Wooda ku kɔsi 4 - Bibeli do fee

Woodai Aɔ̃ Lafɛ̃ɛ ku ceò icɛ

¹ Bɛbɛi iŋɛ inɛi Izirɛli ŋa, i de itĩ i gbɔ wooda ŋa do ikɔ ŋa iyi ǹ wa n kɔ ŋɛ si. I ceò icɛ ŋa ku ba i wɛɛ, nɔ i ba ilɛ iyi Aɔ̃ Lafɛ̃ɛi bala nŋɛ ŋa á mu nŋɛu i buba si ŋa.

² I maà kɔ̃ɔsi nkãma si wooda ŋa iyi ǹ na ŋɛu, nɔ i maà kaye nkãma ŋa, amma i jirima woodai Aɔ̃ Lafɛ̃ɛ dee dee bɛi ǹ sɔ̃ ŋɛu.

³ Iŋɛ taka nŋɛ ì yɛ mii iyi Aɔ̃ Lafɛ̃ɛ í ce si idei iwɛ̃ iyi à ya kpe Baali-Peɔɔu, í kpa inɛ ŋa iyi à koo à gulɛ à tɔɔɛu fei,

⁴ amma iŋɛ iyi ì leekĩ dee dee ŋa si wajui Aɔ̃ Lafɛ̃ɛu, iŋɛ fei ì wɛɛ si hunde nnyi.

⁵ Ì mà ŋa iyi ǹ kɔ ŋɛ si wooda ikã ikã ŋa iyi Aɔ̃ Lafɛ̃ɛm í sɔ̃m fei ku ba i ceò icɛ ŋa si ilɛ bii aa na i koo i buba ŋa ku jɛ tu ŋɛu.

⁶ I jirima fei ndɛɛ nɔ i ceò icɛ ŋa, domi iyi bɛi á jɔ̀ i jɛ ilu laakai nɔ i jɛ woo mà ŋa. Nɔ inɛi ilɛ mmu ŋa iyi aa gbɔ idei wooda ŋau fei aa fɔi a maa ni, zamaa nla nlau ihɛ̃ í nɛ laakai nɔ í nɛ kumà.

⁷ Ntɔ ntɔ dimi mmu gɔ mɔ í wɛɛ má iyi iwɛ̃ɛ ŋa à wa kɔkɔɛ bɛi Aɔ̃ Lafɛ̃ɛ nwa í wɛɛ do awa waati iyi à tɔɔɛ fei?

⁸ Nɔ dimi nla nla yoomai í nɛ wooda ŋa iyi à jɛ dee dee bɛi wooda ŋa iyi ǹ wa n na ŋɛ nnyiu ihɛ̃.

Aɔ̃ Lafɛ̃ɛ í jɔ̀ à màa iri kutai Ɔrɛbu

⁹ Moizi í fɔ má í ni, iŋɛ de i ce laakai ŋa. I ce laakai ntɔ ntɔ i maà ti i gbɛjɛ mii ŋa iyi Aɔ̃ Lafɛ̃ɛ í ce iyi iŋɛ taka nŋɛ ì jɛ sɛɛdaɛ ŋa ku ba ajɔ kãma si kuwɛɛ nŋɛ mii ŋau bɛ a maà fita hai si idɔ nŋɛ. Ì nɛ i sisia ama nŋɛ ŋa mɔm nii do tɔku nŋɛ ŋa.

¹⁰ I ye gigi ŋa ajɔ iyi ì koo ì leekĩ si wajui Aɔ̃ Lafɛ̃ɛ nŋɛ si iri kutai Ɔrɛbuu ŋa waati iyi Aɔ̃ Lafɛ̃ɛ í sɔ̃m í ni, tɔtɔɔ zamaau wa bi titom, domi amu Aɔ̃ Lafɛ̃ɛ ǹ wa n bi n sɔ̃ ŋa idem ŋai ku ba a kɔkɔ ku jirimam waati iyi à wɛɛ si hunde si ilɛ ihɛ̃ fei, nɔ a kɔ tɔku nŋa ŋa mɔ si.

¹¹ Ŋɔi ajɔ nŋu ì naa ì leekĩ si isɛi iri kutau ŋa. Ina wa joi si antaii kutau fei, nɔ amɛɛ ŋa à waa bɔ hee lelei Aɔ̃. Ŋɔi ilu kuku nla nla í ce do kudũi ijĩ nla nla.

