Ebɛɛ 11 - Bibeli do fee

Kpãai naanɛ ku dasi

¹ Inɛ iyi í dasi Jesu naanɛ í mà kãm kãm mii iyi nŋu wa cɔ kpãaɛu nŋu á baa. Í nɔ í mà mii iyi a kù yɛ do iju í wɛɛi do ntɔ.

² Naanɛ ku dasi dimi bɛɛbɛi inɛi tako ŋa à nɛ, ŋɔi í jɔ̀ kuwɛɛ nŋa í sĩaa Ilaaɔ̃ si.

³ Na naanɛ ku dasii à mà iyi Ilaaɔ̃i í taka andunya do ideɛ. Bɛɛbɛi í taka mii iyi à waa yɛ hai si mii iyi a kù waa yɛ.

⁴ Na naanɛ ku dasii, Abɛli í cea Ilaaɔ̃ kuwee iyi í nɛ bɛɛrɛ í re ti Kaɛ̃ɛ. Na saabui naanɛ ku dasiɛi Ilaaɔ̃ takaɛ í jɛsi amuaɛ nɔ í kpoo inɛ dee dee. Na naanɛ ku dasiui Abɛli wa ba wa ide ku fɔ hee nsɛi baa do iyi í ku fei.

⁵ Na naanɛ ku dasii, Enɔku kù kú, Ilaaɔ̃ í soo ku wa bi tɛɛ, nɔ inɛ gɔ kù yɔɔ do iju má. Waati iyi í wa si andunya, à ya maa jɛ sɛɛdaɛ iyi kuceɛ í dɔ̃a Ilaaɔ̃ si.

⁶ Nɔ wee inɛ gɔ kù wɛɛ iyi kuceɛ á dɔ̃a Ilaaɔ̃ si bii kù jɛ do naanɛ ku dasi. Ntɔi, inɛ iyi wa sɛkɛɛ si Ilaaɔ̃ í nɛ ku dasi naanɛ iyi Ilaaɔ̃ í wɛɛ nɔ inɛ ŋa iyi à waa dɛdɛɛ í ya sã nŋa ribaɛ.

⁷ Na naanɛ ku dasii, Nowee í gbɔ idei Ilaaɔ̃ waati iyi í ni ku ce laakai si mii iyi á na ku naa iyi kù yɛ titã. Í jirima idei Ilaaɔ̃ nɔ í gbe akɔi inyi si bii nŋu do inɛi kpasɛ̃ɛ ŋa fei aa ba faaba. Do yaase bɛɛbɛi í yɛò taalei inɛi andunya ŋa nɔ Ilaaɔ̃ í ni í jɛ amanɛ dee dee.

⁸ Na naanɛ ku dasii, Aburahamu í jɛ́ò kukpei Ilaaɔ̃ nɔ í dasi kpãa wa nɛ ikpa ilɛ gɔ iyi Ilaaɔ̃ á náa bɛi tubu. Í dasi kpãa wa koo baa do iyi kù mà bii wa bɔ.

⁹ Na naanɛ ku dasii í koo í buba si ilɛu bɛi isɛ mmu, si ilɛ iyi Ilaaɔ̃ í ceaa kuwãɛ. Si ilei acɔ ŋa mɔm nii í wa. Bɛɛbɛ mɔi Izaaki do Zakɔbu à ce si anyiɛ, aŋa iyi Ilaaɔ̃ í cea kuwã akãu.

¹⁰ Aburahamu í ce bɛɛbɛi wa degbeò ilu nla iyi icuɛ í nɛ gbugbãu. Iluu, Ilaaɔ̃i í jilɛ yaase bɛi á yɛ, nŋui á nɔ ku maa.

¹¹ Na naanɛ ku dasii, Sara takaɛ í ba gbugbã í bíò ama baa do iyi waatiɛ í lɔ, si na iyi í jɔ̀ í mà iyi Ilaaɔ̃, nŋu iyi í ce kuwã, í jɛ ilu naanɛ.

