Efɛɛzu 4 - Bibeli do fee

Anu akã iyi à nɛ awa iyi à jɛ arai Kirisi*

¹ Na nŋu, amu iyi ǹ wa piisɔ̃ɔ si na iyi í jɔ̀ ǹ wa n ce icɛi Lafɛ̃ɛ, ǹ wa n tɔɔ ŋɛ i maa nɛ dee dee si bɛi í jɔ inɛ ŋa iyi Ilaaɔ̃ í kpe à ya nɛ.

² I ya maa nɛ do ara ku kaye ŋa, do daa didɔ̃ do temua, nɔ i ya maa mu njɛ ŋa do kubi.

³ I ce kookaai i ya mu anu akã iyi Hundei Ilaaɔ̃ wa mu nŋɛ na saabui laakai ku sũ iyi í tɔtɔɔ ŋɛ.

⁴ Ara akãi í wɛɛ, Hunde akã mɔi í wɛɛ, nɔ kpãa ku cɔ akã mɔi í wɛɛ si bii Ilaaɔ̃ í kpe ŋɛ.

⁵ Lafɛ̃ɛ akãi í wɛɛ, naanɛ ku dasi akã mɔi í wɛɛ, nɔ inyi ku dasi akãi í wɛɛ.

⁶ Ilaaɔ̃ akãi í wɛɛ iyi í jɛ Baai inɛ fei. Nŋui í jɛ ilaalui mii fei, nŋui í wa bi inɛ fei, nɔ í wa si inɛ fei.

⁷ Amma awa fei à ba amua nwa si bɛi Kirisi í mu nwa.

⁸ Na nŋu, kukɔi idei Ilaaɔ̃ wa fɔ í ni, waati iyi í gũ lele í jɛ mbɛɛɛ ŋa igũ í mu ŋa aru, nɔ í cea inɛ ŋa amua ŋa.

⁹ To, bii à ni í gũ lele, iyi bɛ wa nyisi iyi í tako í kita í bɔ hee lɛlɛi ilɛi.

¹⁰ Inɛ iyi í kita í bɔ hee lɛlɛi ilɛu nɔ í nyi í gũ leleu má inɛ akãui, ku ba ku jɔ̀ mii fei ku kɔ̃ dee dee.

¹¹ Amua ŋa iyi í cea inɛ ŋa wee. Í cica inɛ gɔ ŋa à jɛ woo bɛ ŋa, inɛ gɔ ŋa mɔ walii ŋa, inɛ gɔ ŋa mɔ woo sisi laabaau jiida ŋa, inɛ gɔ ŋa mɔ woo degbe inɛi igbɛi Jesu ŋa, inɛ gɔ ŋa mɔ woo kɔ inɛ ŋa si cio.

¹² Bɛɛbɛi í ce ku ba ku ceò sɔɔlui woo dasi Jesu naanɛ ŋa si icɛɛ, ku ba ku kɔ̃ɔsi gbugbãi arai Kirisi.

¹³ Nɔ bɛɛbɛ mɔi awa fei aa ka ce anu akã si naanɛ ku dasiu nɔ ka mà Amai Ilaaɔ̃, nɔ ka jɛ inɛ ngbo ka tóo alái Kirisi.

¹⁴ Do yaase bɛɛbɛi a kaa ka jɛ bɛi amu ŋa má, hee cio ikã ikã ku maa tale wa ihɛ̃ walakɔ ihɔ̃ bɛi fufu í ya maa tale akɔi inyi bii fei. Nɔ inɛ ŋa a kaa dĩ iju nwa má hee má jɛ a wa inyii itĩ nwa do bisi laalɔ nŋa.

¹⁵ Amma bii à waa sisi ntɔu do kubi aa ka la si mii fei ka tóo alái Kirisi iyi í jɛ iriu.

¹⁶ Siɛi awa fei à waa kã bɛi ikɔ̃i ara, nɔ arau fei í másiɛ do ikɔ̃ ikɔ̃ɛ. Nsɛi, bii ikɔ̃ fei wa ce icɛ si bɛi í jɔ, arau fei á lai ku maa kɔ̃ɔsi na saabui kubi.

