Ebɛɛ 7 - Bibeli do fee

Mɛɛkizedɛki í jɛ ilaalu nɔ í jɛ woo wee* má

¹ Mɛɛkizedɛkii í jɛ ilaalui Salɛmu do woo weei Ilaaɔ̃ nŋu iyi í re fei. Si waati iyi Aburahamu í jɛ amanlu ŋa igũ wa baa, ŋɔi Mɛɛkizedɛki í bɔ ku kòo nɔ ku weeaa.

² Mii iyi Aburahamu í ba wa fei, í ce ikpɛ̃ɛ, si mɛɛwa fei í nya akã í na Mɛɛkizedɛki. Yaasei irii Mɛɛkizedɛkiui í jɛ ilaalu iyi í jɛ dee dee. Si anyii nŋu, í jɛ ilaalui Salɛmu, waatɔ ilaalui laakai ku sũ.

³ Inɛ gɔ kù mà baaɛ walakɔ iyeɛ walakɔ balaɛ gɔ. A kù ce faajii kubíɛ hee má jɛ faajii ikuɛ. Si bɛɛbɛ í jɔ Amai Ilaaɔ̃, nɔ í jɛ woo wee do ajɔ fei.

⁴ I cɔ zaka bɛi kulai mɔkɔu í to, nŋu iyi si waati iyi Aburahamu bala nla nwa í jɛ igũ, mii ŋa iyi í ba wa, si mɛɛwa fei í nya akã í náa.

⁵ Si inɔi inɛi Levii ŋa, inɛ ŋa iyi à jɛ woo wee ŋau, wooda nwa í na ŋa kpãa, si mɛɛwa fei inɛi Izirɛli ŋa a nya akã a na ŋa. Do nŋu fei, à jɛ nyaanze akã, aŋa fei tɔkui Aburahamu ŋai.

⁶ Mɛɛkizedɛki í weea Aburahamu iyi Ilaaɔ̃ í cea kuwãu, nɔ baa do iyi Mɛɛkizedɛki kù jɛ dimii Levii, do nŋu fei, Aburahamu í náa ikpɛ̃u.

⁷ Kù nɛ sika gɔ, inɛ iyi í re nŋui í ya weea kpaasi.

⁸ Inɛi Levii ŋa, aŋa iyi inɛ ŋa à ya na akã si mɛɛwau fei, amanɛ ŋai iyi à ya ku, amma Mɛɛkizedɛki í wɛɛ, si bɛi kukɔi idei Ilaaɔ̃ wa fɔ.

⁹ Nsɛi, si waati iyi Aburahamu í náa akã si mɛɛwa fei, í yɛi bɛi Levii takaɛ mɔ í náa, nŋu iyi amaɛ ŋa aa ba akã si mɛɛwa fei,

¹⁰ domi baa do iyi a kù bí Levii waati bɛɛbɛ, í yɛ bɛi í wa si arai balaɛ waati iyi balaɛu í ko Mɛɛkizedɛki.

¹¹ Wooda iyi Ilaaɔ̃ í na inɛi Izirɛli ŋa, kpãai kuweei inɛi Levii ŋai í jɛ icuɛ. Nsɛi, bii í jɛ kpãai kuweeu bɛ á yɔkɔ ku jɔ̀ inɛ ŋa a kɔ̃ mam mam, a kaa nɛ bukaatai woo wee mmu gɔ ku naa má bɛi Mɛɛkizedɛki, inɛ iyi kù jɛ dimii Arɔ̃ɔ,

¹² domi bii à kpaasi kpãai kuwee bɛɛbɛ, tilasi í gbe a kpaasi wooda mɔ.

¹³ Ntɔi, Lafɛ̃ɛ nwa iyi ideu wa fãau, í jɛ inɛi dimi mmu gɔ, nɔ si dimiu inɛ kãma kù ce icɛi kuwee.