¹² Bɛɛbɛ mɔi inɛmɔkɔ akãu bɛ, nŋu iyi í maai iku, tɔkuɛ ŋa à na à kpɔ bɛi leleaɔ̃ ŋa do bɛi sãai ido iyi inɛ gɔ kaa yɔkɔ ku ka ku mà jiaɛ.

¹³ Si naanɛ ku dasii, inɛ ŋau bɛ fei à ku. A kù ba mii iyi Ilaaɔ̃ í ce nŋa kuwãɛu, amma à yɔɔi hai jĩijĩ à coo cenkã. À fɔ iyi aŋa à jɛ inɛ njoo ŋa do hai nɛ ide ŋa si andunyau ihɛ̃.

¹⁴ Inɛ ŋa iyi à waa fɔ bɛɛbɛ, à waa nyisi mam mam iyi aŋa à waa dɛ ilɛ iyi á jɛ tu ŋai.

¹⁵ Bii í jɛ à waa ce bɛgɛi ide nŋa iyi à jɔ̀ wa wo, aa ba kpãa a sinda a nyi.

¹⁶ Amma nsɛi à waa dɛ ide iyi í sĩa í re, waatɔ ide iyi í wa lele. Na ŋɔi í ce anyɔ kù waa mu Ilaaɔ̃ a kpoo Lafɛ̃ɛ nŋa domi í ce nŋa sɔɔlui ilu gɔ.

¹⁷ Na naanɛ ku dasii, Aburahamu í jɛsi ku ceò Izaaki kuwee si waati iyi Ilaaɔ̃ wa cɔ laakaiɛ. Nŋu iyi Ilaaɔ̃ í cea kuwãu, í tã sɔɔlu ku ceò ama akãɛu kuwee.

¹⁸ Nŋui Ilaaɔ̃ í sɔ̃ wo í ni, hai bi Izaakii dimiɛ á fita.

¹⁹ Ì mà iyi Ilaaɔ̃ í nɛ gbugbã ku jĩ inɛ baa hai si balɛ. Do ntɔ aa ka yɔkɔ ka ni í yɛi bɛi Ilaaɔ̃ í jũu hai si balɛ.

²⁰ Na naanɛ ku dasii, Izaaki í weea Zakɔbu do Esau, í sɔ̃ ŋa mii iyi á na ku ce.

²¹ Na naanɛ ku dasii, Zakɔbu waati iyi í maai iku í weea amai Zozɛfu ŋa akã akã, nɔ í lɔ́kɔ̀ si golo í tɔɔò Ilaaɔ̃.

²² Na naanɛ ku dasii, Zozɛfu mɔ waati iyi í maai iku í fɔ idei kufitai inɛi Izirɛli ŋa hai ilɛi Ezibiti do bɛi aa cea kũkũi nŋu ŋa.

²³ Si waati iyi à bí Moizi, na naanɛ ku dasii, baaɛ ŋa a kù ce njoi a kua woodai ilaalui Ezibiti nɔ à singaɛ zakai cukpa mɛɛta, domi à yɛ í jɛ ama kusĩa.

²⁴ Na naanɛ ku dasii, Moizi í kɔ̀ a kpe nŋu amai ama inaaboi Faraɔ̃ ilaalui Ezibiti waati iyi í na í la.

²⁵ Í gbasi a kpã nŋu iju do inɛi Ilaaɔ̃ ŋa ajɔ do iyi nŋu á maa wɛɛò inɔ didɔ̃ si faayii dulum iyi kaa kpɛ.

²⁶ Í gbasi a yaako nŋu bɛi aa na a yaako Kirisi. Wa lasabu iyi dimii yaako bɛɛbɛ ku yɛ í nɛ bɛɛrɛ í re amanii Ezibiti, domi amanii alai wa lele.

