Efɛɛzu 2 - Bibeli do fee

Hai si iku à bɔ si kuwɛɛ

¹ Tako wo ì yɛ ŋai bɛi iku ŋa na irii kurara nŋɛ do dulum du ŋɛ.

² Waati bɛɛbɛ, kpãa laalɔi inɛi andunya ŋai ì ya maa too si ŋa, nɔ ì ya maa jirima Seetam, ilaalui ilu gbugbãi lele ŋa. Ilaaluu nŋui í jɛ hunde iyi wa ce icɛ hee nsɛi si idɔi inɛ ŋa iyi a kù waa jirima idei Ilaaɔ̃.

³ Ntɔi, awa fei à tako à yɛi wo bɛi aŋa mɔ. Binɛ nwai wa nɛò wa, nɔ à waa ce mii iyi awa taka nwa à bi do iyi à waa lasabu. À yɛi wo bɛi inɛi andunya ŋa iyi à gbe fei iyi aa na a yɛ idɔɔkɔ̃i Ilaaɔ̃.

⁴ Amma araarei Ilaaɔ̃ í la. Na kubi nlaɛ iyi í bi wa,

⁵ hai waati iyi kurara nwa í ce wa bɛi iku ŋa, Ilaaɔ̃ í mu nwa kuwɛɛ do Kirisi ajɔ. Na didɔ̃ɛi ì baò faaba ŋa.

⁶ Si anu akã nwa do Kirisi, Ilaaɔ̃ í jĩ wa hai si balɛ ka jɛ bomma lele do Jesu Kirisi ajɔ.

⁷ Í ce bɛɛbɛi ku ba ku nyisi didɔ̃ nla hai nɛ kɔɔɛ si jiida ku jɛɛ iyi í ce nwa do saabui Jesu Kirisi hee do ajɔ fei.

⁸ Na didɔ̃i Ilaaɔ̃i ì ba faaba ŋa do saabui naanɛ ku dasi. Kù jɛ na himma nŋɛ, amuai Ilaaɔ̃i.

⁹ Kù jɛ ribai icɛ nŋɛ. Na nŋu, inɛ gɔ kaa yɔkɔ ku tɔɔ fufu.

¹⁰ Awa icɛi awɔi Ilaaɔ̃i à jɛ. Í taka wai si anu akã nwa do Jesu Kirisi ka ceò icɛ jiida iyi í ce sɔɔluɛ hai ku kpɛ.

Dimi fei í jɛ akã si Kirisi*

¹¹ Iŋɛ dimi mmu ŋa, i ye gigi ŋa iyi inɛ ŋa iyi à ya ce bango ŋau à ya maa kpe ŋɛ hai ce bango ŋa wo.

¹² Waati bɛɛbɛ ì jĩò Kirisi ŋa wo nɔ ì jɛ isɛ mmu bi inɛi Izirɛli ŋa. I kù nɛ baa nŋɛ si akabuu iyi Ilaaɔ̃ í wãò inɛɛ ŋa. Ì wa si andunya ihɛ̃ i kù waa cɔò kpãai nkãma ŋa, nɔ i kù wɛɛa Ilaaɔ̃ ŋa.

¹³ Amma nsɛi iyi ì nɛ anu akã do Jesu Kirisi ŋa, iŋɛ iyi ì tako ì wa í jĩ ŋa, wee nsɛi ì ce amɛɛ do Ilaaɔ̃ ŋa do saabui njɛi Kirisi.

¹⁴ Kirisi takaɛi í jɛ nwa laakai ku sũ, nŋu iyi í ce Zuifu ŋa do dimi mmu ŋa akã. Nŋui í kpa mbɛɛtɛ iyi í yɛ bɛi idĩ iyi wa fɛɛfɛ wa wo.

¹⁵ Do ikui araɛi í kpaò irii woodai Zuifu ŋa do iwɔ̀ɛ ŋa ku ba ku yɔkɔ ku ce dimi minji ŋau dimi titɔ̃ akã lege lege si nŋu takaɛ. Si bɛɛbɛi, í dasi laakai ku sũ si anini nŋa.

¹⁶ Do saabui ikuɛ si antaii jĩi ku gaauui í kpaò mbɛɛtɛ iyi à waa muò njɛ wo, nɔ í tɔtɔɔ dimi minji ŋau akã í jɔ̀ à dɔ̃ do Ilaaɔ̃. Aŋa fei à baa à jɛ ara akã ajɔ.

¹⁷ Kirisi í naa ku sisi laabaaui laakai ku sũ bi tu ŋɛ, iŋɛ iyi ì tako ì jĩò Ilaaɔ̃, do bi Zuifu ŋa, aŋa iyi à ceòɛ amɛɛ.

¹⁸ Nɔ ntɔi, do saabui Kirisi awa fei, Zuifu ŋa do dimi mmu ŋa, aa ka yɔkɔ ka bɔ wajui Ilaaɔ̃ Baaba do sobii Hunde akãu.

¹⁹ Si bɛɛbɛ, i kù jɛ dimi mmu ŋa má, walakɔ isɛ mmu, amma nsɛi ì jɛ inɛi ilu akã ŋa do woo dasi Jesu naanɛ ŋa fei, nɔ ì jɛ inɛi kpasɛ̃i Ilaaɔ̃ ŋa.

²⁰ Iŋɛ mɔ ì yɛi bɛi idĩ iyi à ma si antaii icui ile iyi woo bɛ ŋau do walii ŋau à jilɛ. Jesu Kirisi takaɛi í jɛ kuta sintei icui ileu.

²¹ Nŋui á jɔ̀ ileu ku la nɔ ku nɛ gbugbã nɔ ku jɛ bi ku tɔɔi Lafɛ̃ɛ iyi í má jiida.

²² Na anu akã nŋɛ do Kirisi, iŋɛ mɔ ì yɛi bɛi ileu, nɔ iŋɛò ŋa ì jɛò bi kuwai Hundei Ilaaɔ̃ ŋa.