Wooda ku kɔsi 9 - Bibeli do fee

Inɛi Izirɛli ŋa a kù tia dimi mmu ŋa

¹ Iŋɛ inɛi Izirɛli ŋa, i gbɔ ŋa, nnyi aa kua idoi Zuudɛ̃ɛu ŋa nɔ i koo i gba ilɛi dimi ŋa iyi à la à re ŋɛ nɔ à nyi à re ŋɛò gbugbã máu. Ilɛu í nɛ ilu nla ŋa nɔ bindiɛ ŋa à gboka hee lele.

² Zamaai iluu í la, nɔ kaasãanɛ ŋai. Dimii Anaku ŋa iyi ì màu do iyi ì gbɔ à ni inɛ gɔ kaa yɔkɔ ku leekĩ si waju nŋau,

³ nnyi, Aɔ̃ Lafɛ̃ɛ nŋɛ, nŋu takaɛi á cua nŋɛ bɛi ina ku kpa amanɛ, nɔ nŋui á kpa ŋa, nŋui á kaye ŋa si waju nŋɛ nɔ i lele ŋa ŋa. Aa kpa ŋai anu akã bɛi Aɔ̃ Lafɛ̃ɛ í sɔ̃ ŋɛu.

⁴ Waati iyi Aɔ̃ Lafɛ̃ɛ í lele ŋa hai si waju nŋɛ, i maà ti i fɔ si idɔ nŋɛ i ni, na dee dee ku jɛ nwai Aɔ̃ Lafɛ̃ɛ í jɔ̀ à lɔ si ilɛu. Ntɔ ntɔ Aɔ̃ Lafɛ̃ɛ wa lele inɛi ilɛ ŋau hai si waju nŋɛi na laalɔ ku jɛ nŋa.

⁵ Kù jɛ na dee dee ku jɛ nŋɛ, walakɔ na idɔ nŋɛ iyi í mái Aɔ̃ Lafɛ̃ɛ í jɔ̀ ì ba ì buba si ilɛi inɛ ŋau ŋa, amma Aɔ̃ Lafɛ̃ɛ í lele inɛ ŋau hai si waju nŋɛi na laalɔ ku ce nŋa, ku ba ì yɛ ntɔi ide iyi Aɔ̃ Lafɛ̃ɛ í sɔ̃ Aburahamu do Izaaki do Zakɔbu bala nŋɛ ŋau do kugbasi.

⁶ Debɛi í sĩa i mà ŋa iyi kù jɛ na dee dee ku jɛ nŋɛi í jɔ̀ Aɔ̃ Lafɛ̃ɛ í mu nŋɛ ilɛ jiida iyi ì bau bɛ ŋa, domi iŋɛ taka nŋɛ, idɔ nŋɛ í le.

Kurarai zamaau si idei ama kɛtɛ iyi à ce do wura

⁷ I ye gigii yaase bɛi ì dede idɔɔkɔ̃i Aɔ̃ Lafɛ̃ɛ nŋɛ si gbaau ŋa. Hai ajɔ iyi ì fita wa hai ilɛi Ezibitiu hee ì toò wa inyau ihɛ̃ ŋa, ì ya maa ce ide ku kɔ̀ ŋai si Aɔ̃ Lafɛ̃ɛ.

⁸ Hai bi iri kutai Ɔrɛbu ì dede idɔɔkɔ̃i Aɔ̃ Lafɛ̃ɛ ŋa hee í lɔ zaka hee nŋu takaɛ í bi ku kpa ŋɛ wo.

⁹ Waati iyi ǹ gũ iri kutau ǹ bɔ kuta si bii Aɔ̃ Lafɛ̃ɛ í dĩ akabuuɛ do iŋɛu ku gba wa, ajɔ ciiji do idũ ciijii ǹ ce si iri kutau iyi n kù jɛ sɔnda kãma hee má jɛ n mɔ inyi

¹⁰ nɔ Aɔ̃ Lafɛ̃ɛ í nam kuta minji si bii nŋu takaɛ í kɔ si do amaawɔɛ. Si kuta minji ŋaui ide ŋa iyi í sɔ̃ ŋɛ si iri kutau fei hai si aninii inau à wa waati iyi zamaau í tɔtɔɔu.

¹¹ Si kɔɔi ajɔ ciiji do idũ ciijiui Aɔ̃ Lafɛ̃ɛ í nam kuta minji ŋa si bii í kɔ idei akabuuu.

¹² Ŋɔi Aɔ̃ Lafɛ̃ɛ í sɔ̃m hai si iri kutau í ni, dede, kita gbãa gbãa hai ihɛ̃, domi wee inɛɛ ŋa iyi ì nya wa hai ilɛi Ezibitiu à ce dulum nla nla. Kù kpɛ mɔm inɛ ŋau à jɔ̀ kpãa iyi ǹ nyisi ŋau, nɔ à cea ara nŋa iwɛ̃ do isɔ gɔ iyi à yɔ.

¹³ Nɔ Aɔ̃ Lafɛ̃ɛ í nyi í sɔ̃m má í ni, ǹ yɔɔ iyi inɛ ŋau ihɛ̃ ilu idɔ ku le ŋai.

