Ebɛɛ 5 - Bibeli do fee

¹ Woo wee nla iyi à ya so hai si inɔi amanɛ ŋa fei, à ya sooi ku cea Ilaaɔ̃ icɛ na iri nŋa ku ba ku ya kooa Ilaaɔ̃ amua nŋa ŋa nɔ ku ce kuwee ŋa na irii dulum du ŋa.

² Á yɔkɔ ku ce suuru do inɛ ŋa iyi a kù mà ngɔgɔ do inɛ ŋa iyi à yaa hai si kpãa, si na iyi í jɔ̀ nŋu takaɛ mɔ kù kɔ̃.

³ Na ŋɔi í jɔ̀, kù nɛ bɛi á ce iyi kù ce kuwee na irii dulum dii nŋu takaɛ bɛi wa ce na irii inɛ ŋa.

⁴ Inɛ gɔ kaa yɔkɔ ku so araɛ ku ni nŋu í jɛ woo wee nlau, bii kù jɛ Ilaaɔ̃i í kpoo bɛi í kpe Arɔ̃ɔ wo.

⁵ Bɛɛbɛ mɔi baa Kirisi takaɛ kù so araɛ lele kù ni nŋu í jɛ woo wee nlau. Ilaaɔ̃i í cicaɛ, nŋu iyi í sɔ̃ɔ í ni, awɔi ì jɛ amam. Hai nnyi ǹ jɛ baaɛ.

⁶ Bii gɔ à kɔ ide iyi í sɔ̃ɔ má í ni, awɔi aa jɛ woo wee do ajɔ fei bɛi Mɛɛkizedɛki.

⁷ Si waati iyi Jesu í wa si andunya í ya ce kutɔɔ do anu ku dɔ̃ nla nla do cikãaju. Í tɔɔ sobii Ilaaɔ̃, nŋu iyi á yɔkɔ ku nyaa hai si awɔi iku, nɔ í gbɔaa si na iyi í jɔ̀ í sũaa iri ilɛ.

⁸ Do iyi í jɛ Amai Ilaaɔ̃ fei, í kɔkɔ ku jirimaɛ si ijuukpã iyi í yɛ.

⁹ Iyi í kɔ̃ í tã nɔ í baa í jɛa inɛ ŋa iyi à waa jirimaɛ fei icui faaba iyi ci ya tã,

¹⁰ si na iyi í jɔ̀ Ilaaɔ̃ í coo woo wee nla bɛi Mɛɛkizedɛki.

Ka maà jɔ̀ naanɛ ku dasi nwa

¹¹ Mii nkpɔ í wɛɛ iyi aa ka yɔkɔ ka fɔ si gãmɛi ideu ihɛ̃, amma á gaabu a sisi nŋɛ yaaseɛ domi ì baa ì jɛ inɛ ŋa iyi a ci ya gbɔ yaasei ide ńya ńya ŋa.

¹² Waati í to bɛbɛi bii í jɔ iŋɛ mɔ i kɔ inɛ gɔ ŋa mɔ si ideu, nɔ do nŋu fei, ì kɔ̀ ì waa nɛ bukaatai inɛ iyi á kɔ ŋɛ si mii sinte ŋa si idei Ilaaɔ̃. Iŋɛ iyi ì to i jɛ ijɛ kili nla nɔ ì nyi ì waa nɛ bukaatai amɔ má ŋa.

¹³ Inɛ iyi wa mɔmɔ fei amai, kaa yɔkɔ ku wũa jiida do laalɔ.

¹⁴ Amma ijɛ kili, ijɛi inɛ ngbo ŋai, aŋa iyi à mà jiida do laalɔ ku wũa si na iyi í jɔ̀ à nɛ dɔ̃ɔnɛɛ.