¹⁴ Ntɔ ntɔ, à mà iyi à búui si dimii Zudaa. Moizi kù nɔ kù fɔ idei inɛ kãma si gãmɛi dimiu iyi á na ku jɛ woo wee.

Woo wee gɔ iyi í yɛ bɛi Mɛɛkizedɛki

¹⁵ Yaasei ideu í fita sãa sãa si bɛi à yɛ woo wee mmu gɔ í fita iyi í yɛ bɛi Mɛɛkizedɛki.

¹⁶ A kù coo woo wee si na iyi í jɔ̀ à búu si dimii woo wee ŋa, amma do gbugbãi kuwɛɛ iyi ci ya tãi.

¹⁷ Do ntɔi, kukɔi idei Ilaaɔ̃ í fɔ na iriɛ í ni, awɔi aa jɛ woo wee do ajɔ fei bɛi Mɛɛkizedɛki.

^18-19 Si bɛɛbɛi à kpa wooda nwou nɔ à naaò kpãa ku cɔ iyi í roo wa, nɔ do saabuɛi à waa sɛkɛɛ si Ilaaɔ̃. À kpa wooda nwoi si na iyi í jɔ̀ kù nɛ gbugbã nɔ kù nɛ aranfãani. Ntɔ ntɔ, wooda kù jɔ̀ nkãma kù kɔ̃ mam mam.

²⁰ Ilaaɔ̃ í jilɔɔ woo wee bɛi Mɛɛkizedɛki nɔ í gbasi ideu. Inɛ ihɔ̃ ŋa à jɛ woo wee ŋa, kù jɛ do kugbasii Ilaaɔ̃.

²¹ Amma do kugbasii Aɔ̃ Lafɛ̃ɛ í ce Jesu woo wee waati iyi í sɔ̃ɔ í ni, amu Aɔ̃ Lafɛ̃ɛ ǹ gbasi ideu. N kaa n nɔ n dede si idem má. Aa jɛ woo wee do ajɔ fei.

²² Bɛɛbɛi Jesu í jɛ nwa bɛi akaasii akabuu iyi í sĩa í re.

²³ Tengi bii idei Jesu do idei woo wee ŋau í nya ikã wee. Woo wee ŋau à kpɔ si na iyi í jɔ̀ amanɛ ŋai iyi à ya na a ku, nɔ icɛ nŋa ku leekĩ.

²⁴ Amma Jesu njɛ í wɛɛi do ajɔ fei, ŋɔi í jɔ̀ inɛ mmu gɔ kaa sãsi agbɛɛ ajɔ kãma.

²⁵ Na nŋu á yɔkɔ ku faaba inɛ ŋa iyi à waa sɛkɛɛ si Ilaaɔ̃ do saabuɛ mam mam, domi í wɛɛi hee do ajɔ fei ku maa tɔɔ Ilaaɔ̃ na iri nŋa.

²⁶ Na nŋu, Jesu í jɛ woo wee nla iyi à nɛ bukaataɛ. Kuwɛɛi nŋu do ti ilu dulum ŋa kù jɛ dimi akã. Í má, kù ce dulum ajɔ kãma nɔ riisi kãma kù wa siɛ. À soo í nɛ hee lelei Ilaaɔ̃.

²⁷ Kù yɛ bɛi woo wee nla iyi ihɔ̃ ŋa, aŋa iyi à nɛ bukaatai kuwee ajɔ fei, sinte na irii dulum dii aŋa taka nŋa, si anyiɛ ti inɛ ŋa iyi à gbe. Inɛ nŋu í ce kuwee akã iyi í to hee do ajɔ fei si waati iyi nŋu takaɛ í na araɛ.

²⁸ Woo wee nla ŋa iyi à waa ce icɛ bɛi woodai Moizi í jilɛ, a kù kɔ̃. Amma woo wee nla iyi Ilaaɔ̃ í jilɛ do idei kugbasiɛ iyi í fɔ si anyii woodau, nŋui í jɛ Amaɛ iyi í kɔ̃ hee do ajɔ fei.