Wooda ku kɔsi 5 - Bibeli do fee

Wooda mɛɛwa ŋau

¹ Moizi í tɔtɔɔ inɛi Izirɛli ŋau fei nɔ í sɔ̃ ŋa í ni, i de itĩ i gbɔ wooda ikã ikã ŋa iyi an na ŋɛ nnyi. I kɔkɔ wooda ŋau ŋa nɔ i ceò icɛ ŋa dee dee.

² Aɔ̃ Lafɛ̃ɛ nwa í dĩ akabuu do awa bi iri kutai Ɔrɛbu.

³ Kù jɛ do bala nwa ŋa aŋa akãi Aɔ̃ Lafɛ̃ɛ í dĩ akabuuu ihɛ̃ má, amma do awa iyi à wɛɛ si hunde nnyiu ihɛ̃i.

⁴ Aɔ̃ Lafɛ̃ɛ í ba ŋɛ ide ku fɔ ijuò iju si antaii iri kutau si aninii inau.

⁵ Amui ǹ wa si afei Aɔ̃ Lafɛ̃ɛ do iŋɛ ku ba n maa n sisi nŋɛ idei Aɔ̃ Lafɛ̃ɛu, domi ì waa ce njoi inau ŋa nɔ i kù waa bi iri kutau ku gũ ŋa. Aɔ̃ Lafɛ̃ɛ í sɔ̃ ŋɛ í ni,

⁶ amui ǹ jɛ Aɔ̃ Lafɛ̃ɛ nŋɛ iyi í nya ŋɛ wa hai ilɛi Ezibiti hai bii ì tako ì waa jɛ aru ŋau wo.

⁷ [Na nŋu, ide iyi ǹ wa n jilɛ nŋɛ wee.] I maà tɔɔ inɛ gɔ walakɔ ngɔgɔ má ŋa bii kù jɛ amu akã.

⁸ I maà cea ara nŋɛ iwɛ̃ gɔ ŋa. Nɔ i maà gbe ngɔgɔ iyi í jɔ mii ndii lele gɔ walakɔ mii ndii ilɛ gɔ walakɔ mii gɔ si inɔ inyi ku jɛ iwɛ̃ nŋɛ ŋa.

⁹ I maà gulɛ si wajui mii bɛɛbɛ ŋa nɔ i maa tɔɔ ŋa ŋa, domi amu Aɔ̃ Lafɛ̃ɛ nŋɛ ǹ jɛ Ilaaɔ̃ iyi í ya ce igu. Inɛ ŋa iyi à cém an sã idɔɔkɔ̃i dulum du ŋa si ŋa do si ama nŋa ŋa hee ku koo si tɔku gbɛɛta walakɔ tɔku gbɛ̃ɛsia.

¹⁰ Amma inɛ ŋa iyi à bim nɔ à waa jirima woodam ŋa an ce araare nŋa hee ku koo si tɔku dubusia nŋa ŋa.

¹¹ I maà ya maa kpe irii amu Aɔ̃ Lafɛ̃ɛ nŋɛ si ide nfe nfe ŋa domi inɛ iyi wa ce bɛɛbɛ n kaa n jɔ̀ lafɛ̃ɛ iyi n kù kpãa iju.

¹² I ya jirima ajɔi kusĩmi nɔ i nyaa ikã ŋa si bɛi amu Aɔ̃ Lafɛ̃ɛ ǹ sɔ̃ ŋɛu.

¹³ Ajɔ mɛɛfai aa ya ce icɛ nŋɛ ŋa iyi ì nɛ ku ce fei ŋa.

¹⁴ Amma ajɔ mɛɛjesiau ajɔi kusĩmii. Ajɔ nŋu bɛi í jɛ ti amu Aɔ̃ Lafɛ̃ɛ nŋɛ. I maà ya ce icɛ kãma ajɔ nŋu bɛ ŋa hai iŋɛ taka nŋɛ hee do ama inɛmɔkɔ nŋɛ ŋa do ama inaabo nŋɛ ŋa hee do woo ce icɛ inɛmɔkɔ nŋɛ ŋa do woo ce icɛ inaabo nŋɛ ŋa, do kɛtɛ nŋɛ ŋa, do gbankɛlɛ nŋɛ ŋa hee ku koo si mɛɛmu nŋɛ ŋa iyi à gbe fei, hee do inɛ njoo ŋa iyi à wa kpasɛ̃ nŋɛ ŋa fei, kãma nŋa kù nɛ ku ce icɛ ajɔ nŋu bɛ, ku ba woo ce icɛ iyi ì nɛ ŋa, aŋa mɔ a sĩmi bɛi iŋɛ taka nŋɛ.

¹⁵ I ye gigi ŋa iyi arui ì waa jɛ ŋa wo si ilɛi Ezibiti, nɔ amu Aɔ̃ Lafɛ̃ɛ nŋɛ ǹ nya ŋɛ wai do awɔ gbugbãm. Na ŋɔi í jɔ̀ ǹ ni i jirima ajɔi kusĩmiu ŋa.

