Wooda ku kɔsi 8 - Bibeli do fee

Aɔ̃ Lafɛ̃ɛ í kɔ inɛi Izirɛli ŋa si gbaau

¹ Moizi í nyi í ba zamaau ide ku fɔ má í ni, wooda ŋa iyi ǹ sɔ̃ ŋɛ nnyiu ihɛ̃ fei, i ceò fei ndɛɛ icɛ ŋa. Nŋui á jɔ̀ i maa wɛɛ ŋa, nɔ i baa i jɛ zamaa nla nla ŋa, nɔ ku jɔ̀ i yɔkɔ i lɔ si ilɛ iyi Aɔ̃ Lafɛ̃ɛ í cea bala nŋɛ ŋa kuwãɛ do kugbasiu.

² I ye gigii isɛɛnɛ sisɔ iyi Aɔ̃ Lafɛ̃ɛ nŋɛ í jɔ̀ ì ce ŋa adɔ̃ ciiji si gbaau ku ba ku cɔ laakai nŋɛ nɔ ku mà mii iyi í wa si idɔ nŋɛ, nɔ ku mà bii í jɛ aa yɔkɔ i jirima woodaɛ ŋa walakɔ bii í jɛ i kaa yɔkɔ ŋa.

³ Aɔ̃ Lafɛ̃ɛ í jɔ̀ ì ba wahala ŋa ntɔ ntɔ. Í jɔ̀ ari í kpa ŋɛ. Amma si anyiɛ, í wo ŋɛ do dimii sɔnda gɔ iyi à ya kpe mana iyi i kù tako i kù mà ŋa wo, nɔ bala nŋɛ ŋa mɔ a kù màa, ku ba ku nyisi ŋɛ iyi amanɛ ci ya wɛɛ na ijɛ nŋu akã. Amma amanɛ í ya wɛɛi na ide iyi Aɔ̃ Lafɛ̃ɛ wa fɔ fei.

⁴ Ibɔ nŋɛ ŋa a kù gbo, nɔ kutɛ nŋɛ ŋa a kù wu si adɔ̃ ciijiu.

⁵ I jɔ̀ i mà ŋa iyi Aɔ̃ Lafɛ̃ɛ í kɔ ŋɛi bɛi baa í ya kɔ amaɛ.

⁶ I ya jirima woodai Aɔ̃ Lafɛ̃ɛ nŋɛ ŋa, i ya ce isɛɛnɛ nŋɛ bɛi nŋu takaɛ í bi nɔ i ya jirimaɛ ŋa.

Kulɛlɛ ŋa iyi aa naa si ilɛ iyi Aɔ̃ Lafɛ̃ɛ í ce nŋɛ kuwãɛu

⁷ Aɔ̃ Lafɛ̃ɛ nŋɛ á jɔ̀ i lɔ si ilɛ jiida ŋa, ilɛ bii inyi í wa do isɔ̃ ŋa do ido ŋa iyi à cã à waa dasi lɔɔma ŋa do iyi à waa cã wa hai iri kuta ŋa.

⁸ Ilɛ gɔi bii bilee í ya fita do ɔɔzu do jĩi ndii rezɛ̃ɛ ŋa do ti figi do ti gerenadi do ti olivi nɔ í nɛ nyikɔ̃.

⁹ Sɔnda nŋɛ kaa nɛ ku kaye si ilɛu, nɔ i kaa kua nkãma ŋa. Hai si kutai ilɛu aa yɔkɔ a nya isɔ ŋa wa, nɔ hai si iri kutaɛ ŋau aa nya isɔ danya ŋa wa.

¹⁰ Waati iyi ì ba sɔnda ì jɛ ì yo ŋa, aa saabu Aɔ̃ Lafɛ̃ɛ nŋɛi ntɔ ntɔ si bɛi í mu nŋɛ ilɛ jiidau.

¹¹ Nɔ i ce laakai ntɔ ntɔ i maà na i gbɛjɛ Aɔ̃ Lafɛ̃ɛ nŋɛ hee i na i kua wooda ikã ikãɛ ŋa iyi ǹ na ŋɛ nnyiu ihɛ̃.

¹² Aa ba sɔnda iyi aa jɛ ŋa nkpɔ nkpɔ. Aa ma ile kusĩa ŋa bii aa wa ŋa.

¹³ Waati iyi kɛtɛ nŋɛ ŋa do angudã nŋɛ ŋa do iwo nŋɛ ŋa do isɔ fũfũ nŋɛ ŋa do wura nŋɛ ŋa do amani dimi ikã ikã nŋɛ ŋa fei aa kpɔ a maa kɔ̃ɔsi,

¹⁴ i ce laakai i maà na i jɛ ilu faau ŋa hee i na i gbɛjɛ Aɔ̃ Lafɛ̃ɛ nŋɛ iyi í nya ŋɛ wa hai ilɛi Ezibiti bii ì tako ì waa jɛ aru ŋa wo.

¹⁵ Nŋui í gbã ŋɛ wa ì kuaò gbaa nla nla ku nɛ zigiida bii njo ku nɛ acĩ ŋa à waa kɔ̃ do cencee ŋa. Si inya iyi kù nɛ nkãmau bɛi í jɔ̀ inyi í fita nŋɛ wa hai si kuta kulele gɔ.

¹⁶ Nŋui í jɔ̀ í ba dimii sɔnda gɔ iyi à ya kpe mana iyi bala nŋɛ ŋa a kù màu ì jɛ ŋa. Í jɔ̀ ì ba wahala ŋa ku ba ku cɔ laakai nŋɛ, nɔ ku ce nŋɛ sɔɔlui kuwɛɛ si ididɔ̃ do waju.

¹⁷ I ce laakai i maà na i fɔ si idɔ nŋɛ i ni, si gbugbã nwa do kookaai nwai à baò amani ŋau ihɛ̃.

¹⁸ I ya ye gigi ŋa iyi Aɔ̃ Lafɛ̃ɛ nŋɛi í mu nŋɛ gbugbã ì bɛi ì baò amani ŋau bɛ ŋa. Nɔ do yaase bɛɛbɛi í nyi í sìsí wa nyisiò ntɔi akabuu iyi í dĩ do bala nŋɛ ŋau.

¹⁹ Bii ì gbɛjɛ Aɔ̃ Lafɛ̃ɛ nŋɛ, nɔ ì sinda ì nyi ikpa bi iwɛ̃ ŋa, nɔ ì koo ì waa tɔɔ ŋa ŋa, nɔ ì waa gulɛ nŋa ŋa, ǹ wa n sɔ̃ ŋɛi nnyi iyi ntɔ ntɔ aa ku ŋai.

²⁰ Aa ku ŋai bɛi inɛi ilɛ ŋa iyi Aɔ̃ Lafɛ̃ɛ á kpa si waju nŋɛ ŋau, si na iyi í jɔ̀ i kù gbɔ ide ku fɔi Aɔ̃ Lafɛ̃ɛ nŋɛ ŋa.