Kuwɛɛ titɔ̃ si Kirisi*

¹⁷ Ide iyi ǹ wa n sɔ̃ ŋɛ do irii Lafɛ̃ɛ wee. I maà jɔ̀ i ya maa nɛ má bɛi hai dasi Jesu naanɛ ŋa iyi à waa too lasabu nfe nfe nŋa.

¹⁸ A kù nɛ laakai jiida. À lele idɔ nŋa nɔ a kù mà nkãma. Nŋui í jɔ̀ a kù nɛ ikpɛ̃ si kuwɛɛ iyi Ilaaɔ̃ wa mu nwa.

¹⁹ A kù nɛ anyɔ gɔ má, à na ara nŋa mam mam si dulum a ceò daa laalɔ dimi ikã ikã fei do binɛ.

²⁰ Amma iŋɛ, kù jɛ bɛɛbɛi ì màò Jesu Kirisi ŋa.

²¹ Ǹ nɔ ǹ mà kãm kãm iyi ì gbɔ ideɛ ŋa, nɔ à kɔ ŋɛ si ntɔ iyi í wa siɛ.

²² Na nŋu, i jɔ̀ daa nwo nŋɛ ŋa iyi wa nɛ̀ò kuwɛɛ nŋɛ wo, domi kubii daa nwo nŋɛ ŋaui wa dĩ iju nŋɛ nɔ wa bɔò ŋɛ nfe ku ce.

²³ I jɔ̀ i nɛ idɔ titɔ̃ do lasabu titɔ̃ mam mam ŋa,

²⁴ nɔ i jɔ̀ i nɛ daa titɔ̃ ŋa iyi í jɔ ti Ilaaɔ̃. Daa titɔ̃u, aa yɔɔi si dee dee ku jɛ nŋɛ do kuwɛɛ hai nɛ dulum. Iyi bɛ hai bi ntɔi wa naa.

²⁵ Na nŋu, i maà ya sɔ ibo má ŋa. I jɔ̀ inɛ fei ku sɔ̃ kpaasiɛ ntɔ, domi à jɛ ikɔ̃ ikã ikãi ara akã.

²⁶ Baa bii idɔ nŋɛ í kɔ̃, i maà ya ce dulum ŋa. I maà ya jɔ̀ idɔɔkɔ̃u ku wɛɛ nŋɛ hee inunu koo lɔò.

²⁷ I maà jɔ̀ Seetam ku ba bi ku dasi isɛ si ŋɛ.

²⁸ Inɛ iyi í ya ce ile wo, ku maà ce ile má, amma ku ya ce icɛ do awɔɛ. Bɛɛbɛi á ba mii jiida ŋa iyi á sobiò ilu are ŋa.

²⁹ Nɔ i maà ya jɔ̀ ide laalɔ kãma ku fita hai si gɛlɛ nŋɛ. Amma i ya fɔ ide jiida iyi á mua inɛ ŋa gbugbã si naanɛ ku dasi nɔ ku sobi ŋa si bukaata nŋa nɔ inɛ ŋa iyi à waa gbɔɔ ku jɛ nŋa aranfãani jiida.

³⁰ I maà fɔ inɔi Hundei Ilaaɔ̃ ŋa, domi Hundeu bɛi í jɛ sɛɛdai Ilaaɔ̃ si ŋɛ hee koo toò ajɔ iyi Ilaaɔ̃ á yá inɛɛ ŋa mam mam.

³¹ I nyɔ daa kuro nŋɛ fei do idɔɔkɔ̃ yaamɔ do idɔɔkɔ̃ fei. I maà ya gbagba si njɛ, nɔ i maà ya sɔ irii njɛ ŋa. I jɔ̀ inɔ sãmi baa yooma fei.

³² I cea njɛ didɔ̃ ŋa, nɔ i ya nɛ araarei njɛ ŋa, nɔ i ya kpaa njɛ idei kurara ŋa bɛi Ilaaɔ̃ í kpa idei dulum dii iŋɛ mɔ na irii Kirisi.