Ebɛɛ 9 - Bibeli do fee

Kuweei andunya do ti lele

¹ Si waatii akabuu sinteu wooda í wɛɛ si gãmɛi kuwee ŋa, nɔ ile bi kuwai Ilaaɔ̃ mɔ í wɛɛ si andunya.

² Ntɔi à gũ ilei acɔ. Inɔ sinteui à ya kpe ile kumá. Bɛi fitila í wa do taabu do pɛ̃ɛ iyi à ya jilɛa Ilaaɔ̃.

³ Do wajui acɔ minjisiau inɔ mmuɛ gɔ í wa bɛ má iyi à ya kpe ile iyi í re do kumá.

⁴ Bɛi bi kuwee iyi à ce do wura í wa, si antaiɛi à ya jo tuae. Bɛ mɔi kpakoi akabuui Ilaaɔ̃ í wa iyi à bii do wura. Si inɔ kpakoui, cakai wura í wa, bii à dasi mana. Nɔ si inɔ kpakou mɔi goloi Arɔ̃ɔ iyi Ilaaɔ̃ í jɔ̀ í da koko wo í wa, do kuta ku munga anu si bii à kɔ wooda.

⁵ Si antaii kpakoui mii ŋa iyi à jɔ serubɛ̃ɛ ilu amboe ŋau à wa. Waati iyi à ce serubɛ̃ɛ ŋau à jɔ̀ ikpa nŋa í fũ í bii tengi bii à ya nikã njɛi kuwee na dulum. Amma a kaa ka yɔkɔ ka sisi idei mii ŋau ihɛ̃ fei nsɛi.

⁶ Do yaase bɛɛbɛi à jilɛ fei ndɛɛ nɔ woo wee ŋa à ya lɔ inɔ sinteui ajɔ fei a maa ce icɛi kuwee nŋa.

⁷ Amma woo wee nlau nŋu akãi í ya lɔ inɔ minjisiau adɔ̃ do adɔ̃ gbakã akã do njɛi mɛɛmu iyi í ya ceaò Ilaaɔ̃ kuweeu na dulum dii nŋu takaɛ do iyi inɛ ŋa à ce si kumà hai mà nŋa.

⁸ Bɛɛbɛi Hundei Ilaaɔ̃ wa nyisi wa iyi kpãa iyi wa bɔ inɔ ntɔ iyi í re do kumá iyi í wa leleu a kù cũu titã waati iyi ile sinteu í wɛɛ.

⁹ Iyi bɛi í jɛ nwa yaasei mii iyi wa ce nsɛiu ihɛ̃, domi wa nyisi wa iyi amua ŋa do mɛɛmu ŋa iyi à ya ceaò Ilaaɔ̃ kuwee ŋau kù to ku jɔ̀ idɔi inɛ iyi wa coou ku má mam mam.

¹⁰ Mii ŋau bɛ fei wa fɔ idei kujɛ do kumɔ do ara ku wiɛ dimi ikã ikã. Woodai ara nŋu akãi iyi Ilaaɔ̃ í jilɛ hee titɔ̃ɛ ku maa naa.

¹¹ Amma waati iyi Kirisi í naa, í jɛ woo wee nla iyi í naaò mii jiidai ala wa nnyi. Nŋui í lɔ ile gɔ iyi í la í re nɔ í sĩa í re. Kù jɛ amanɛ ŋai à coo, waatɔ kù wa si andunya iyi à taka.

¹² Kirisi njɛ í lɔ inɔ ile iyi í re do kumáui gbakã akã hee do ajɔ fei, nɔ kù jɛ do njɛi iwo ŋa walakɔ ti ama kɛtɛ ŋa. Njɛi nŋu takaɛi í lɔò. Bɛɛbɛi í jɔ̀ à baò faaba iyi ci ya tã.

¹³ Inɛ ŋa iyi a kù má à ya fãsi ŋa njɛi iwo ŋai do ti kɛtɛ kombo ŋa do ilúlui kɛtɛ zãu ŋa iyi à jo, ara nŋa ku bɛi ku maaju.

¹⁴ Bii bɛɛbɛi, bɛirei aranfãanii njɛi Kirisi á to. Do saabui Hundei Ilaaɔ̃ iyi kaa kui í naò Ilaaɔ̃ araɛ bɛi kuwee iyi kù nɛ leebu. Njɛɛi á jɔ̀ idɔ nwa ku má hai si icɛ nfe nfe ku ce ku ba ka yɔkɔ ka cea Ilaaɔ̃ icɛ nŋu iyi í jɛ icui kuwɛɛ.