¹² Nɔ Aɔ̃ Lafɛ̃ɛ í ba ŋɛ ide ku fɔ hai si aninii inau. Ì waa gbɔ imui ide ku fɔɛ, amma i kù yɔɔ do iju ŋa. Imuɛ nŋu akãi ì waa gbɔ ŋa.

¹³ Akabuuɛ iyi í dĩ do iŋɛ, í sisi nŋɛ yaaseɛ í jɔ̀ ì màa ŋa nɔ í sɔ̃ ŋɛ í ni i jirimaɛ ŋa. Í kɔ wooda mɛɛwa si kuta minji gɔ ŋa, nɔ í ni i jirima wooda ŋau ŋa.

¹⁴ Si waati akãu bɛ mɔi Aɔ̃ Lafɛ̃ɛ í sɔ̃m í ni n kɔ ŋɛ si wooda ikã ikã ŋau ku ba i ceò ŋa icɛ si ilɛ bii aa na i koo i buba si ŋa ku jɛ tu ŋɛu.

I ce laakai do iwɛ̃ ŋa

¹⁵ Ŋɔi Moizi í sɔ̃ zamaau í ni, i ce laakai ntɔ ntɔ i maà gbɛjɛ ŋa. Ajɔ iyi Aɔ̃ Lafɛ̃ɛ í ba ŋɛ ide ku fɔ si iri kutai Ɔrɛbu hai si aninii inau, i kù yɛ nŋu takaɛ do iju ŋa.

¹⁶ Na nŋu, i maà ti i maa cea ara nŋɛ iwɛ̃ ŋa hee i dasi dulum i ceò ngɔgɔ iyi wajuɛ í jɔ inɛmɔkɔ walakɔ inaabo,

¹⁷ walakɔ bɛi wajui mɛɛmu gɔ si ilɛ ihɛ̃, walakɔ bɛi wajui yɛi gɔ,

¹⁸ walakɔ bɛi wajui mɛɛmu ku cã ilɛ gɔ, walakɔ bɛi wajui cɛ̃ɛ gɔ iyi í wa inɔ inyi.

¹⁹ I ce laakai ŋa waati iyi ì wu iju lelei Aɔ̃, bii ì yɛ inunu do cukpa do leleaɔ̃ ŋa hee do mii ŋa iyi à wa lele bɛ fei, i maà ti i gulɛ i tɔɔ ŋa. Mii ŋau bɛ, mii ŋa iyi Aɔ̃ Lafɛ̃ɛ í cea zamaa fei ikpɛ̃ɛ mbɛ si ilɛ ihɛ̃.

²⁰ Amma iŋɛ, Aɔ̃ Lafɛ̃ɛ í koo í nya ŋɛ í fitaò ŋɛ wai hai ilɛi Ezibiti iyi í yɛ bɛi tengi bii à ya dasi isɔ ina ku yɔ. Í ce bɛɛbɛi ku ba i jɛ zamaaɛ bɛi ì jɛ nnyiu ihɛ̃ ŋa.

²¹ Na iri nŋɛi idɔi Aɔ̃ Lafɛ̃ɛ í kɔ̃ sim, nɔ í fɔ do kugbasi í ni n kaa n kua idoi Zuudɛ̃ɛu, nɔ n kaa n lɔ si ilɛ jiida iyi nŋu á mu nŋɛ ku jɛ tu ŋɛu.

²² Debɛi si ilɛu ihɛ̃i an ku, nɔ n kaa n kua idoi Zuudɛ̃ɛu má. Amma iŋɛ aa kuaɛ, nɔ tu ŋɛi ilɛ jiidau á jɛ.

²³ Na nŋu, i ce laakai ŋa ku ba i maà ti i gbɛjɛ akabuu iyi Aɔ̃ Lafɛ̃ɛ nŋɛ í dĩ do iŋɛ, nɔ i maà gbea ara nŋɛ nkãma ku jɔ ngɔgɔ iyi Aɔ̃ Lafɛ̃ɛ í ganji i ce ŋau,

²⁴ domi Aɔ̃ Lafɛ̃ɛ nŋɛ í yɛi bɛi ina iyi í ya ce nfei mii ŋa nɔ í nɛ igu.

²⁵ Waati iyi ì na ì buba si ilɛ iyi à ce nŋɛ kuwãɛu ì kpɛ bɛ ŋa, bii ì na ì bí amu ŋa, nɔ ì nɛ tɔku ŋa, i maà jɔ̀ i dasi si dulum i maa cea ara nŋɛ iwɛ̃ ŋa, do mii gɔ ŋa iyi à jɔ ŋa walakɔ si mii mmu gɔ ŋa ku ce iyi kaa dɔ̃a Aɔ̃ Lafɛ̃ɛ nŋɛ si nɔ ku kɔ̃ idɔɛ.

