Ebɛɛ 2 - Bibeli do fee

Idei faaba

¹ Na nŋu, í sĩa ka mu ide iyi à gbɔ dim dim ku ba ka maà nyɔ,

² domi baa ide iyi amaleka ŋa à naaò wa í nɛ gbugbã hee inɛ iyi kù saaluɛ walakɔ kù jirimaɛ fei í ba ijuukpã iyi í jɔ.

³ Debɛi, bɛirei aa ka ce ka yɔkɔ ka saa ijuukpã bii à waa cɛiò idei faaba iyi í to bɛɛbɛ. Lafɛ̃ɛ takaɛ í tako í sisi idei faabau, nɔ si anyiɛ inɛ ŋa iyi à gbɔɔ à sɔ̃ wa à ni ideu ntɔi.

⁴ Nɔ Ilaaɔ̃ í ce maamaake ikã ikã fei ku ba gbugbãi sɛɛda nŋau ku kɔ̃ɔsi. Nɔ í cea inɛ ŋa amua ikã ikãi Hundeɛ si bɛi í bi.

Woo faaba inɛ ŋa

⁵ Ntɔ ntɔ, andunya iyi á na ku naa iyi à waa fãau, kù jɛ amaleka ŋai Ilaaɔ̃ í jilɛ a jɛ inɛ ngboɛ.

⁶ Amma inɛ gɔ í kɔ bii gɔ í ba Ilaaɔ̃ ide ku fɔ í ni, mii amanɛ í jɛ hee ì waa ce lasabuɛ. Yooi í jɛ amanɛ hee i maa gbɔaa.

⁷ Si waati keeke gɔ ì coo inɛ iyi kù to amaleka ŋa. Ì muaa amboe nɔ ì jɔ̀ í nɛ jirima nla nla.

⁸ Ì muaa gbugbã si mii fei. Ntɔi, iyi à ni Ilaaɔ̃ í naa gbugbã si mii fei, nkãma kù wɛɛ iyi kaa sũaa iri ilɛ. Amma a kù yɛ bii mii fei í sũaa iri ilɛ titã.

⁹ Do nŋu fei Jesu nŋu iyi à kaye wo, nsɛi à waa yɔɔ do amboe do jirima nla nla na wahala iyi í yɛ í kuò. Ntɔi, didɔ̃i Ilaaɔ̃ í tako í jɔ̀ kù to amaleka ŋa si waati keeke gɔ. Ilaaɔ̃ í ce bɛɛbɛi ku ba ku yɛ wahala ku kuò na irii inɛ fei.

¹⁰ Do ntɔ, Ilaaɔ̃, nŋu iyi í taka mii fei nɔ wa mu fei ndɛɛ, í yɔɔ iyi í sĩa Jesu ku yɛ ijuukpã ku ba ku jɛ amanɛ iyi í kɔ̃ nɔ ku gbã amanɛ nkpɔ nkpɔ ku naaò ŋa wa si amboeɛ, domi Jesui í jɛ icui faaba nŋa.

¹¹ Jesu iyi í wɛ inɛ ŋa hai si dulum du ŋa, nŋu do inɛ ŋa iyi í wɛ ŋau à jɛ amai baa akã. Na nŋu, kù ce anyɔi ku kpe ŋa ifɔɛ ŋa

¹² tengi bii í ba Ilaaɔ̃ ide ku fɔ í ni, an sisia inɛm ŋa ideɛ. An saabuɛ si aninii inɛ ŋa iyi à tɔtɔɔ.

¹³ Nɔ í ni má, an dasi Ilaaɔ̃ naanɛm. Si anyiɛ má nɔ í ni, amu wee do amu ŋa iyi Ilaaɔ̃ í muum.

¹⁴ Si bɛi amu ŋau à nɛ ara do njɛ, Jesu takaɛ í na í so ara bɛi aŋa mɔ. Í ce bɛɛbɛi ku ba na saabui ikuɛ ku kpa gbugbãi Seetam, nŋu iyi í nɛ gbugbãi iku wo,

¹⁵ nɔ ku ya inɛ ŋa iyi à jɛ bɛi aru ŋa si kuwɛɛ nŋa fei na njoi iku.

¹⁶ Ntɔ ntɔ, kù jɛ amaleka ŋai í naa ku sobi, tɔkui Aburahamu ŋai í naa ku sobi.

¹⁷ Na nŋu, kù nɛ bɛi á ce iyi kù jɔ ifɔɛ ŋa si mii fei ku ba ku na ku jɛ woo wee nla iyi í nɛ araare nɔ ku jɛ ilu naanɛ si icɛi Ilaaɔ̃, nɔ ku sã gbesei dulum dii inɛ ŋa.

¹⁸ Do yaase bɛɛbɛ á yɔkɔ ku sobi inɛ ŋa iyi à wa si kulɛlɛ, domi nŋu takaɛ í yɛ ijuukpã si kulɛlɛ.