²⁷ Na naanɛ ku dasii, Moizi í fita hai ilɛi Ezibiti, kù ce njoi idɔɔkɔ̃i ilaaluu. Í leekĩi dim dim bɛi mii iyi í yɛ inɛ iyi a ci ya yɛ.

²⁸ Na naanɛ ku dasii í jɔ̀ à jɛ jingaui Iku ku kua. Nɔ í jɔ̀ à fãsi njɛi angudã ŋa si andɛ koofa ŋa ku ba amaleka iyi á kpa ama yemma ŋa ku maà lu amai Izirɛli ŋa.

²⁹ Na naanɛ ku dasii, inɛi Izirɛli ŋa à kua Tenku Nkpau si ilɛ ngbɛ. Amma waati iyi inɛi Ezibiti ŋa à bi a ce bɛɛbɛ, inyi í jɛ ŋa.

³⁰ Na naanɛ ku dasii bindii Zeriko í cuku waati iyi inɛi Izirɛli ŋa à kaako iluu ajɔ mɛɛje.

³¹ Na naanɛ ku dasii, Rahabu abo à ta icuu kù ku do inɛ ŋa iyi a kù jirima Ilaaɔ̃ ajɔ, si na iyi í jɔ̀ í gba woo bɛ ŋau do inɔ akã.

³² Mii an fɔ má. Waati kù waa tom hee n ce faajii Zedeɔ̃ do ti Baraki do Samusɔ̃ɔ do Zɛfutee do Davidi do Samuɛli do walii ŋau.

³³ Na naanɛ ku dasii à jɛ amanlu ŋau igũ, à ce iyi í jɛ dee dee, nɔ à ba à gba mii iyi Ilaaɔ̃ í ce nŋa kuwãɛ. À dĩ gɛlɛi muusu nla ŋa,

³⁴ à kpa gbugbãi ina nla, à ba à fita hai si awɔi inɛ ŋa iyi à waa dɛ a kpa ŋa do taakuba. À kua gbugbã wo, amma à na à ba gbugbã má. À waa ce njo nŋa si igũ, à jɛ dimi mmu ŋa igũ.

³⁵ Na naanɛ ku dasii, inaabo gɔ ŋa à ba inɛ nŋa ŋa à jĩ wa hai si iku. Inɛ gɔ nŋa ŋa mɔ, baa do iyi à kpã ŋa iju hee à ku, a kù dɛ aŋa a fita si, domi à waa bi aŋa a na a koo a ba kuwɛɛ iyi í jɛ jiida í re.

³⁶ À yaako inɛ gɔ ŋa nɔ à tɛ nŋa kpɔtɔɔ. À dĩ inɛ gɔ ŋa do sesee à dasi ŋa piisɔ̃ɔ.

³⁷ À ta inɛ gɔ nŋa ŋa kuta à kpa ŋa, inɛ gɔ nŋa ŋa mɔ à bu ŋa kiti minji, gɔgɔ nŋa ŋa mɔ à kpa ŋa do taakuba. Inɛ gɔ nŋa ŋa mɔ à dĩ batai angudã do batai iwo à waa dabiiò. A kù nɛ nkãma, à kpã ŋa iju, à wahala ŋa,

³⁸ kuwɛɛ nŋa í nɛ bɛɛrɛ í re ti inɛi andunya ŋa. À ya maa dabii si gbabua do si antaii iri kuta ŋa. À wa si isai kuta ŋa do isai ilɛ ŋa.

³⁹ Inɛ ŋau fei, à jɛ nŋa sɛɛda jiida na naanɛ ku dasi nŋa. Do nŋu fei, a kù ba kuwã iyi Ilaaɔ̃ í ceu.

⁴⁰ Ntɔi, si bɛi Ilaaɔ̃ í jilɛ nwa mii iyi í nɛ bɛɛrɛ í re, kù bi inɛ ŋau a kɔ̃ dee dee iyi kù jɛ do awa ajɔ.