Wooda ku kɔsi 34 - Bibeli do fee

Ikui Moizi

¹ Hai bi gbaai Moabuu, Moizi í gũ iri kutai Nebo í bɔ hee si antaii Pisigaa si tengii Zeriko suusuu. Hai bɛi Aɔ̃ Lafɛ̃ɛ í nyisiɛ ilɛu fei. Í nyisiɛ hai ilɛi Galaadi hee ku bɔ ilɛi Dãa.

² Í nyisiɛ ilɛi Nɛfitalii fei, do ti Efaraimu do ti Manasee. Í nyisiɛ ilɛi Zudaa fei hee ku koo si tenku iyi í wa ikpa nunui alɛu.

³ Í nyisiɛ ilɛi Negɛbu, nɔ hai lɔɔmai Zuudɛ̃ɛ í nyisiɛ ilɛi Zeriko ilu nla bii kpakpa ŋa à wau hee ku bɔ ilui Soaa.

⁴ Ŋɔi Aɔ̃ Lafɛ̃ɛ í sɔ̃ɔ í ni, cɔ ilɛ iyi ǹ cea Aburahamu do Izaaki do Zakɔbu kuwãɛ do kugbasi ǹ ni an mua tɔku nŋa ŋau. Ǹ wa n nyisiɛ ilɛui, amma i kaa lɔ si.

⁵ Tengi bɛi Moizi woo ce icɛi Aɔ̃ Lafɛ̃ɛu í ku si ilɛi Moabu si bɛi Aɔ̃ Lafɛ̃ɛ í tako í fɔɔ tã wo.

⁶ Aɔ̃ Lafɛ̃ɛ takaɛi í suu si lɔɔmai Moabu gɔ si tengii Bɛti-Peɔɔ suusuu. Inɛ kãma kù mà dee dee tengi bii balɛɛu í wa hee ku baa nnyi.

⁷ Adɔ̃ cifai Moizi í nɛ í bɛi í ku (120). Ijuɛ wa nɛ baanii mam mam, nɔ wa nɛ gbugbã mɔi gãn gãm.

⁸ Inɛi Izirɛli ŋa à kpata akũi Moizii ajɔ kuntaa si gbaai Moabu ŋau. Ŋɔi waatii kukpata nŋau í na í kpa iri.

⁹ Zozue amai Nunuu í nɛ laakai jiida, domi Moizi í lesiɛ awɔɛ ŋa. Hai waati bɛɛbɛ, ideɛ ŋai inɛi Izirɛli ŋau à ya maa gbɔ, nɔ bɛi Aɔ̃ Lafɛ̃ɛ í sɔ̃ Moiziu fei, bɛɛbɛi à ya maa ce.

¹⁰ Hai waati bɛɛbɛ, walii kãma kù naa si ilɛi Izirɛli má iyi í yɛ bɛi Moizi iyi Aɔ̃ Lafɛ̃ɛ í ya ba ide ku fɔ ijuò iju.

¹¹ Aɔ̃ Lafɛ̃ɛ í bɛ Moizi í jɔ̀ í koo í ce maamaake ŋa iyi à kpeeò ku fɔ do gɛlɛ si ilɛi Ezibiti si wajui Faraɔ̃ do akaweɛ ŋa do si wajui zamaai ilɛu fei.

¹² Nɔ si wajui inɛi Izirɛli ŋau fei, Moizi í ce mii ŋa iyi à to njo do gbugbã nla nla.