Wooda ku kɔsi 7 - Bibeli do fee

Aɔ̃ Lafɛ̃ɛ í cica inɛi Izirɛli ŋai a jɛ zamaaɛ

¹ Moizi í nyi í ba zamaau ide ku fɔ má í ni, Aɔ̃ Lafɛ̃ɛ nŋɛi á gbã ŋɛ ku bɔò ŋɛ si ilɛ bii aa koo i buba si ŋau. Waati iyi ì maai bɛ ŋa, nŋui á lele nŋɛ zamaa nkpɔ nkpɔ gɔ ŋa. Zamaau, dimi ikã ikã mɛɛje gɔ ŋai iyi à re ŋɛò gbugbã, nɔ akpɔ nŋa í re ŋɛ. Inɛ ŋau inɛi Hɛti ŋai do inɛi Girigasi ŋa do inɛi Amɔre ŋa do inɛi Kanaã ŋa do inɛi Ferɛzi ŋa do inɛi Hɛvi ŋa do inɛi Zebusi ŋa.

² Waati iyi Aɔ̃ Lafɛ̃ɛ á da nŋɛ inɛ ŋau si awɔ, aa jɛ ŋa igũ ŋai, nɔ iŋɛò ŋa i maà dĩ akabuu ŋa. Aa kpa aŋa fei ŋai, i maà ce araare nŋa ŋa.

³ I maà jɔ̀ iŋɛò ŋa i nɛ anu akã si gãmɛi abɔdɔ̃ ŋa. I maà jɔ̀ ama inaabo nŋɛ ŋa a so mɔkɔ si inɔ nŋa ŋa, nɔ i maà jɔ̀ ama inɛmɔkɔ nŋɛ ŋa a so ama inaabo nŋa ŋa a ce abo.

⁴ Bii kù jɛ bɛɛbɛ, inɛ njoo ŋau bɛ aa na a jɔ̀ ama nŋɛ ŋau a sinda a toa Aɔ̃ Lafɛ̃ɛ anyi a koo a maa tɔɔ iwɛ̃ ŋa, nɔ idɔɔkɔ̃ɛ á na ku dede si ŋɛ, nɔ á kpa ŋɛ kaa kpɛ mɔm.

⁵ Bɛi ì nɛ i ce nŋa ŋa wee. I kɛkɛ bi kuwee nŋa ŋau, i lɛgɛ kuta ŋa iyi à mau, nɔ i kɛkɛ jĩi ndii iwɛ̃ nŋa ŋa iyi à ya kpe Aserau nɔ i dasi ina i joo ŋa.

⁶ Ntɔ ntɔ iŋɛi ì jɛ dimi iyi à nya ikã í jɛ ti Aɔ̃ Lafɛ̃ɛ. Aɔ̃ Lafɛ̃ɛ nŋɛ í cica ŋɛi ku ba i jɛ titɛɛ ŋa si inɔi dimii inɛi andunya ŋau ihɛ̃.

Dee dee ku jɛi Aɔ̃ Lafɛ̃ɛ si idei akabuuɛ

⁷ Bii Aɔ̃ Lafɛ̃ɛ í bi ŋɛ hee í cica ŋɛ, kù jɛ a ni akpɔ nŋɛi í re inɛ mmu ŋa iyi à gbe si andunya ihɛ̃ fei. Zamaa nŋɛ mɔm nii í kere í re inɛ mmu ŋa iyi à gbe fei.

⁸ Amma Aɔ̃ Lafɛ̃ɛ í cica ŋɛi si na iyi í jɔ̀ í bi ŋɛ nɔ í bi ku kɔ̃ kuwã iyi í cea bala nŋɛ ŋa do kugbasiu. Aɔ̃ Lafɛ̃ɛ í nya ŋɛ wai do awɔ gbugbãɛ, nɔ í faaba ŋɛ hai bii ì waa jɛ aru ŋa wo si awɔi Faraɔ̃ ilaalui Ezibitiu.

⁹ I jɔ̀ i mà ŋa iyi Aɔ̃ Lafɛ̃ɛ nŋu akãi í jɛ Ilaaɔ̃ nɔ í jɛ Lafɛ̃ɛ nŋɛ do ntɔ. Nŋui í jɛ dee dee, í nɛ araare, nɔ akabuuɛ í ya maa wɛɛi hee koo to si tɔku dubusia bi inɛ ŋa iyi à buu nɔ à waa jirima woodaɛ ŋa.

¹⁰ Amma inɛ ŋa iyi à cóo, í ya kpã ŋa ijui tengi bɛ gbakã gbãa gbãa ku jɔ̀ a ku.

¹¹ Debɛi i maà ce atafii si idei woodaɛ ikã ikã ŋa iyi ǹ na ŋɛ nnyiu ihɛ̃. I ceò fei ndɛɛ icɛ ŋa.

¹² Bii ì ce laakai ì waa gbɔ idei woodaɛ ŋau ŋa, bii ì waa jirima ŋa ì waa ceò icɛ ŋa, Aɔ̃ Lafɛ̃ɛ nŋɛ á jɔ̀ araareɛ do akabuu iyi í dĩ do bala nŋɛ ŋau a maa wɛɛi.

