Wooda ku kɔsi 6 - Bibeli do fee

Ì nɛ i bi Aɔ̃ Lafɛ̃ɛ nŋɛi

¹ Wooda ikã ikã ŋa iyi Aɔ̃ Lafɛ̃ɛ í ni amu Moizi n kɔ ŋɛ si mbɛ ku ba i ceò icɛ ŋa si ilɛ bii aa na i koo i buba ŋa ku jɛ tu ŋɛu.

² Do yaase bɛɛbɛi si kuwɛɛ nŋɛ fei aa jirimaò Aɔ̃ Lafɛ̃ɛ nŋɛ nɔ i ceò wooda ikã ikãɛ ŋa iyi ǹ na ŋɛu icɛ ŋa, iŋɛ do ama nŋɛ ŋa do tɔku nŋɛ ŋa ku ba hunde nŋɛ ku sɔ.

³ Debɛi iŋɛ inɛi Izirɛli ŋau, i de itĩ i gbɔ ide ŋau nɔ i ceò icɛ ŋa ku ba i jɛ ilu inɔ didɔ̃ ŋa, nɔ akpɔ nŋɛ ku maa kɔ̃ɔsi jiida jiida bɛi Aɔ̃ Lafɛ̃ɛi bala nŋɛ ŋa í fɔ si gãmɛi ilɛ bii amɔ do nyikɔ̃ wa kɔ̃.

⁴ Iŋɛ inɛi Izirɛli ŋa i sotĩ i gbɔ, Aɔ̃ Lafɛ̃ɛ nwa nŋu akãi í jɛ Ilaaɔ̃.

⁵ I bi Aɔ̃ Lafɛ̃ɛ do idɔ nŋɛ fei, do lasabu nŋɛ fei, do gbugbã nŋɛ fei.

⁶ Nɔ wooda ŋa iyi ǹ wa n na ŋɛ nnyiu ihɛ̃ fei, si idɔ nŋɛ ŋai aa wa.

⁷ Aa ya kɔ ama nŋɛ ŋa sii bii ì wa ide ì waa buba ŋa. Aa ya sisi nŋa idei woodaui bii ì waa bɔ ilu ŋa, walakɔ bii ì waa sũ ŋa, walakɔ bii ì waa dede ŋa.

⁸ Aa dĩ woodaui si ikpa nŋɛ walakɔ si ikpo nŋɛ ku ba i maà na i gbɛjɛɛ ŋa.

⁹ Aa kɔɔi si jĩi ndii gamboi ile nŋɛ do si ti gamboi anu koofai ilu nŋɛ ŋa.

Inɛi Izirɛli ŋa a kù nɛ a gbɛjɛ Aɔ̃ Lafɛ̃ɛ nŋa

¹⁰ Waati iyi Aɔ̃ Lafɛ̃ɛ nŋɛ á na ku gbã ŋɛ ku bɔò ŋɛ si ilɛ iyi í mu nŋɛu si bɛi í cea Aburahamu do Izaaki do Zakɔbu bala nŋɛ ŋa kuwãɛ do kugbasiu, aa ba ilu nla nla kusĩa ŋa iyi kù jɛ iŋɛi ì ma ŋa ŋa,

¹¹ do kpasɛ̃ ŋa iyi amani dimi ikã ikã fei wa kɔ̃ si iyi kù jɛ iŋɛi ì dɛdɛɛ, do lɔgɔ ŋa iyi kù jɛ iŋɛi ì tuu ŋa, do ikoi jĩi ŋa iyi kù jɛ iŋɛi ì lɔ ŋa. Waati iyi aa ba sɔnda ŋau bɛ i jɛ i yo ŋa,

¹² i ce laakai i maà ti i na i gbɛjɛ Aɔ̃ Lafɛ̃ɛ nŋɛ, nŋu iyi í nya ŋɛ wa hai ilɛi Ezibiti bii ì tako ì waa jɛ aru ŋa wo.

¹³ Na nŋu, i jɔ̀ i mà bɛɛrɛi Aɔ̃ Lafɛ̃ɛ nŋɛ nɔ i ya gulɛ i tɔɔ nŋu akã ŋa, nɔ kugbasi iyi ì waa ce, i ya coo do iriɛ ŋa.

¹⁴ Nɔ i maà ya nyi i koo i maa tɔɔ iwɛ̃i inɛ ŋa iyi à kaako ŋɛ ŋau ŋa,

¹⁵ domi Aɔ̃ Lafɛ̃ɛ nŋɛ iyi í wa anini nŋɛu, nŋu akãi í jɛ Aɔ̃ Lafɛ̃ɛ nŋɛ. Debɛi i ce laakai i maà na i dede idɔɔkɔ̃ɛ ŋa, si na iyi í jɔ̀ á yɔkɔ ku kpa ŋɛ mam mam si ilɛu ihɛ̃.

¹⁶ I maà ya maa sii Aɔ̃ Lafɛ̃ɛ nŋɛ si bɛi ì tako ì ce ŋa wo waati iyi ì wa Masa ŋa.

¹⁷ I jirima ideɛ ŋa mam mam do ikɔɛ ŋa, do woodaɛ ŋa iyi í na ŋɛ.

¹⁸ I ya ce mii iyi í tɛ do iyi á dɔ̃a Aɔ̃ Lafɛ̃ɛ si ŋa, ku ba i jɛ ilu inɔ didɔ̃ ŋa, nɔ i ba i buba si ilɛ jiida iyi Aɔ̃ Lafɛ̃ɛ í cea bala nŋɛ ŋa kuwãɛ do kugbasi,

¹⁹ waati iyi á lele nŋɛ mbɛɛ nŋɛ ŋa bɛi nŋu takaɛ í fɔu.

²⁰ Bii ama nŋɛ ŋa à na à bee ŋɛ ajɔ akã à ni, yoomai í jɛ yaasei ide ŋau ihɛ̃, do wooda ŋau ihɛ̃, do ikɔ ŋau ihɛ̃ iyi Aɔ̃ Lafɛ̃ɛ nwa í na ŋɛ,

²¹ aa jɛa ama nŋɛ ŋaui i ni ŋa, à tako à waa jɛ aru ŋai wo bi ilaalu Faraɔ̃ si ilɛi Ezibiti nɔ Aɔ̃ Lafɛ̃ɛ í koo í nya wa wa hai ilɛi Ezibitiu do awɔ gbugbãɛ.

²² Nɔ Aɔ̃ Lafɛ̃ɛ í ce maamaake ŋa do nyinda ŋa nla nla si waju nwa iyi í naa inɛi Ezibiti ŋa do Faraɔ̃ do inɛi kpasɛ̃ɛ ŋau ijuukpã nla nla wa.

²³ Ŋɔi Aɔ̃ Lafɛ̃ɛ í gbã wa í fitaò wa hai bɛ, ku ba ku mu nwa ilɛ iyi í tako í cea bala nwa ŋa kuwãɛ do kugbasiu.

²⁴ Na ŋɔi í jɔ̀ í ni ka jirima wooda ŋa iyi nŋu í na wa ŋau fei. Nɔ í ni aa ka ya ka maa wɛɛò inɔ didɔ̃i waati kãma fei bii à waa jirima nŋu, nɔ nŋu á jɔ̀ ka maa wɛɛ si hundei bɛi à wɛɛ nnyiu ihɛ̃.

²⁵ Ntɔ ntɔ, bii à waa ceò wooda ŋa iyi Aɔ̃ Lafɛ̃ɛ í na wa ŋau icɛ, isɛɛnɛ nwa á jɛ dee dee bɛi Aɔ̃ Lafɛ̃ɛ í bi.