Ebɛɛ 8 - Bibeli do fee

Jesu woo wee nla* nwa

¹ Nsɛi, irii ideu wee. Awa à nɛ woo wee nla dimi bɛɛbɛ, inɛ iyi wa buba lele si awɔ njɛi kitãi bommai Ilaaɔ̃ ilu gbugbã fei.

² Wa ce icɛi woo wee nlau si inɔ ile kumá bi kuwai Aɔ̃ Lafɛ̃ɛ takaɛ iyi Aɔ̃ Lafɛ̃ɛ í ce, kù jɛ amanɛ.

³ À jilɛ woo wee nla baa yooma fei ku cea Ilaaɔ̃ amua do kuwee ŋa. Na nŋu, í gbe woo wee nla nwa ku nɛ ngɔgɔ iyi á ceò kuwee.

⁴ Bii í jɛ í wa si andunya kaa jɛ woo wee, domi woo wee ŋa à wɛɛ iyi à waa ce kuwee si bɛi woodai Moizi wa fɔ.

⁵ Woo wee ŋau à waa sìsì icɛi lele. Icɛ nŋa í jɔ icɛi kuwee iyi woo wee nla nwa í ce leleu. Bɛɛbɛ mɔi, waati iyi Moizi í tã sɔɔlu ku ce ilei acɔu, Ilaaɔ̃ í sɔ̃ɔ í ni, jɔ̀ i coo mam mam ku yɛ bɛi ǹ nyisiɛ si antaii iri kutau.

⁶ Do yaase bɛi icɛi Jesu í reò tu ŋa, bɛɛbɛi akabuu iyi í teese si gãmɛi Ilaaɔ̃ do amanɛ ŋa í nɛ bɛɛrɛ í re. Kuwã iyi í re do bɛɛrɛui í jɛ icui akabuuu.

⁷ Bii akabuu sinteu í kɔ̃, kaa nɛ a kpaasiɛ má.

⁸ Amma Ilaaɔ̃ í yɛ taalei inɛɛ ŋa waati iyi í ni, amu Aɔ̃ Lafɛ̃ɛ ǹ ni, ajɔ wa naa iyi an dĩ akabuu titɔ̃ do dimii inɛi Izirɛli do inɛi Zudaa ŋa.

⁹ Kaa yɛ bɛi iyi ǹ dĩ do bala nŋa ŋa, ajɔ iyi ǹ mu awɔ nŋa ǹ fitaò ŋa hai ilɛi Ezibiti. A kù leekĩ do akabuu iyi ǹ dĩ do aŋa. Na nŋu, ǹ ce si ŋa atafii. Ideu bɛi, amu Aɔ̃ Lafɛ̃ɛ ǹ fɔ.

¹⁰ Nɔ ǹ ni má, akabuum wee, iyi an dĩ do dimii inɛi Izirɛli ŋa si anyii ajɔ nŋu. An dasi woodam si lasabu nŋa. An kɔɔ si idɔ nŋa. An jɛ Aɔ̃ Lafɛ̃ɛ nŋa nɔ aa jɛ inɛm ŋa.

¹¹ Inɛ kãma nŋa kaa kɔ inɛi iluɛ si cio má walakɔ kpaasiɛ ku ba ku màm, domi aŋa fei aa màm, hai inɛ iyi í kere í re hee do inɛ iyi í la í re fei.

¹² An ce nŋa suurui dulum iyi à ce fei, n kaa n ye gigiɛ má.

¹³ Idei akabuu titɔ̃ iyi Ilaaɔ̃ wa fɔui í jɔ̀ ti takou í ce ngbo. Wee mii iyi wa gbo wa fei, wa bɔ ku kpa irii.