Ebɛɛ 13 - Bibeli do fee

Kuce iyi á dɔ̃a Ilaaɔ̃ si

¹ I ya temua si kpaasi woo dasi naanɛ ŋa ku bi.

² I ye gigi iyi í sĩa i ya yaaɛ inɛ njoo ŋa, domi inɛ ŋa iyi à waa ce bɛɛbɛ, gɔgɔ nŋa ŋa à yaaɛ amaleka ŋa a kù mà.

³ Nɔ i ya ye gigii inɛi piisɔ̃ɔ ŋa bɛi mii iyi à mu iŋɛ mɔ piisɔ̃ɔ ŋa. I ye gigii inɛ ŋa iyi à waa yɛ ijuukpã bɛi mii iyi iŋɛ taka nŋɛ í yɛ ijuukpã ŋa.

⁴ Inɛ baa yooma fei ku mà bɛɛrɛi abɔdɔ̃ nɔ mɔkɔ do abo a leekĩò njɛ dim dim. Ntɔ ntɔ Ilaaɔ̃ á kiiti inɛ ŋa iyi à waa sũò njɛ hai ce abɔdɔ̃ do inɛ ŋa iyi à waa ce sakara.

⁵ I maà ti i jɔ̀ kubii fia ku mu ŋɛ. I jɔ̀ iyi ì nɛ ku ce nŋɛ zaka, domi Ilaaɔ̃ í ni, n kaa n jɔ̀ɛ pai, n kaa n nɔ n fũsiɛ awɔ baa ajɔ gɔ.

⁶ Na nŋu, aa ka yɔkɔ ka cã gɛndɛ ka ni, Aɔ̃ Lafɛ̃ɛ í jɛ inɛ iyi á sobim. Njo kù waa mum. Mii amanɛ á yɔkɔ ku ceem.

⁷ I ye gigii woo cuai tako nŋɛ ŋa, inɛ ŋa iyi à tako à sisi nŋɛ idei Ilaaɔ̃. I lasabuò aranfãani iyi kuwɛɛ nŋa í naaò wa, nɔ iŋɛ mɔ i sisi naanɛ ku dasi nŋa ŋa.

⁸ Jesu Kirisi ci ya kpaasi hai ana do nnyi hee do ajɔ fei.

⁹ I maà ti i jɔ̀ a fa ŋɛ si kukɔsi ikã ikã, domi í sĩa idɔ nwa ku maa leekĩ si didɔ̃i Ilaaɔ̃, ku maà jɛ si iwɔ̀i ijɛ ku jɛ ŋa. Inɛ ŋa iyi à waa too kpãau bɛ fei a kù ba aranfãani kãma.

¹⁰ Awa à nɛ bi kuwee gɔ nɔ woo wee ŋa iyi à waa ce icɛ si ile kumáu a kù nɛ kpãa a jɛ ijɛi kuweeu.

¹¹ Í yɛi bɛi kuwee iyi woo wee nlau í ya ce. Í ya lɔò njɛi mɛɛmu ŋaui si inɔ ile iyi í re do kumáu ku ceò kuwee na dulum dii amanɛ ŋa. Amma à ya koo a jo iŋai mɛɛmuu takaɛi angulei iluu.

¹² Na ŋɔi í jɔ̀ Jesu mɔ, waati iyi í bi ku jɔ̀ inɛ ŋa a má do njɛi nŋu takaɛ, Ilaaɔ̃ í jɔ̀ à kpaa angule.

¹³ Na nŋu, ka bɔ bi titɛɛ angule bɛ, ka jɛsi à donda wa bɛi a dondaɛ,

¹⁴ domi a kù nɛ ilu gɔ si ilɛu ihɛ̃ iyi á maa wɛɛ hee do ajɔ fei. Ilu iyi wa naa nŋui à waa dɛdɛ.

¹⁵ Na irii Jesu ka maa saabu Ilaaɔ̃, waatɔ ka ya fɔ do gɛlɛ nwa mii iyi í ce si wajui inɛ ŋa. Nɔ saabuu kú jɛ bɛi kuwee iyi à waa ceaa waati kãma fei.

¹⁶ I maà gbɛjɛ jiida ku ce, nɔ i ya maa sobi njɛ ŋa, domi dimii kuwee bɛɛbɛ í ya dɔ̃a Ilaaɔ̃ si.

¹⁷ I gbɔ idei woo cua nŋɛ ŋa nɔ i sũ nŋa iri ilɛ, domi à waa cɔ baanii hunde nŋɛ ŋa si na iyi í jɔ̀ Ilaaɔ̃ á na ku bee ŋa ideɛ. I ce bɛɛbɛ ŋa ku ba a coo do inɔ didɔ̃, ku maà ti ku jɛ do inɔ kufɔ. Bii à coo do inɔ kufɔ, kaa ce nŋɛ aranfãani kãma.

¹⁸ I ya ce nwa kutɔɔ ŋa. À mà kãm kãm iyi idɔ nwa kù waa yɛ taale nwa domi à bi ka ce isɛɛnɛ nwa dee dee si mii fei.

¹⁹ Iyi ǹ wa n tɔɔ ŋɛ ntɔ ntɔ, nŋui í jɛ i ce kutɔɔ Ilaaɔ̃ ku jɔ̀ n baa ńya ńya bi tu ŋɛ má.

Kutɔɔ

²⁰ Lafɛ̃ɛ nwa Jesui í jɛ Woo degbe iyi í re. Na njɛɛ iyi í nikã, í jilɛ nwa akabuu titɔ̃ iyi ci ya tã. Na nŋu Ilaaɔ̃ ilu laakai ku sũ, nŋu iyi í dedeɛ hai si balɛ,

²¹ ku mu nŋɛ gbugbã i ceò daa jiida ŋa ku ba i ce idɔɔbiɛ. Nɔ ku ce si ŋɛ mii iyi á dɔ̃aa si na saabui Jesu Kirisi. Amboe ku jɛ ti Jesu Kirisi hee do ajɔ fei. Ami.

Fɔɔi ankãanyi

²² Iŋɛ inɛm ŋa, ǹ wa n tɔɔ ŋɛ i jɔ̀ i gbɔ idei gbugbã ku mua iyi ǹ kɔ nŋɛ wa si tiau ihɛ̃ do temua, domi kù sɔ.

²³ Ǹ bi i mà ŋa iyi à da Timɔtee inɛ nwau hai piisɔ̃ɔ. Bii í to wa ńya, an naaɛ wa bi tu ŋɛ.

²⁴ I ce woo cua nŋɛ ŋa fei fɔɔ hee do inɛ ŋa iyi à jɛ ti Ilaaɔ̃ fei. Woo dasi Jesu naanɛi ilɛi Itali ŋa à ce ŋɛ fɔɔ.

²⁵ Didɔ̃i Ilaaɔ̃ ku wɛɛ do iŋɛ fei.