¹³ Si kubiɛ, á jɔ̀ mii ŋa iyi ì waa ce ŋa fei a maa bɔ do waju. Á wee nŋɛ, nɔ ku jɔ̀ i kpɔ i maa kɔ̃ɔsi ŋa, nɔ iko nŋɛ ŋa aa ya ce amaajɛ jiida, nɔ á wee si bilee nŋɛ ŋa, do vɛ̃ɛ nŋɛ ŋa do ikpo nŋɛ ŋa. Á jɔ̀ kɛtɛ gaa nŋɛ ŋa do angudã nŋɛ ŋa do iwo nŋɛ ŋa a kpɔ a maa kɔ̃ɔsi waati iyi aa lɔ si ilɛ iyi í cea bala nŋɛ ŋa kuwãɛ í ni nŋu á muu nŋɛu.

¹⁴ Iŋɛi aa ba kuwee i re dimi fei ŋa. Inɛmɔkɔ walakɔ inaabo kãma kaa jɛ gbɛnda si inɔ nŋɛ hee má jɛ si inɔi mɛɛmu gaa nŋɛ ŋa.

¹⁵ Aɔ̃ Lafɛ̃ɛ á jɔ̀ bɔ̃ɔ baa yooma fei ku jĩò ŋɛ. Kaa jɔ̀ bɔ̃ɔ walakɔ dimii wahala iyi í naa si ilɛi Ezibitiu kãma ku naa si ŋɛ. Amma á jɔ̀ ku naai si inɛ ŋa iyi à cé ŋɛ ŋau fei.

¹⁶ Inɛ ŋa iyi Aɔ̃ Lafɛ̃ɛ í da nŋɛ si awɔ fei, aa kpa ŋa ŋai, i maà ce araare nŋa, nɔ i maà tɔɔ iwɛ̃ nŋa ŋau, domi nŋu bɛi á na ku jɛ nŋɛ bɛi cɛkũm.

Aɔ̃ Lafɛ̃ɛi í jɛ woo degbe inɛɛ ŋa

¹⁷ Á yɔkɔ ku jɛ aa maa lasabu si idɔ nŋɛ i maa ni ŋa, inɛ ŋau ihɛ̃ à re waò gbugbã, bɛirei aa ka ce ka yɔkɔ ka lele ŋa.

¹⁸ I maà ce njo nŋa ŋa. I ye gigii mii iyi Aɔ̃ Lafɛ̃ɛ nŋɛ í cea ilaalu Faraɔ̃ do inɛi Ezibiti ŋau fei ŋa.

¹⁹ Iŋɛ fei ì yɛ laakai ku cɔ kulele ŋa iyi í jɔ̀ í naa si ŋa, do maamaake nla nla ŋa iyi í ce. Ì nɔ ì yɛ gbugbã nlaɛ iyi í nya ŋɛò wa hai si ilɛu. Bɛɛbɛ mɔi Aɔ̃ Lafɛ̃ɛ nŋɛ á nɔ ku cea inɛ ŋa iyi ì waa ce njo nŋa ŋau bɛ fei ŋa.

²⁰ Aɔ̃ Lafɛ̃ɛ á jɔ̀ angãgã goofã ŋa a naa si ŋa hee inɛ ŋa iyi à waa sa à waa manji ŋau fei a kpa iri.

²¹ Debɛi i maà jɔ̀ njo ku mu ŋɛ na iri nŋa má ŋa, domi Aɔ̃ Lafɛ̃ɛ nŋɛ nŋu iyi í wa anini nŋɛ í la nɔ í to a ce njoɛ.

²² Bii ì waa ce amɛɛ wa ŋa, Aɔ̃ Lafɛ̃ɛ nŋɛi á maa lele inɛ ŋau bɛ kpɛlɛ kpɛlɛ hee a jĩò waju nŋɛ. I kaa yɔkɔ i kpa ŋa anu akã ŋa. Ntɔ ntɔ bii ì kpa ŋa anu akã ŋa, mɛɛmui sako ŋau aa na a kpɔ a caa si ŋɛ.

²³ Amma Aɔ̃ Lafɛ̃ɛ nŋɛi á da nŋɛ inɛ ŋau si awɔ. Á jɔ̀ njo ku mu ŋai nɔ aŋa fei a sa hee a koo a ceò nfe.

²⁴ Á da nŋɛ ilaalu nŋa ŋau si awɔ, nɔ i kpa mii iyi á jɔ̀ a ye gigi nŋa fei si ilɛu ihɛ̃ ŋa. Kãma nŋa kaa leekĩ si waju nŋɛ. Aa ce nfe nŋa ŋai fei mam mam.

²⁵ Aa dasi mii ŋa iyi à jɔ iwɛ̃ nŋa ŋa iyi à gbe ŋau fei ina ŋai. I maà jɔ̀ kɔdɛɛ nŋɛ ku lɔ si isɔ fũfũ do wura iyi à daa iwɛ̃ nŋa ŋau si ku ba mii ŋau bɛ a maà na a jɛ nŋɛ cɛkũm, domi mii ŋau bɛ fei, Aɔ̃ Lafɛ̃ɛ wa cɔ ŋa mii laalɔi.

²⁶ I maà ya lɔò mii laalɔ dimi bɛɛbɛ kãma inɔ kpasɛ̃ nŋɛ ŋa, domi bii ì ce bɛɛbɛ ŋa, aa na a ce nfei iŋɛ do mii nɔu fei ajɔ ŋa. Na nŋu, mii dimi bɛɛbɛ fei, aa lɛgɛɛi mam mam, nɔ i mà iyi mii laalɔi ŋa.