fei, ku ba i yɔkɔ i leekĩ dim dim i kɔ̀siò kookoosu ikã ikãi Seetam ŋa,

¹² domi kù jɛ do amanɛ ŋai à waa ja. À waa jai do ilu iri laalɔi lele ŋa do ilu yiiko ŋa, do gbugbãi andunyai ilu kuku ŋau ihɛ̃, do inɛi inɔɔko woo ce icɛi Seetam ŋa.

¹³ Na nŋu, i so jĩnɛi igũi Ilaaɔ̃ fei i dĩ ŋa. Si bɛɛbɛ, bii ajɔi wahala í na í naa, aa yɔkɔ i kɔò ara nŋɛ si wajui Seetam mbɛɛ nŋɛu. Nɔ bii ì ce igũ ì tã ŋa, i leekĩ dim dim ŋa hee kɔɔ.

¹⁴ Na nŋu, i dede i leekĩ dim dim ŋa. I jɔ̀ ntɔ ku wɛɛ nŋɛ bɛi santiiki iyi sooge í ya dĩò gbankiliɛ, nɔ i jɔ̀ dee dee ku jɛ ku wɛɛ nŋɛ má bɛi ibɔi isɔ.

¹⁵ I jɔ̀ himmai laabaau jiida ku sisi ku wɛɛ nŋɛ bɛi baata nŋɛ. Laabaau jiidaui á jɔ̀ inɛ ŋa a dɔ̃ do Ilaaɔ̃.

¹⁶ Nɔ iyi í re mɔm, i jɔ̀ naanɛ ku dasi ku wɛɛ nŋɛ jiida jiida bɛi tɛli iyi á ganji afa ku nɛ ina iyi Seetam mbɛɛ á ta wau ku to wa si ŋɛ.

¹⁷ I gba faabau bɛi fulai isɔ, nɔ idei Ilaaɔ̃ mɔ i gbaa ŋa bɛi taakubai Hundei Ilaaɔ̃.

¹⁸ Waati kãma fei i ya ce kutɔɔ ŋa nɔ i ya maa tɔɔ sobii Ilaaɔ̃ ŋa. I wɔ njoo nɔ i na ara nŋɛ si idei kutɔɔu do gbugbãi Hundei Ilaaɔ̃ ŋa, nɔ i ya ce kutɔɔ na irii woo dasi naanɛ fei ŋa.

¹⁹ Nɔ i cea amu mɔ kutɔɔ ŋa ku ba bii ǹ cĩ gɛlɛ, n ya n ba ide iyi an fɔ nɔ n nɛ wɔɔkɔ n sisiò idei laabaau jiida iyi wa singau wo.

²⁰ Na irii ideui ǹ jɛ woo bɛi Ilaaɔ̃ baa do iyi ǹ wa piisɔ̃ɔ si nsɛi. Na nŋu, i ce kutɔɔ ku ba n yɔkɔ n sisi ideu do wɔɔkɔ bɛi á sĩa.

Fɔɔi sukudɔ̃

²¹ Tisiki baakɔɔ nwa, woo ce icɛ ilu naanɛ si kpãai icɛi Lafɛ̃ɛ, á sisi nŋɛ laabaaum fei ku ba i mà bɛi ǹ wɛɛò ŋa do mii iyi ǹ wa n ce.

²² Na ŋɔi í ce ǹ bɔɔ wa si ŋɛ ku naa ku sɔ̃ ŋɛ bɛi à wɛɛò ku ba ku tũ idɔ nŋɛ.

²³ Nɔ Ilaaɔ̃ Baaba do Lafɛ̃ɛ Jesu Kirisi a mua kpaasi woo dasi Jesu naanɛ ŋa fei laakai ku sũ do kubi do naanɛ jiida.

²⁴ Nɔ didɔ̃i Ilaaɔ̃ ku wɛɛ do inɛ ŋa iyi à bi Lafɛ̃ɛ nwa Jesu Kirisi fei nɔ kubi nŋa ci ya kpaasi.