Efɛɛzu 5 - Bibeli do fee

Kuwɛɛ si inya kumá

¹ Na nŋu, si na iyi í jɔ̀ ì jɛ amu ŋa iyi Ilaaɔ̃ í bi ŋa, i ce bɛi nŋu takaɛ.

² I jɔ̀ kucei kuwɛɛ nŋɛ kú nyisi kubi bɛi Kirisi í bi wa, nɔ í na kuwɛɛɛ na iri nwa. Kuwɛɛɛ iyi í nau nŋui í jɛ kuwee jiida iyi inunuɛ í dɔ̃a Ilaaɔ̃ si.

³ Iŋɛ ti Ilaaɔ̃i í jɛ ŋa. Na nŋu, i maà ya ce baa ngɔgɔ iyi á jɔ̀ inɛ ŋa a sɔ iri nŋɛ a ni ì tɔtɔɔ sɛ̃ɛ hai nɛ yaase ŋa walakɔ a ni ì ce daa laalɔ ŋa walakɔ binɛ.

⁴ Nɔ i maà ya jɔ̀ idei anyɔ walakɔ ide hai nɛ yaase walakɔ ide nfe nfe ku fita hai si gɛlɛ nŋɛ, domi ide dimi bɛɛbɛ kù jɔò ŋɛ, amma i jɔ̀ ide nŋɛ ku ya jɛ Ilaaɔ̃ ku saabu.

⁵ I jɔ̀ i mà ŋa kãm kãm iyi woo tɔtɔɔ sɛ̃ɛ hai nɛ yaase do ilu daa sãmi ŋa, kãma nŋa kù nɛ ikpɛ̃ si bommai Ilaaɔ̃ do ti Kirisi. Bɛɛbɛ mɔi hee do ilu binɛ ŋa fei, kãma nŋa kù nɛ ikpɛ̃ si bommai Ilaaɔ̃ do ti Kirisi domi binɛ í yɛi bɛi iwɛ̃ ku tɔɔ.

⁶ I maà ya jɔ̀ inɛ gɔ ku dĩ iju nŋɛ do ide nfe, domi na nŋu bɛi í jɔ̀ idɔɔkɔ̃i Ilaaɔ̃ wa naa si irii inɛ ŋa iyi a kù waa jirimaɛ.

⁷ Na nŋu, i maà ya jɔ̀ ide gɔ ku tɔtɔɔ ŋɛ do amanɛ dimi bɛɛbɛ ŋa.

⁸ Iŋɛ taka nŋɛ, si ilu kukui ì wa ŋa wo, amma nsɛi, ì wa si inya kumá ŋa na anu akã nŋɛ do Lafɛ̃ɛ. Na nŋu, i jɔ̀ isɛɛnɛ nŋɛ ku jɔ ti inɛ ŋa iyi à waa nɛ si inya kumá,

⁹ domi bii à waa nɛ si inya kumá kuce iyi aa ka ce nŋui í jɛ daa didɔ̃ baa yooma fei do dee dee ku jɛ do ntɔ ku fɔ.

¹⁰ I ce kookaai i mà mii iyi á dɔ̃a Lafɛ̃ɛ si.

¹¹ I maà dasi ara nŋɛ si kookoosu laalɔ iyi amanɛ ŋa à waa ce si ilu kuku. Amma kookoosu dimi bɛɛbɛ i ya fɔɔ inɛ ŋa a gbɔ ŋa.

¹² Anyɔ nla nla mɔm nii bii à fɔ mii iyi inɛ ŋau à waa ce si asii.

¹³ Amma kookoosuu bɛ bii à fɔɔ á fitai inɛ ŋa a yɔɔ sãa sãa.

¹⁴ Nɔ mii iyi í fita gbugbãa fei í ya mái. Na ŋɔi í ce à ni, awɔ iyi ì waa sĩ njoo, jĩ. Dede hai si inɔi iku ŋa, nɔ Kirisi ku máɛ inya.

