Ebɛɛ 12 - Bibeli do fee

Ilaaɔ̃ Baa nwa

¹ Na nŋu, si na iyi í jɔ̀ woo jɛ sɛɛda nkpɔu bɛ wa kaako wa, awa mɔ ka nyɔ mii iyi wa bitandi wa si kuwɛɛ nwa do dulum iyi ci ya kpɛtɛ ku mási wa dim dim. Nɔ ka temua si kpãai kuwɛɛ iyi wa degbe wa bɛi woo sɛi í ya temua si areɛ.

² Ka dasi laakai nwa fei si Jesu. Hai bi tɛɛi naanɛ ku dasi nwa wa naa, nŋu mɔi í nɔ wa kɔ̃ɔ. Í jɛsi à kpaa si jĩi ku gaau, kù cɔ anyɔi dimii ikuu domi wa cɔ kpãai inɔ didɔ̃ iyi à jilɛaa. Nsɛi, wa buba si awɔ njɛi kitãi bommai Ilaaɔ̃.

³ I jɔ̀ i lasabu si mii iyi Jesu í ce, si bɛi í temua do mbɛɛtɛ nlau hee í jɛsi ilu dulum ŋa à kpaa. I mu ideu ŋa ku ba i maà kua gbugbã ŋa nɔ i maà mɔngɔ munya ŋa.

⁴ Iŋɛ, si kujabu nŋɛ do dulum, i kù jabu i kù to hee si iku titã ŋa,

⁵ nɔ ì gbɛjɛ idei gbugbã iyi à mu nŋɛ waati iyi à kɔ à ni, amam, bii Aɔ̃ Lafɛ̃ɛ wa kpãɛ iju, ikɔi wa naɛ, maà ce si atafii. Inɔɛ ku maà fɔ bii wa fɔ siɛ ide,

⁶ domi inɛ iyi Aɔ̃ Lafɛ̃ɛ í bi, nŋui í ya kpã iju, nɔ ku cã inɛ ŋa iyi í doo si amaɛ ŋa fei.

⁷ Na nŋu, i temua do ijuukpã nŋɛ domi Ilaaɔ̃ wa ce nŋɛi bɛi amaɛ ŋa. Ama yoomai í wɛɛ iyi baaɛ ci ya kpãa iju.

⁸ Bii a kù kpã ŋɛ iju bɛi amu ŋa iyi à gbe, debɛi i kù jɛ amai Baaba ŋa, iŋɛ ama seege ŋai.

⁹ Baa nwa ŋa iyi à wa ilɛ ihɛ̃ à ya kpã wa iju à ya ka nɔ ka jirima ŋa. Bii bɛɛbɛi, bɛirei iri ilɛ ku sũa Baa nwa iyi í wa leleu í nɛ ku to ku ba ka nɛ kuwɛɛ.

¹⁰ Baa nwa ŋa à ya kpã wa iju si waati keeke si bɛi í sĩa nŋa si. Amma Ilaaɔ̃ í ya kpã wa iju na aranfãani nwa ku ba ka nɛ ikpɛ̃ si kumáɛ.

¹¹ Ntɔi, bii à waa kpã wa iju, inɔ kufɔi í ya jɛ nwa titã, ci ya jɛ inɔ didɔ̃. Amma si anyii nŋu, inɛ ŋa iyi à ba ijuukpãu nɔ à kpaasi, à ya jɛ dee dee nɔ a jɛ kuwɛɛ nŋa si laakai ku sũ.

¹² Na nŋu, awɔ nŋɛ ŋa do ilugũ nŋɛ ŋa iyi à gbɛɛji ŋau i mu nŋa gbugbã ŋa.

¹³ Nɔ i cea isɛ nŋɛ ŋa kpãa iyi í munga anu ŋa ku ba ilu kutɛ bɔ̃ɔ ŋa a maà tambɔ kutɛ nŋa ŋau má, amma a ba iri.

Ide iyi à sɔ̃ woo dasi naanɛ ŋa a ce

¹⁴ I dɛ laakai ku sũ do inɛ fei nɔ i ce kuwɛɛ iyi í má ŋa domi inɛ gɔ kù wɛɛ iyi á yɛ Lafɛ̃ɛ bii kuwɛɛɛ kù má.

¹⁵ I ce laakai ŋa kãma nŋɛ ku maà na ku toa didɔ̃i Ilaaɔ̃ anyi, nɔ i maà jɛ ilu inɔ kuro ŋa, domi inɔ kurou á na ku la nɔ ku tosi inɛ nkpɔ bɛi icãi jĩi í ya yɔ.

