Ebɛɛ 3 - Bibeli do fee

Jesu í re Moizi*

¹ Na nŋu, iŋɛ inɛm ŋa, iŋɛ iyi ì jɛ ti Ilaaɔ̃, iŋɛ iyi í kpe do woo dasi Jesu naanɛ ŋa iyi à gbe, i jɔ̀ i cɔ Jesu, nŋu iyi Ilaaɔ̃ í bɛ wa ku jɛ woo wee nla si kpãai naanɛ ku dasi iyi à waa sisi.

² Bɛi Moizi í tako í jɛ ilu naanɛ si icɛɛ iyi í cea inɛi Izirɛli ŋa fei, bɛɛbɛ mɔi Jesu takaɛ í nɛ naanɛ si wajui Ilaaɔ̃, nŋu iyi í jilɔɔ si icɛu.

³ Inɛ iyi í ma ile í nɛ bɛɛrɛ í re ileu takaɛ. Bɛɛbɛ mɔi Jesu í nɛ amboe nla nla iyi í re ti Moizi.

⁴ Ntɔi, ile iyi ì yɛ fei amanɛi í maa, amma Ilaaɔ̃i í jɛ inɛ iyi í ma mii fei.

⁵ Si icɛ iyi Moizi í cea inɛi Izirɛli ŋa fei, í yɛ bɛi amaacɛ ilu naanɛ si kpasɛ̃i Ilaaɔ̃ ku jɛ nwa sɛɛdai mii iyi á na ku ce.

⁶ Amma Kirisi njɛ amai kpasɛ̃ ilu naanɛi iyi Ilaaɔ̃ í ce inɛ ngboi kpasɛ̃ɛu. Inɛi kpasɛ̃ɛ ŋau mɔ, awai bii à waa leekĩ si naanɛ dim dim do si kpãa ku cɔ iyi à waa tɔɔò fufu.

Kusĩmi iyi Ilaaɔ̃ í jilɛa inɛɛ ŋa

⁷ Na nŋu, i sotĩ i gbɔ ide iyi Hundei Ilaaɔ̃ í fɔ í ni, bii ì waa gbɔ ide ku fɔi Ilaaɔ̃ nnyi ŋa,

⁸ i maà lele idɔ nŋɛ bɛi si ajɔ iyi bala nŋɛ ŋa à kɔ̀siɛ si waati iyi à cɔ laakaiɛ si gbaau.

⁹ Ŋɔi Ilaaɔ̃ í ni, tengi bɛi bala nŋɛ ŋa à kɔ̀sim à dede idɔɔkɔ̃m, baa do iyi à yɛ mii iyi ǹ ce

¹⁰ hee adɔ̃ ciiji. Na ŋɔi í jɔ̀ idɔm í kɔ̃ si ŋa. Nɔ ǹ ni, inɛ ŋau idɔ nŋa í ya sindai ajɔ fei hai bi tom. A kù mà kpãam.

¹¹ Na nŋu, si idɔɔkɔ̃m ǹ fɔ do kugbasi ǹ ni, a kaa lɔ si bi kusĩmi iyi ǹ ce nŋa sɔɔluɛu ajɔ kãma.

¹² Na nŋu, iŋɛ inɛm ŋa, i ce laakai, i maà jɔ̀ inɛ gɔ nŋɛ ku nɛ idɔ laalɔ hai dasi naanɛ, iyi á jɔ̀ ku sinda hai bi Ilaaɔ̃, nŋu iyi í wɛɛ.

¹³ Amma si na iyi í jɔ̀ Ilaaɔ̃ í mu nwa ajɔi nnyi, nɔ ala kù jɛ tu wa, í sĩa i ya maa mua njɛ gbugbã ajɔ fei ŋa ku ba inɛ gɔ nŋɛ ku maà jɔ̀ dulum ku dĩ ijuɛ hee ku lele idɔɛ.

¹⁴ Ntɔi, à nɛ ikpɛ̃ si kuwɛɛi Kirisi bii à waa leekĩ dim dim si naanɛ ku dasi iyi à nɛ hai sinte hee kɔɔɛ.

¹⁵ Na ŋɔi í jɔ̀ à ni, bii ì waa gbɔ ide ku fɔi Ilaaɔ̃ nnyi ŋa, i maà lele idɔ nŋɛ bɛi si ajɔ iyi bala nŋɛ ŋa à kɔ̀siɛ.

¹⁶ Yoo ŋai à gbɔ ide ku fɔi Ilaaɔ̃ nɔ à kɔ̀siɛ bii kù jɛ inɛ ŋa iyi Moizi í gbã hai ilɛi Ezibitiu fei.

¹⁷ Mà yoo ŋai idɔi Ilaaɔ̃ í kɔ̃ si ŋa hee zakai adɔ̃ ciiji bii kù jɛ do inɛ ŋa iyi à ce dulum nɔ à cuku à ku si gbaau.

¹⁸ Si waati iyi Ilaaɔ̃ í fɔ do kugbasi í ni, a kaa lɔ si bi kusĩmi iyi nŋu í ce nŋa sɔɔluɛu, yoo ŋai wa fãa bii kù jɛ inɛ ŋa iyi a kù jirima ideɛ.

¹⁹ Bɛɛbɛ mɔi, à yɛ iyi a kù yɔkɔ a kù lɔ si bi kusĩmiu si na iyi í jɔ̀ a kù dasi naanɛ.