¹⁶ I jirima iyeò baa nŋɛ ŋa si bɛi amu Aɔ̃ Lafɛ̃ɛ ǹ sɔ̃ ŋɛu ku ba hunde nŋɛ ku sɔ nɔ i jɛ ilu inɔ didɔ̃ ŋa si ilɛ bii amu Aɔ̃ Lafɛ̃ɛ an mu nŋɛu.

¹⁷ I maà kpa amanɛ ŋa.

¹⁸ I maà ce sakara ŋa.

¹⁹ I maà ce ile ŋa.

²⁰ I maà jɛ sɛɛda ibo si gãmɛi inɛ mmu gɔ ŋa.

²¹ I maà nɛ kɔdɛɛi nkãma iyi í jɛ ti kpaasi nŋɛ gɔ, hai aboɛ, do ileɛ, do ikoɛ do woo ce icɛ inɛmɔkɔɛ do woo ce icɛ inaaboɛ, do kɛtɛɛ hee má jɛ gbankɛlɛɛ.

²² Moizi í fɔ má í ni, wooda ŋa iyi Aɔ̃ Lafɛ̃ɛ í na ŋɛ mbɛ do imu lele si iri kutau hai si aninii inau do hai si cuau do hai si kudũi ijĩ nla gɔ. Iŋɛ iyi ì tɔtɔɔ si lɔɔmai kutau ŋa, iŋɛ feii í ba ide ku fɔ, nɔ kù lesi ide mmuɛ gɔ má. Si anyii nŋu, í kɔ ide ŋaui si kuta kumunga anu minji gɔ ŋa nɔ í so í nam.

Moizii í jɛ woo fɔ idei Ilaaɔ̃

²³ Moizi í nyi í ba zamaau ide ku fɔ má í ni, waati iyi ì gbɔ imui ide ku fɔ iyi wa naa hai si kudũi ijĩu ŋa, nɔ ina wa jo si antaii iri kutau fei, inɛ ngboi dimi nŋɛ ŋau do woo cua nŋɛ ŋau, aŋa fei à naa bi tom,

²⁴ nɔ à ni, Aɔ̃ Lafɛ̃ɛ nwa í nyisi wa kulaɛ do amboeɛ, nɔ à gbɔ imuɛ hai si aninii ina. Ajɔ nŋu bɛ, à yɔɔ iyi Aɔ̃ Lafɛ̃ɛ á yɔkɔ ku ba inɛ ide ku fɔ nɔ lafɛ̃ɛ kú kɔ ku maa wɛɛ si hunde.

²⁵ Amma nsɛi, á yɔkɔ ku jɛ aa ka na ka ku, domi ina nlau ihɛ̃ á kpa wai bii à kɔ à waa gbɔ imui Aɔ̃ Lafɛ̃ɛ nwa.

²⁶ Ntɔ ntɔ, yooi í gbɔ imui Aɔ̃ Lafɛ̃ɛ ajɔ gɔ hai si aninii ina bɛi awa nɔ í kɔ í wɛɛ si hunde.

²⁷ Awɔ Moizi, sɛkɛɛ si Aɔ̃ Lafɛ̃ɛ nwa i gbɔ bɛi wa dɔ̃ i bɛi i naa i sisi nwa awa mɔ ka bɛi ka gbɔ nɔ ka ceò icɛ.

²⁸ Ŋɔi Moizi í sɔ̃ ŋa í ni, Aɔ̃ Lafɛ̃ɛ í gbɔ ide iyi ì sɔ̃m ŋa, nɔ í sɔ̃m í ni, amu Aɔ̃ Lafɛ̃ɛ ǹ gbɔ bɛi zamaau í fɔ, nɔ à nɛ ntɔ a fɔ bɛɛbɛ.

²⁹ Bii í jɛ waati kãma fei aa ya maa jirimam wo, nɔ a maa ceò woodam ŋau fei icɛ, aŋa do tɔku nŋa ŋau fei aa ya maa wɛɛò inɔ didɔ̃i wo waati kãma fei.

³⁰ Koo i sɔ̃ ŋa a sinda a nyi bi ilei acɔ nŋa ŋa.

³¹ Amma awɔ Moizi, gbe kɔkɔm ihɛ̃, an naɛ wooda ikã ikã ŋa iyi aa koo i sɔ̃ ŋa ku ba a ceò icɛ si ilɛ iyi an mu nŋa a koo a buba siu.

³² Ŋɔi Moizi í sɔ̃ inɛ ŋau í ni, i ceò ide ŋa iyi Aɔ̃ Lafɛ̃ɛ í fɔ fei icɛ ŋa, i maà ti i sinda do awɔ njɛ hee má jɛ do awɔ canga ŋa.

³³ I too kpãa iyi Aɔ̃ Lafɛ̃ɛ nŋɛ í nyisi ŋɛ dee dee ŋa ku ba i ya maa wɛɛ si ididɔ̃ ŋa, nɔ hunde nŋɛ ku sɔ si ilɛ iyi aa na i koo i buba si ŋa ku jɛ tu ŋɛu.