¹⁴ Na nŋu, jɔ̀ n kpa ŋa fei sãa sãa nɔ n kpa iri nŋa si ilɛ ihɛ̃, nɔ n jɔ̀ hai bi tɛɛ dimi mmu iyi í nɛ gbugbã í re ku fita, nɔ ku kpɔ ku re inɛ ihɛ̃ ŋau ihɛ̃.

¹⁵ Ŋɔi ǹ sinda ǹ wa n kita wa hai antaii iri kuta iyi í yɛ bɛi inau, do kuta minji ŋa iyi ǹ wa n mu si awɔm ŋa si bii à kɔ idei akabuui Aɔ̃ Lafɛ̃ɛu.

¹⁶ Nɔ ǹ yɔɔ iyi ntɔ ntɔ ì ce dulum ŋai si wajui Aɔ̃ Lafɛ̃ɛ, domi ì cea ara nŋɛ mii iyi í jɔ ama kɛtɛ do isɔ iyi ì yɔ ŋa, nɔ ì jɔ̀ kpãa iyi Aɔ̃ Lafɛ̃ɛ í nyisi ŋɛu gbãa gbãa ŋa.

¹⁷ Na ŋɔi í jɔ̀ ǹ ta kuta minji ŋa iyi ǹ wa n muu ilɛ ǹ lɛgɛ ŋa si waju nŋɛ.

Ama kɛtɛi wura

¹⁸ Si anyiɛ ŋɔi ǹ sɛɛbata si wajui Aɔ̃ Lafɛ̃ɛ bɛi ǹ tako ǹ ce ajɔ ciiji do idũ ciiji n kù jɛ sɔnda gɔ hee má jɛ n mɔ inyi na irii dulum ŋa iyi ì ce ŋau, si bɛi ì ce laalɔ ŋa si wajui Aɔ̃ Lafɛ̃ɛ hee ì jɔ̀ idɔɛ í kɔ̃ si ŋɛu.

¹⁹ Ntɔ ntɔ njo í mum iyi ǹ yɛ bɛi idɔi Aɔ̃ Lafɛ̃ɛ í kɔ̃ si ŋɛ, idɔɔkɔ̃ɛu í la hee í caa hee wa lasabu nŋu ku kpa iŋɛ fei sãa sãa. Amma do nŋu fei iyi ǹ nyi ǹ tɔɔ Aɔ̃ Lafɛ̃ɛ má, í gbɔ kutɔɔm.

²⁰ Idɔɔkɔ̃ iyi Aɔ̃ Lafɛ̃ɛ í wɛɛò si gãmɛi Arɔ̃ɔ í la ntɔ ntɔ hee wa bi ku kpaa, nɔ ǹ nyi ǹ tɔɔ Aɔ̃ Lafɛ̃ɛ suuru má na iriɛ.

²¹ Ŋɔi ǹ so ama kɛtɛ iyi ì ce ŋa iyi í jɛ icɛi dulum nɔu ǹ dasi ina. Si anyiɛ, iyi í gbeu ǹ lɛgɛɛ hee í baa í ce fufu puta puta nɔ ǹ so ǹ kosi acãi inyi iyi wa kita hai si antaii iri kutau.

²² Hai Tabera do Masa do Kiboroti-Taava ì dede idɔɔkɔ̃i Aɔ̃ Lafɛ̃ɛ ŋa.

²³ Waati iyi ì wa Kadɛsi-Baanea ŋa, Aɔ̃ Lafɛ̃ɛ í sɔ̃ ŋɛ í ni i dede i koo i gba ilɛ iyi nŋu í mu nŋɛu i buba si ŋa. Amma i kù jirima woodaɛu ŋa, i kù dasiɛ naanɛ ŋa, nɔ i kù jirima ideɛu ŋa.

²⁴ Hai waati iyi ǹ mà ŋɛ, ì ya maa ce ide ku kɔ̀ ŋai si Aɔ̃ Lafɛ̃ɛ.

²⁵ Amma waati iyi Aɔ̃ Lafɛ̃ɛ wa bi ku kpa ŋɛ, ǹ sɛɛbatai si wajuɛ ajɔ ciiji do idũ ciiji.

²⁶ Nɔ ǹ tɔɔɛ ǹ ni, Aɔ̃ Lafɛ̃ɛ, maà kpa zamaaɛu, tubuɛ iyi ì ya do awɔ gbugbãɛ ì jɔ̀ í fita wa hai ilɛi Ezibitiu.

²⁷ Ye gigii Aburahamu do Izaaki do Zakɔbu woo ce icɛɛ ŋau, maà cɔ idɔ kulelei inɛ ŋau ihɛ̃, maà cɔ laalɔ ku ce nŋa, nɔ i maà cɔ dulum du ŋa

²⁸ ku ba inɛi ilɛ hai bii ì nya ŋa wau a maà na a ni, si na iyi í jɔ̀ awɔ Aɔ̃ Lafɛ̃ɛ i kaa yɔkɔ i bɔò ŋa si ilɛ iyi ì tako ì wã ŋa dou, walakɔ si bɛi ì cé ŋa, ŋɔi í jɔ̀ ì koo ì kpa ŋa si gbaau.

²⁹ Nɔ wee do nŋu fei inɛ ŋau inɛɛ ŋai, nɔ à jɛ tubuɛ iyi ì koo ì fitaò wa do gbugbã nlaɛ.