Ebɛɛ 10 - Bibeli do fee

¹ Woodai Moizi idei mii ŋa iyi à jɔ mii jiida ŋa iyi aa na a naai wa fɔ, kù jɛ mii jiida ŋau taka nŋa. Na nŋu, inɛ ŋa iyi à waa sɛkɛɛ si Ilaaɔ̃ do kuwee ŋa iyi à ya maa ce dimi akã adɔ̃ do adɔ̃ hai nɛ kɔɔ, woodau bɛ kaa yɔkɔ ku jɔ̀ a kɔ̃ mam mam.

² Bii í jɛ yaasei Ilaaɔ̃ ku tɔɔ bɛɛbɛi á jɔ̀ inɛ ŋau a má wo, idɔ nŋa kaa yɛ taale nŋa nɔ a kaa nɛ bukaatai a maa ce kuwee má.

³ Amma kuweeu, í jɛ mii gɔ iyi í ya ye inɛ ŋa gigii dulum du ŋa adɔ̃ do adɔ̃.

⁴ Ntɔ ntɔ, njɛi kɛtɛ do ti iwo ŋau kaa yɔkɔ ku kpa idei dulum.

⁵ Na nŋu, waati iyi Kirisi í bi ku naa si andunya í sɔ̃ Ilaaɔ̃ í ni, kù jɛ kuwee walakɔ amua ŋai ì bi. Na ŋɔi í jɔ̀ ì ceem ara.

⁶ Kù jɛ kuwee ŋa iyi à ya jo si ina fei sãa sãa walakɔ kuwee iyi à ya ce na dulum dii inɛ ŋai á dɔ̃ɛ si.

⁷ Si anyii nŋu nɔ ǹ ni, amu wee Ilaaɔ̃. Ǹ wa n naai n na n ce idɔɔbiɛ si bɛi à kɔ idem si tiai wooda.

⁸ Sinte titã Kirisi í ni, kù jɛ kuwee walakɔ amua ŋai ì bi. Kù nɔ kù jɛ kuwee ŋa iyi à ya jo si ina fei sãa sãa walakɔ iyi à ya ce na dulum nii á dɔ̃ɛ si. Do nŋu fei kuwee ŋa iyi wa fãau à waa cooi si bɛi wooda í jilɔɔ.

⁹ Si anyii nŋu í ni, ǹ wa n naai n na n ce idɔɔbiɛ. Si bɛɛbɛi í kpa irii kutɔɔ nwou nɔ ì kpaasiɛ do mmuɛ.

¹⁰ Si bɛi Jesu Kirisi í ce idɔɔbii Ilaaɔ̃, na ŋɔi í jɔ̀ aa ka yɔkɔ ka má hai si dulum du wa ŋa na saabui kuweei araɛ iyi í ce gbakã akã hee do ajɔ fei.

¹¹ Woo wee fei í ya maa ce icɛɛi ajɔ baa yooma fei. Nɔ tuuba nkpɔ nkpɔ kuwee akãu bɛi í ya maa ce nɔ kaa yɔkɔ ku kpa idei dulum.

¹² Amma kuwee akãi Kirisi í ce na irii dulum. Si anyii nŋu, í koo í buba si awɔ njɛi Ilaaɔ̃ hee do ajɔ fei,

¹³ wa degbe ajɔ iyi Ilaaɔ̃ á ce mbɛɛɛ ŋa bi ku lesi isɛɛ.

¹⁴ Á yɔkɔ ku maa bubaɛ si na iyi í jɔ̀ kuwee akãui í jɔ̀ inɛ ŋa iyi Ilaaɔ̃ í ce inɛɛ ŋa à má mam mam hee do ajɔ fei.

¹⁵ Hundei Ilaaɔ̃ mɔ wa jɛ nwa sɛɛdai ideu. Sinte titã í ni,

¹⁶ Aɔ̃ Lafɛ̃ɛ í ni, akabuu iyi an dĩ do aŋa si anyii ajɔ nŋu wee. An dasi woodam si idɔ nŋa. An kɔɔ si lasabu nŋa.

¹⁷ Nɔ í ni má, n kaa n ye gigii dulum du ŋa do wooda ku kua nŋa má.

¹⁸ Debɛi, bii à kpa idei dulum, kù nɛ a ce kuwee gɔ na iriɛ má.

Ka sɛkɛɛ si Ilaaɔ̃

¹⁹ Na nŋu, iŋɛ inɛm ŋa, aa ka yɔkɔ ka lɔ si inɔ ile iyi í re do kumáu do idɔ ku buba na saabui njɛi Jesu.

²⁰ Waati iyi Jesu í na araɛ, waati bɛɛbɛi í nya nwa kpãa titɔ̃ iyi í jɛ ti kuwɛɛ, nɔ ridoo kãma kaa gɛɛ wa má.

