Ebɛɛ 4 - Bibeli do fee

¹ Kuwãi Ilaaɔ̃ iyi í ni aa ka lɔ si bi kusĩmiu í wɛɛ baa nnyi. Na nŋu, i ce laakai ku ba inɛ gɔ nŋɛ ŋa a maà na a to wa do ankãanyi nɔ a ba wee aŋa a kaa ba a lɔ bi kusĩmiu.

² À waazo nwa laabaau jiida si bɛi à cea inɛ ŋa iyi à tako à wa si gbaau. À gbɔ ideu amma kù ce nŋa aranfãani kãma domi si waati iyi à gbɔɔ, a kù dasi naanɛ.

³ Awa iyi à dasi naanɛ aa ka lɔ si bi kusĩmiu, bi kusĩmi iyi Ilaaɔ̃ í fɔ ideɛ í ni, si idɔɔkɔ̃m ǹ fɔ do kugbasi ǹ ni, a kaa lɔ si bi kusĩmi iyi ǹ ce nŋa sɔɔluɛu. Í fɔ bɛɛbɛ baa do iyi í ce sɔɔlui kusĩmiu tã hai waati iyi í taka andunya.

⁴ Do ntɔi, bii gɔ à fɔ idei ajɔ mɛɛjesiau à ni, Ilaaɔ̃ í kpa irii icɛɛ fei nɔ í sĩmi si ajɔ mɛɛjesia.

⁵ Do nŋu fei Ilaaɔ̃ í fɔ ide iyi à tako à ka wau wo iyi í ni, a kaa lɔ si bi kusĩmi iyi ǹ ce nŋa sɔɔluɛu ajɔ kãma.

⁶ Inɛ gɔ ŋa aa na a lɔ si bi kusĩmiu. Amma inɛ sinte ŋa iyi à gbɔ laabaau jiidau a kù lɔ si na ide hai jirima nŋau.

⁷ Na nŋu, nsɛi Ilaaɔ̃ í jilɛ ajɔ má, nɔ ajɔui nnyi. Ideu í cei bɛi Ilaaɔ̃ í jɔ̀ à na à gbɔɔ hai si gɛlɛi Davidi si anyii adɔ̃ nkpɔ nkpɔ. Ideu í ni, bii ì gbɔ ide ku fɔi Ilaaɔ̃ nnyi ŋa, i maà ti i lele idɔ nŋɛ.

⁸ Ntɔi, bii í jɛ si kusĩmiu bɛi Zozue í bɔò inɛ ŋau wo, Ilaaɔ̃ kaa fɔ idei ajɔi kusĩmi mmu gɔ iyi á na ku naa.

⁹ Bɛɛbɛi kusĩmi í wɛɛ má iyi í jɛ ti inɛi Ilaaɔ̃ ŋa bɛi Ilaaɔ̃ takaɛ í sĩmi si ajɔ mɛɛjesiau.

¹⁰ Inɛ iyi í lɔ si bi kusĩmi iyi Ilaaɔ̃ í ce sɔɔluɛu, í kpa irii icɛɛi si bɛi Ilaaɔ̃ mɔ í kpa irii tɛɛ.

¹¹ Na nŋu, ka ce kookaai ka lɔ si bi kusĩmiu. Kãma nwa ku maà jɛ hai gbɔ ide bɛi inɛ ŋau. Bii kù jɛ bɛɛbɛ aa ka na ka cuku ka kua bi kusĩmiu.

¹² Idei Ilaaɔ̃i í jɛ kuwɛɛ, í nɔ í nɛ gbugbã. Í dɔ̃ anu í re taakuba ilu andɛ minji. Í nɛ gbugbã iyi á yɔkɔ ku lɔò hee lɛlɛi idɔ ku fɛɛfɛ idɔi amanɛ do lasabuɛ, ikɔ̃i ara mɔ do lompi. Nɔ á wusɛ idɔɔbii amanɛ do lasabuɛ.

¹³ Nkãma kù wɛɛ iyi wa manjia Ilaaɔ̃ woo taka. Fei ndɛɛ í cĩ wa jilɛi si wajuɛ. Nɔ nŋui awa fei aa ka tusɛa kuwɛɛ nwa.

Jesui í jɛ woo wee nlau*

¹⁴ Do ntɔi à nɛ woo wee nla iyi í bɔ lelei Aɔ̃ í to hee bi Ilaaɔ̃ takaɛ. Nŋui í jɛ Jesu Amaɛ. Na nŋu, ka leekĩ dim dim si naanɛ iyi à dasi,

¹⁵ domi woo wee nla iyi à nɛu á yɔkɔ ku ce araarei gbugbã hai nɛ nwa si na iyi í jɔ̀ à lɛlɛɛ ku ceò laalɔ si mii fei bɛi awa mɔ, amma kù ce dulum.

¹⁶ Kitãi bommai Ilaaɔ̃i í jɛ tengi bii aa ka ba didɔ̃. Na nŋu, ka sɛkɛɛ si kitãu si kutɔɔ nwa do idɔ ku buba, ku ba Ilaaɔ̃ ku ce araare nwa nɔ ku mu nwa didɔ̃ iyi á sobi wa si waati iyi í jɔ.