Ebɛɛ 1 - Bibeli do fee

Ilaaɔ̃ í jɔ̀ Amai nŋu takaɛ í ba wa ide ku fɔ

¹ Tako bala nwa ŋa à gbɔ ide ku fɔi Ilaaɔ̃i hai si gɛlɛi waliiɛ ŋa isɛ fɛɛfɛlo si kpãa ikã ikã.

² Amma si waatii ankãanyiu ihɛ̃ awa à gbɔ ide ku fɔi Ilaaɔ̃i hai si gɛlɛi Amaɛ takaɛ. Amaui Ilaaɔ̃ í cica ku jɛ woo jɛ tubui mii fei, nŋu iyi aŋaò à taka andunya.

³ Amboe iyi Ilaaɔ̃ í nɛ fei, si Amaɛi à yɔɔ. Amau í jɔ Ilaaɔ̃ takaɛ dee dee, í nɔ wa mu mii fei do gbugbãi ideɛ. Waati iyi í ce icɛ iyi á kpa idei dulum dii inɛ ŋa í tã, ŋɔi í koo í buba lele si awɔ njɛi Ilaaɔ̃ ilu gbugbã fei.

Amai Ilaaɔ̃ í re amaleka* ŋa

⁴ Si bɛi Ilaaɔ̃ í na Amaɛu iri iyi í re ti amaleka ŋa, bɛɛbɛ mɔi Amau takaɛ í re amaleka ŋa.

⁵ Do ntɔ, Ilaaɔ̃ kù sɔ̃ inɛ akãi amaleka ŋau kù ni, awɔi ì jɛ Amam. Hai nnyi ǹ jɛ baaɛ. Kù nɔ kù jɛ amaleka gɔi wa fãa iyi í ni, an jɛ baaɛ, nɔ nŋu mɔ ku jɛ amam.

⁶ Amma waati iyi Ilaaɔ̃ í bɛ ama yemmaɛ wa si andunya í ni, amalekam ŋa fei a gulɛaa.

⁷ Ide iyi Ilaaɔ̃ í fɔ na irii amaleka ŋau wee. Í ni, ǹ ce amalekam ŋai bɛi fufu, woo ce icɛm ŋau mɔ bɛi amɛi ina.

⁸ Amma Amaɛi wa fãa iyi í ni, awɔi ì jɛ Ilaaɔ̃. Ǹ jilɛ bommaɛ hee do ajɔ fei. Dee dee ku jɛi í jɛ akpai bommaɛ.

⁹ Ì bi jiida nɔ ì cé laalɔ. Na ŋɔi í ce amu Ilaaɔ̃ ǹ cicaɛ, awɔ Ilaaɔ̃. Do inɔ didɔ̃ ǹ tontooɛ ikpo si iri ǹ nyaa ikã hai si inɔi kpaasi ŋa.

¹⁰ Nɔ í sɔ̃ɔ má í ni, awɔ Lafɛ̃ɛ, hai sinte awɔi ì jilɛ icui ilɛ. Do awɔɛi ì ceò lele.

¹¹ Fei ndɛɛ á ce nfe amma awɔi aa wɛɛ. Lele do ilɛ fei á gboi bɛi ibɔ.

¹² Awɔi aa taabu ŋa bɛi jĩnɛ. Aa nɔ a kpaasii bɛi à ya kpaasi ibɔ. Amma awɔ i kaa kpaasi, nɔ kuwɛɛɛ kaa kpa iri.

¹³ Ilaaɔ̃ kù nɔ kù sɔ̃ amalekaɛ gɔ kù ni, buba do ikpa awɔ njɛm ihɛ̃ hee n ce mbɛɛɛ ŋa bi ku lesi isɛɛ.

¹⁴ Debɛi, mii amaleka ŋa à jɛ. Aŋa fei à jɛ hunde ŋa iyi à waa cea Ilaaɔ̃ icɛ. Aŋai í ya bɛ a koo a sobi inɛ ŋa iyi aa ba faaba.