¹⁶ I ce laakai ŋa ku ba inɛ gɔ ku maà ce sakara, nɔ inɛ gɔ ku maà na ku kɔ̀ ku mà bɛɛrɛi mii jiida ŋa. Bɛɛbɛi Esau í ce waati iyi í so yemma ku jɛɛ í taa na ijɛ jɛɛ akã.

¹⁷ Si anyii nŋu, iŋɛ taka nŋɛ ì mà ŋa iyi í bi baai nŋu ku weea nŋu, amma baaɛu í kɔ̀, nɔ Esau kù ba kpãa ku kpaasi mii iyi í tako í ce baa do iyi wa dɛdɛɛ do cikãaju fei.

¹⁸ Iŋɛ, kù jɛ iri kuta gɔ iyi aa yɔkɔ a lui ì sɛkɛɛ si ŋa, bɛi inɛi Izirɛli ŋa à sɛkɛɛ si iri kutai Sinai. Si antaii iri kutai Sinaiu ina nla nlai í wa bɛ do kudũi ijĩ do ilu kuku do fufu nla nla,

¹⁹ do kãakãakĩ do ide ku fɔ nla nla. Iyi inɛi Izirɛli ŋau à gbɔ ide ku fɔu à tɔɔ suuru à ni ku maà ti ku ba aŋa ide ku fɔ má,

²⁰ domi à waa ce njoi wooda iyi í ni, ilu hunde baa yooma iyi í lu iri kutau, baa bii mɛɛmui, aa taa kuta a kpaai.

²¹ Mii iyi à yɛ bɛ, í nɛ njo hee Moizi í fɔ í ni, njo í mum hee ǹ wa n yaya.

²² Amma iŋɛ, iri kutai Siɔ̃ɔi ì sɛkɛɛ si ŋa, bii ilui Ilaaɔ̃ nŋu iyi í wɛɛ í wa. Iluu, nŋui í jɛ Zeruzalɛmui lele, tengi bii amaleka ŋa à ya tɔtɔɔ nkpɔ nkpɔ do inɔ didɔ̃.

²³ Ì sɛkɛɛ si inɛ ŋa iyi à kɔ iri nŋa lele ŋa, aŋa iyi à jɛ ama yemmai Ilaaɔ̃ ŋa. Ì sɛkɛɛ si Ilaaɔ̃ ŋa, nŋu iyi í jɛ woo kiitii inɛ fei, nɔ ì sɛkɛɛ si inɛ dee deei tako ŋa iyi Ilaaɔ̃ í jɔ̀ à kɔ̃ tã ŋa.

²⁴ Ì sɛkɛɛ si Jesu do njɛɛ iyi í nikãu ŋa. Jesui í jɛ woo teese kpãa ku ba Ilaaɔ̃ ku dĩ akabuu titɔ̃ do amanɛ ŋa. Njɛɛui wa ba wa ide ku fɔ, nɔ ideɛ í dɔ̃ ku gbɔ í re ti Abɛli.

²⁵ Na nŋu, i ce laakai ŋa i maà kɔ̀ ku gbɔ idei inɛ iyi wa ba ŋɛ ide ku fɔ ŋa. Moizi í ba inɛ ŋa ide ku fɔ si andunyau ihɛ̃ í ni a ce laakai, nɔ inɛ ŋa iyi à kɔ̀ ku gbɔ ideɛu a kù fita si ijuukpã. To, awa mɔ iyi à waa gbɔ inɛ iyi wa fɔ ide wa hai lelei Aɔ̃, bɛirei aa ka ce ka fita si ijuukpã bii à waa toaa anyi.

²⁶ Inɛ iyi ide ku fɔɛ í tako í jɔ̀ ilɛ í yayau, í fɔ má nsɛi í ni, an nyi n yaya ilɛ má gbakã akã amma kù jɛ ilɛ nŋu akã, hee do lele feii.

²⁷ Iyi í ni, an nɔ n coo má gbakã akã, wa nyisi iyi mii iyi à taka á yaya nɔ ku lɔ ku ba mii iyi kaa yaya ku wɛɛ.

²⁸ Na nŋu, ka saabu Ilaaɔ̃ domi à nɛ bomma iyi kaa yaya nɔ ka tɔɔɛ si bɛi í bi nɔ ka mà bɛɛrɛɛ ka jirimaɛ.

²⁹ Ntɔi, Aɔ̃ Lafɛ̃ɛ nwa í yɛi bɛi ina iyi í ya ce nfei mii ŋa.