¹⁵ Na ŋɔi í jɔ̀ Kirisi í jɛ woo teese kpãa ku ba Ilaaɔ̃ ku dĩ akabuu titɔ̃ do inɛ ŋa iyi í kpe nɔ inɛ ŋau a jɛ tubu iyi ci ya tã iyi í ce nŋa kuwãɛu. Aa yɔkɔ a jɛ tubuui na iku iyi Kirisi í ku, ku yaò inɛ ŋa hai si kurara nŋa iyi à ce si waatii akabuu nwou.

¹⁶ Bii inɛ gɔ í kɔ bɛi í bi a kpɛ̃ amaniɛ í jilɔɔ hai kù ku, tilasi í gbe lafɛ̃ɛ ku ku titã tiau ku bɛi ku ce icɛ.

¹⁷ Ntɔi, a kaa ceò tiai tubu ku kpɛ̃u icɛ bii kù jɛ inɛ iyi í ce tiau takaɛ í ku, domi bii í wɛɛ si hunde tiau kaa nɛ gbugbã ku ce icɛ.

¹⁸ Na ŋɔi í ce baa akabuu sinteu, do njɛi à dũu.

¹⁹ Sinte Moizi í sisia inɛ fei wooda baa yooma fei si bɛi Ilaaɔ̃ í jilɔɔ. Si anyii nŋu, nɔ í so njɛi ama kɛtɛ ŋa do ti iwo ŋa do inyi, nɔ í so ikũ nkpa do amaawɔi jĩi ndii izɔpu, í dasi njɛu nɔ í fãsi tiai woodau do inɛ fei.

²⁰ Nɔ í ni, iyi ihɛ̃i í jɛ njɛi akabuu iyi Ilaaɔ̃ í dĩ do iŋɛu.

²¹ Nɔ í so njɛu má í fãsi ilei acɔu do mii ŋa iyi à ya ceò kuweeu fei.

²² Si idei wooda njɛi í ya jɔ̀ mii nkpɔ ku maaju. Bii njɛ kù nikã Ilaaɔ̃ kaa kpa dulum dii inɛ kãma.

²³ Mii ndii andunya ŋau ihɛ̃ iyi à jɔ mii ndii lele ŋau à maaju do kuwee dimi bɛɛbɛ. Amma mii ndii lele ŋa taka nŋa à nɛ bukaatai kuwee iyi í re do bɛɛrɛ.

Kuweei Kirisi* í kpa idei dulum

²⁴ À mà sãa sãa iyi Kirisi kù lɔ ile kumá iyi amanɛ ŋa à ce. Kù lɔ ile kumá iyi í jɔ bi kuwa ntɔ ntɔi Ilaaɔ̃u, amma í lɔi hee lele takaɛ nɔ nsɛi wa leekĩ si wajui Ilaaɔ̃ na iri nwa.

²⁵ Si bɛi í lɔ bɛ, kù jɛ a ni í nɛ bukaatai koo ce kuweei araɛ tuuba nkpɔ nkpɔ. Woo wee nlau, inɛ nŋu í ya lɔi adɔ̃ do adɔ̃ si inɔ ile iyi í re do kumáu do njɛi mɛɛmu gɔ.

²⁶ Bii í jɛ Kirisi í lɔ bɛ tuuba nkpɔ nkpɔ wo, á yɛ ijuukpã isɛ fɛɛfɛlo hai sintei andunya. Amma nsɛi, si waatii ankãanyiu ihɛ̃, í na araɛ bɛi kuwee gbakã akã iyi í to ku kpa idei dulum hee do ajɔ fei.

²⁷ Si bɛi Ilaaɔ̃ í jilɛa inɛ fei ku ku gbakã akã ku bɛi ku kiitiɛ,

²⁸ bɛɛbɛ mɔi Kirisi í na araɛ gbakã akã bɛi kuwee í soò dulum dii inɛ nkpɔ. Á nɔ ku na ku faata wa isɛ gbeejisia, kù jɛ ku naa ku kpa idei dulum dii inɛ ŋa má, amma ku ba faabai inɛ ŋa iyi à waa degbeɛ ŋau ku kɔ̃ mam mam nii.