²¹ Nɔ à nɛ woo wee nla iyi í jɛ inɛ ngboi kpasɛ̃i Ilaaɔ̃.

²² Na nŋu, ka sɛkɛɛ si Ilaaɔ̃ do idɔ hai nɛ muafiti do naanɛ ku dasi hai nɛ sika, do idɔ kumá iyi kù waa yɛ taale nwa do ara iyi à wɛ do inyi iyi í má.

²³ Ka jɔ̀ ka leekĩ dim dim si kpãa ku cɔ iyi à waa jɛ sɛɛdaɛu ihɛ̃, domi Ilaaɔ̃, nŋu iyi í ce kuwã í jɛ ilu naanɛ.

²⁴ Ka ce laakaii njɛ ku ba ka ya mua njɛ gbugbã iyi á jɔ̀ ka bi inɛ ŋa nɔ ka maa ce icɛ jiida.

²⁵ Ka maà ti ka jɔ̀ idei kutɔtɔɔ nwa ŋa si bɛi inɛ gɔ ŋa à ya maa ce. Amma ka ya maa mua njɛ gbugbã. Bɛi ì yɛ ajɔi Lafɛ̃ɛ wa maai wa fei, bɛɛbɛ mɔi aa ya maa muaò njɛ gbugbã ŋa.

²⁶ Awa iyi à mà ntɔ tã, bii à waa ce dulum si idɔɔbi nwa, kuwee gɔ kù wɛɛ má iyi á kpa idei dulum,

²⁷ í gbe ka wɛɛò njo ka maa degbe kiitii Ilaaɔ̃ do ina nla iyi á ce nfei mbɛɛɛ ŋa.

²⁸ Inɛ baa yooma iyi í kua woodai Moizi fei, bii amanɛ minji mɛɛta í jɛ sɛɛdaɛ à ya kpaai, a ci ya ce araareɛ.

²⁹ Debɛi, inɛ iyi wa donda Amai Ilaaɔ̃ wa cɔ njɛɛ nfe, njɛ si bii Ilaaɔ̃ í dĩ akabuuɛ iyi á jɔ̀ lafɛ̃ɛ ku má, nɔ wa bu Hundei Ilaaɔ̃ iyi wa nyisi wa didɔ̃u, i cɔ zaka bɛi mii iyi á na ku ba lafɛ̃ɛ si ajɔi kiitiu á to.

³⁰ Ntɔ ntɔ, awa à mà inɛ iyi í fɔ í ni, amui an sãa inɛ laalɔ iyi í ce, amui an kpã woo ce laalɔ iju. Nɔ í ni má, amu Aɔ̃ Lafɛ̃ɛ an kiiti inɛm ŋa.

³¹ Ideu í to njo nla nla bii amanɛ í dasi awɔi Ilaaɔ̃, nŋu iyi í wɛɛ.

³² I ye gigi mii iyi í tako í ba ŋɛ wo ŋa si waati iyi ì yɛ inya kumái Ilaaɔ̃ ŋa, ì ba ijuukpã ŋa ntɔ ntɔ amma ì leekĩ si dim dim ŋa.

³³ Waati gɔ ŋa à ya maa bu ŋɛ nɔ à kpã ŋɛ iju si bantuma, nɔ si waati gɔ ŋa mɔ ì ya maa mua inɛ gɔ ŋa iyi à waa yɛ dimii wahalau bɛ gbugbã ŋa.

³⁴ Ntɔi, ì ce araarei inɛi piisɔ̃ɔ ŋa. Iyi inɛ ŋa à nɔ à gba mii ndu ŋɛ ŋa ì jɛ ŋai do inɔ didɔ̃, domi ì mà ŋa iyi ì nɛ amani iyi í re do bɛɛrɛ iyi í ya maa wɛɛ do ajɔ fei.

³⁵ Na nŋu, i maà fũsi naanɛ iyi ì dasi awɔ ŋa, domi ribaɛ í la.

³⁶ Do ntɔ, í gbe i temua ŋa ku ba bii ì ce idɔɔbii Ilaaɔ̃ ì tã ŋa, i ba mii iyi í ce nŋɛ kuwãɛ.

³⁷ Ntɔi, si bɛi kukɔi idei Ilaaɔ̃ wa fɔ í ni, waati í gbe keeke, kekeeke mɔm. Nɔ inɛ iyi í nɛ ku naa á naa, kaa kpɛ.

³⁸ Nɔ inɛm iyi í jɛ dee dee, á maa wɛɛ do saabui naanɛ ku dasi. Amma bii í nyi do anyi, inɔm kaa dɔ̃ do nŋu má.

³⁹ Awa a kù jɛ inɛ ŋa iyi aa nyi do anyi a koo a ce nfe. Amma à dasi naanɛ nɔ à wa si kpãai faaba.