²⁶ Hai nnyi ǹ wa n sɔ̃ ŋɛi, bii ì na ì waa ce dulum bɛɛbɛ ŋa, lele do ilɛ aŋai à jɛ sɛɛdam, nɔ i kaa na i kpɛ si ilɛ iyi ì waa bɔ ku buba si ŋa do icei idoi Zuudɛ̃ɛu. I kaa ba i buba si i kpɛ ŋa, domi aa kpa ŋɛi mam mam.

²⁷ Nɔ Aɔ̃ Lafɛ̃ɛ á fangaa ŋɛi si inɔi dimi mmu ŋa. Si dimi mmu bii aa koo i wa ŋau i kaa kpɔ ŋa.

²⁸ Tengi bɛi aa ya tɔɔ iwɛ̃ ŋa iyi amanɛ ŋa à gbe do jĩi ŋa do kuta. Iwɛ̃ ŋau a kaa yɔkɔ a yɛ ilu, nɔ a kaa gbɔ ide. A kaa yɔkɔ a jɛ nɔ a kaa gbɔ inunu.

²⁹ Hai tengi bɛi aa dɛdɛ Aɔ̃ Lafɛ̃ɛ nŋɛ, nɔ aa yɔɔ bii í jɛ ì waa dɛdɛɛ do idɔ nŋɛ fei, do hunde nŋɛ fei.

³⁰ Si waati iyi mii ŋa iyi ǹ ka ŋau bɛ fei à na à ba ŋɛ, aa wɛɛò inɔ kufɔ ŋa, nɔ aa sinda i baa bi Aɔ̃ Lafɛ̃ɛ nŋɛ, nɔ i gbɔ ideɛ ŋa,

³¹ domi Aɔ̃ Lafɛ̃ɛ nŋɛ nŋu iyi í jɛ inɛ iyi í nɛ kubi hee í caa, kaa fũsi ŋɛ awɔ, nɔ kaa kpa ŋɛ, nɔ kaa gbɛjɛ akabuu iyi í dĩ do bala nŋɛ ŋau.

Ilaaɔ̃ í cica inɛi Izirɛli ŋa

³² Ŋɔi Moizi í mɔsi ideɛ ku fɔ do inɛi Izirɛli ŋa í ni, i lasabu si mii ŋa iyi à ce hai tako ŋa wo, mii ŋa iyi à ce hai ku kpɛ hai kù jɛ zamaa nŋɛ. Mii ŋa iyi à ce hai waati iyi Aɔ̃ Lafɛ̃ɛ í taka amanɛ si andunya. I ye gigii mii ŋa iyi í ce fei wo si andunya hai ku kpɛ hai kɔɔ ihɛ̃ hee ku bɔ kɔɔ ihɔ̃. Mii mmu gɔ iyi í jɔ maamaake dimi bɛɛbɛ í ce? À gbɔ inɛ gɔ í sisi ide dimi bɛɛbɛ wo?

³³ Dimi gɔ í wɛɛ má iyi í gbɔ ide ku fɔi Aɔ̃ Lafɛ̃ɛ hai si aninii ina nɔ í kɔ í wɛɛ si hunde bɛi ì wɛɛ ŋau ihɛ̃?

³⁴ Mà iwɛ̃ gɔ í lasabu baa ajɔ akã nŋu ku naa ku nya inɛi nŋu ŋa wa hai si awɔi mbɛɛ nŋa ŋa do laakai ku cɔ gɔ ŋa do sɛɛda gɔ ŋa do maamaake gɔ ŋa do nyinda gɔ ŋa do igũ do gbugbã nla nla iyi á jɔ̀ njo ku mu inɛ ŋa bɛi Aɔ̃ Lafɛ̃ɛ nŋɛ í ce ilɛi Ezibiti si waju nŋɛ?

³⁵ Ì ba kpãa ì yɛò mii nɔu bɛ ŋai ku ba i mà ŋa iyi Aɔ̃ Lafɛ̃ɛ nŋɛ nŋu akãi í jɛ Ilaaɔ̃. Ilaaɔ̃ mmu gɔ kù wɛɛ má bii kù jɛ nŋu akãu bɛ.

³⁶ Í jɔ̀ ì gbɔ imuɛ wa hai lele ŋa ku ba ku kɔ ŋɛ, nɔ í jɔ̀ ì yɛ ina nla nla si ilɛu ihɛ̃ ŋa, nɔ ì gbɔ ide ku fɔɛ hai si aninii inau ŋa.