¹⁵ Na nŋu, i ce laakaii isɛɛnɛ nŋɛ. I maà jɔ̀ i maa nɛ bɛi inɛ ŋa iyi a ci ya lasabu, amma i maa nɛ do laakai ŋa.

¹⁶ Waati iyi ì nɛ ŋa, i ceò icɛ, domi waatiu ihɛ̃ bɛi waati laalɔi.

¹⁷ Na nŋu, i maà yɛ bɛi inɛ ŋa iyi a ci ya lasabu, amma i hanya ŋa ku ba i mà mii iyi Aɔ̃ Lafɛ̃ɛ í bi i ce ŋa.

¹⁸ I maà ya jɔ̀ atɛ̃ ku kpa ŋɛ, domi si bɛi daa bɛɛtɛkɛ fei í wa. Amma i jɔ̀ i kɔ̃ò Hundei Ilaaɔ̃ ŋa.

¹⁹ I jɔ̀ saabu do iri ku kɔ̃ ku ya wa si faaji nŋɛ, i ya kɔ̃ iri do irii Ilaaɔ̃, i cũu do idɔ nŋɛ fei.

²⁰ I ya maa saabu Ilaaɔ̃ Baaba waati kãma fei ŋa si mii fei do irii Lafɛ̃ɛ nwa Jesu Kirisi.

Abo do mɔkɔ

²¹ Iŋɛ iyi ì mà bɛɛrɛi Kirisi, i ya sũa njɛ iri ilɛ ŋa.

²² Iŋɛ inaabo ŋa i sũa mɔkɔ nŋɛ ŋa iri ilɛ bɛi aa cea Lafɛ̃ɛ ŋa,

²³ domi mɔkɔi í jɛ inɛ ngboi aboɛ, bɛi Kirisi mɔ í jɛ inɛ ngboi igbɛɛ. Igbɛui í jɛ arai Kirisi, nɔ Kirisi mɔi í jɛ woo faabaɛ.

²⁴ Nɔ si bɛi igbɛu í ya sũa Kirisi iri ilɛ, bɛɛbɛ mɔi inaabo ŋa à nɛ a sũa mɔkɔ nŋa ŋa iri ilɛ si mii fei.

²⁵ Nɔ iŋɛ mɔkɔ ŋau i bi abo nŋɛ ŋa bɛi Kirisi í bi inɛi igbɛɛ ŋa, nɔ í na kuwɛɛɛ na iri nŋa.

²⁶ Í nya ŋa ikã nɔ í wɛ ŋa í jɔ̀ à má na saabui ideɛ.

²⁷ Í bi igbɛu ku naa si wajuɛ do kusĩaɛ fei, ku maà ti ku nɛ riisi gɔ, nɔ batai araɛ ku maà yuguu, nɔ ku maà nɛ mii mmu dimi bɛɛbɛ gɔ ŋa má, amma í bi ku jɛ dee deei, ku maà nɛ taale kãma.

²⁸ Bɛɛbɛi í jɔ mɔkɔ ŋa a bi abo nŋa ŋa bɛi à bi ara nŋa. Inɛ iyi í bi aboɛ í bi araɛi.

²⁹ Inɛ gɔ kù nɔ kù wɛɛ iyi í cé araɛ, amma í ya maa wòoi nɔ ku maa gbɔaa bɛi Kirisi wa cea igbɛɛ.

³⁰ Igbɛɛu nŋui í jɛ araɛ nɔ awa fei à yɛi bɛi ikɔ̃ ikɔ̃i araɛu.

³¹ Kukɔi idei Ilaaɔ̃ wa fɔ í ni, na nŋu, mɔkɔ á jɔ̀ iyeò baaɛi, nɔ ku wɛɛ do aboɛ nɔ aŋa minji fei a baa a jɛ ara akã.

³² Asiiu ihɛ̃ ide nla nlai, amma idei Kirisi do igbɛɛi ǹ wa n fãa.

³³ Na nŋu, mɔkɔ fei ku bi aboɛ bɛi í bi araɛ, nɔ abo fei ku jirima mɔkɔɛ.