Ebɛɛ 6 - Bibeli do fee

¹ Na nŋu, ka jɔ̀ ide sinte ŋau si gãmɛi Kirisi nɔ ka bɔ waju ka jɛ inɛ ŋa iyi à jĩa. A kaa ka jilɛ icui ideu ku kɔsi má. Ideui í jɛ idei idɔ ku kpaasi hai si kookoosui nfe ku ce, do idei naanɛ ku dasi si Ilaaɔ̃,

² do idei ikɔi inyi ku dasi ikã ikã, do idei awɔ ku lea inɛ ŋa si iri, do idei kujĩi iku ŋa, do ide iyi Ilaaɔ̃ á jilɛ hee do ajɔ fei si kiitiu.

³ Kookaaii waju ku bɔi aa ka ce bii Ilaaɔ̃ í bi.

⁴ Inɛ ŋa iyi à ba inya kumái Ilaaɔ̃ tã, nɔ à tiɛ amuai lele, nɔ à ba ikpɛ̃ si Hundei Ilaaɔ̃,

⁵ nɔ à yɔɔ iyi idei Ilaaɔ̃ í sĩa, nɔ à mà gbugbãi kuwɛɛi ala,

⁶ bii à sinda à toa idei Ilaaɔ̃ anyi, a kaa yɔkɔ a sinda idɔ má, domi à sìsí à waa kpakpa Amai Ilaaɔ̃ si jĩi ku gaauu má nɔ à waa dasiɛ anyɔ si bantuma.

⁷ Ntɔ ntɔ, ilɛ á yɔkɔ ku mɔ inyii ijĩ nɔ amaajɛ iyi á cea woo logoo ŋa aranfãani á fita. Bii ilɛu í ce bɛɛbɛ, á ba kuweei Ilaaɔ̃.

⁸ Amma bii agũ do agũ fũfũ ŋai à fita si, ilɛu kù ce ncɛɛi. Bii í kɔ̃ɔsi Ilaaɔ̃ á ceekpeɛ, si anyiɛ nɔ a joo.

⁹ Iŋɛ baakɔɔ nwa ŋa, baa do iyi à waa fɔ bɛɛbɛ, à waa naanɛ ŋɛ. À mà iyi ì wa si kpãai faaba ŋa.

¹⁰ Ilaaɔ̃ í jɛ inɛ dee dee, kaa gbɛjɛ icɛ nŋɛ do kubi iyi ì nyisi na iriɛ ŋa, si bɛi ì gbɔa inɛɛ ŋa wo ŋa, nɔ ì waa gbɔ nŋa baa nsɛi ŋa.

¹¹ Amma à bi inɛ baa yooma nŋɛ fei ku hanya do iju nkpa ku leekĩ si ideu hee kɔɔɛ ku ba mii iyi ì waa cɔ kpãaɛ ŋau ku ce mam mam.

¹² A kù bi i na i ce ika ŋa, amma i sisi inɛ ŋa iyi à dasi naanɛ nɔ à temua à waa jɛò tubu iyi Ilaaɔ̃ í wã ŋa dou.

Ide iyi Ilaaɔ̃ í wã kù nɛ sika

¹³ Waati iyi Ilaaɔ̃ í cea Aburahamu kuwã í gbasi do irii nŋu takaɛi si na iyi í jɔ̀ inɛ gɔ kù wɛɛ iyi í roo má,

¹⁴ í ni, an weeɛ do ntɔ, nɔ n jɔ̀ dimiɛ ku kpɔ.

¹⁵ Si bɛɛbɛi Aburahamu wa temuaò nɔ í ba mii iyi Ilaaɔ̃ í wãa do.

¹⁶ Bii inɛ ŋa à waa gbasi ide, à ya cooi do irii inɛ iyi í re ŋa, nɔ kugbasiu ku jɔ̀ a mà iyi ntɔ ntɔ á cooi nɔ ku kpa irii kakɔɔ fei.

¹⁷ Bɛɛbɛi, inɛ ŋa iyi Ilaaɔ̃ í cea kuwãu, í bi ku nyisi ŋa mam mam iyi idei nŋu kù nɛ gɛlɛ ku kɔbia. Na ŋɔi í jɔ̀ í gbasi ku ba a mà iyi ntɔ ntɔ á cooi.

¹⁸ Na nŋu, idei kuwã do kugbasi, aŋa minjii à wɛɛ iyi kaa kpaasi, nɔ si ide minji ŋau bɛ Ilaaɔ̃ kaa yɔkɔ ku sɔ ibo. Si ide minji ŋau bɛi Ilaaɔ̃ wa mu nwa gbugbã ntɔ ntɔ, awa iyi à waa leekĩ si kpãa ku cɔ iyi í jilɛ nwa nɔ à ba bi ku manji nwa siɛ.

¹⁹ Kpãa ku cɔ iyi à nɛu wa mu idɔ nwai dim dim bɛi isɔi akɔi inyi í ya gɛɛ akɔu. Kpãa ku cɔu wa leekĩi dim dim do anyii ridoo bi kuwai Ilaaɔ̃ lele.

²⁰ Tengi bɛi Jesu í cua nwa í lɔ na iri nwa domi í baa í jɛ woo wee nla do ajɔ fei bɛi Mɛɛkizedɛki.