³⁷ Aɔ̃ Lafɛ̃ɛ í nɛ kubii bala nŋɛ ŋa, na ŋɔi í jɔ̀ í cica iŋɛ tɔku nŋa ŋa. Nŋu takaɛi í nya ŋɛ wa hai ilɛi Ezibiti do gbugbã nlaɛ,

³⁸ nɔ í lele inɛi ilɛ gɔ ŋa hai si waju nŋɛ. Inɛ ŋau à kpɔ, nɔ à re ŋɛ do gbugbã. Í ce bɛɛbɛi ku ba ku jɔ̀ i lɔ si ilɛ nŋau, nɔ ku mu nŋɛ ku jɛ tu ŋɛ.

³⁹ Nnyi í sĩa i mà ŋa nɔ i muu si idɔ nŋɛ iyi Aɔ̃ Lafɛ̃ɛ nŋɛi í jɛ Aɔ̃ Lafɛ̃ɛi lele do ti ilɛ, nɔ inɛ mmu kãma kù wɛɛ má.

⁴⁰ Na nŋu, i ceò wooda ikã ikã ŋa iyi ǹ wa n na ŋɛ nnyiu ihɛ̃ icɛ ŋa, ku ba i wɛɛò inɔ didɔ̃ ŋa, iŋɛ do ama nŋɛ ŋa do tɔku nŋɛ ŋa, nɔ ajɔ nŋɛ ŋa ku kpɔ ku kɔ̃ɔsi si ilɛ iyi Aɔ̃ Lafɛ̃ɛ nŋɛ í mu nŋɛu hee do ajɔ fei.

Ilu bi ku manji mɛɛta iyi à wa nunui daakɔi idoi Zuudɛ̃ɛu

⁴¹ Ŋɔi Moizi í cica ilu mɛɛta ikpa nunui daakɔi idoi Zuudɛ̃ɛ,

⁴² a jɛ ilu bi ku manjii inɛ iyi í kpa amanɛ iyi kù jɛ do idɔɔbiɛ nɔ idei taale gɔ kù tako kù wa si gãmɛi nŋu do inɛɛu mɔ wo. Bii í jɛ do yaase bɛɛbɛi, inɛɛu á yɔkɔ koo manji si akãi ilu ŋau bɛ ku ba ku saò hundeɛ.

⁴³ Irii ilu ŋau wee. Besɛɛ iyi í wa gbaa si antaii iri kuta ku munga anu bi inɛi Rubɛ̃ɛ ŋau do Ramɔti iyi í wa Galaadi bi inɛi Gadi ŋau do Golãa iyi í wa Basãa bi inɛi Manasee ŋau.

Moizi wa ba inɛi Izirɛli ŋa ide ku fɔ

⁴⁴ Moizi í sisia inɛi Izirɛli ŋau woodai Aɔ̃ Lafɛ̃ɛ.

⁴⁵ Í sisi nŋa mii ŋa iyi Aɔ̃ Lafɛ̃ɛ í bi, do yaase bɛi à nɛ a ce isɛɛnɛ nŋa fei do wooda ŋa si anyii kufita nŋa hai ilɛi Ezibitiu.

⁴⁶ Inɛi Izirɛli ŋau do ikpa nunui daakɔi idoi Zuudɛ̃ɛui à wa, si lɔɔma iyi í wa do wajui Bɛti-Peɔɔ si ilɛi Sioni ilaalui inɛi Amɔre ŋau. Sioni takaɛ Hɛsebɔ̃ɔi í wa, amma Moizi do inɛi Izirɛli ŋau à jɔɔ igũ,

⁴⁷ nɔ à gba ilɛɛ do ilɛi Ɔgu ilaalui Basãa. Ilaalu minjii inɛi Amɔre ŋau do ikpa nunui daakɔi idoi Zuudɛ̃ɛi à wa.

⁴⁸ Si bɛɛbɛ, inɛi Izirɛli ŋaui à buba si ilɛ iyi í wa hai Aroɛɛ si lɔɔmai Aanɔɔ hee ku bɔ iri kutai Hɛɛmɔɔ iyi à ya nyi à kpe Siriɔ̃ɔ má,

⁴⁹ nɔ nŋui í tɔtɔɔ hee do lɔɔma iyi í wa ikpa nunui daakɔi idoi Zuudɛ̃ɛu fei hee ku bɔ bi tenku iyi í wa bi isɛi kutai Pisigaau.