Wooda ku kɔsi 33 - Bibeli do fee

Moizi í weea dimi maateejii Izirɛli ŋau

¹ Moizi inɛi Aɔ̃ Lafɛ̃ɛu, í weea inɛi Izirɛli ŋa hee ku maa ku. Ide ŋa iyi í fɔ í wee nŋa do wee.

² Í ni, Aɔ̃ Lafɛ̃ɛ í naai hai iri kutai Sinai. Bɛi inunu í ya dede, bɛɛbɛi í dede wa hai ilɛi Seii hai bi iri kutai Parãa ŋau í máa inɛɛ ŋau inya. Í naa bi inɛɛ ŋaui do amaleka dubu nkpɔ nkpɔ, nɔ wa mu wooda gɔ wa iyi í yɛ bɛi ina si awɔ njɛɛ.

³ Aɔ̃ Lafɛ̃ɛ í nɛ kubii inɛi Izirɛli ŋau. Inɛ ŋa iyi à jɛ titɛɛ ŋau fei, si awɔɛi à wa. Inɛ ŋau à tɔtɔɔ bi tɛɛi ku ba a maa gbɔ ikɔɛ ŋa.

⁴ Wooda iyi amu Moizi ǹ na ŋɛ, amani ilu bɛɛrɛi í jɛ bi awa tɔkui Zakɔbu ŋa.

⁵ Waati iyi inɛ ngboi zamaa ŋau à tɔtɔɔ do dimii inɛi ilɛi Izirɛli ŋau, à jɛsi iyi Aɔ̃ Lafɛ̃ɛi í jɛ ilaalui Yesurunu.

⁶ Ŋɔi Moizi í fɔ má í ni, Aɔ̃ Lafɛ̃ɛ ku jɔ̀ dimii Rubɛ̃ɛ kú maa wɛɛ ku maà ku, amma ku maà jɔ̀ inɛɛ ŋau a kpɔ.

⁷ Moizi í fɔ si gãmɛi tɔkui Zudaa ŋa í ni, gbɔ imui dimii Zudaa ŋa, nɔ i jɔ̀ aŋaò inɛ nŋa ŋa a dɔ̃. Aŋa taka nŋai à dasi wɔɔkɔ à waa kɔ̀ò ara nŋa. Sobi ŋa i nya ŋa hai si awɔi mbɛɛ nŋa ŋa.

⁸ Moizi í fɔ si gãmɛi tɔkui Levii ŋa í ni, Aɔ̃ Lafɛ̃ɛ, ì so urimu do tumimu, ì daa tɔkui Levii ŋa si awɔ aŋa iyi à jɛ woo ce icɛ ilu naanɛɛ ŋau. Aŋai ì cɔ laakai nŋa wo waati iyi à wa Masa, nɔ ì dɛdɛ ija nŋa bi inyii Meriba.

⁹ À nyisi kubi si gãmɛɛ í re ti iyeò baa nŋa ŋa, do ti ifɔ do igbã nŋa ŋa do ama nŋa ŋa domi à ceò woodaɛ icɛ nɔ à jirima akabuuɛ.

¹⁰ Aŋai à ya maa kɔ inɛi Izirɛli ŋa si woodaɛ ŋau. Aŋai à ya naaɛ tuae ku dɔ̃ inunu ŋa wa do kuwee ŋa iyi à ya jo si ina fei sãa sãa si antaii bi kuweeɛu.

¹¹ Aɔ̃ Lafɛ̃ɛ, teese i mu nŋa gbugbã, nɔ i wee si icɛ iyi à waa ce fei. Lɛgɛ gbugbãi mbɛɛ nŋa ŋa fei ku ba a maà dede a tɛ má ajɔ kãma.

¹² Moizi í fɔ si gãmɛi tɔkui Bɛnzamɛɛ ŋa í ni, Bɛnzamɛɛ, dimi iyi Aɔ̃ Lafɛ̃ɛ í nɛ kubiɛu í wa bi Aɔ̃ Lafɛ̃ɛui do laakai ku sũ. Nŋui í ya maa degbeɛ waati kãma fei, nɔ í wa anini nŋa.

¹³ Moizi í fɔ si gãmɛi tɔkui Zozɛfu ŋa í ni, Aɔ̃ Lafɛ̃ɛ í wee si ilɛ nŋa. À ya maa ba inyi wai hai lele, nɔ mandi í ya dede wa mái hai lɛlɛ.

¹⁴ Inunu í ya jɔ̀ amaajɛ ŋa a fitai, nɔ cukpa fei, amaajɛ titɔ̃ ŋa à ya jĩai.

¹⁵ Iri kuta ŋa do geete ŋa iyi à biiɛ hai ku kpɛui í jɔ̀ í nɛ taasi.

¹⁶ Ŋɔi Moizi í ni má, Aɔ̃ Lafɛ̃ɛ, awɔ iyi ì bam ide ku fɔ wo hai si ama jĩi tũtũ wau, jɔ̀ amaajɛ ku maa wa si ilɛu ihɛ̃, jɔ̀ jiida ku jɛɛ ku naa si dimii Zozɛfu wa, nŋu iyi à cica í jɛ inɛ ngboi igbãɛ ŋa do ifɔɛ.

¹⁷ Bɛɛrɛi í jɛ ti Zozɛfu. Í nɛ gbugbãi bɛi kɛtɛ kombo. Ngo ku nɛ gbugbã minjiɛ ŋai í ya jaò bɛi ifã. Do nŋui í ya cãò inɛi ilɛ ŋa nɔ ku tale ŋa hee kɔɔi andunya. Akãi ngoɛ ŋaui í jɛ dimi nkpɔ nkpɔi Efaraimu. Iyi ihɔ̃ mɔ, zamaa nkpɔ nkpɔi dimii Manasee.

¹⁸ Moizi í fɔ si gãmɛi tɔkui Zabulɔ̃ɔ do ti Isakaa ŋau mɔ í ni, Zabulɔ̃ɔ, jɔ̀ i nɛ inɔ didɔ̃ si sĩa ku ceɛ. Awɔ mɔ Isakaa, jɔ̀ i nɛ inɔ didɔ̃ nɔ i maa wa si inɔ ilei acɔɛ ŋa do laakai ku sũ.

¹⁹ Aa ya kpe inɛi kɔkɔ nŋɛ ŋai a bɔ si iri kuta kumá gɔ a koo a ce kuwee ŋa si yaase bɛi à jilɛ, domi aa fa amani nŋɛ ŋa wai hai si tenku do iyi wa singa si sãa ŋau.

²⁰ Moizi í fɔ si gãmɛi tɔkui Gadi ŋa í ni, ǹ wa n saabu Aɔ̃ Lafɛ̃ɛ nŋu iyi í mua Gadi bantuma iyi í cĩ. Gadi í sũi bɛi muusu nla iyi í tã sɔɔlu ku ga mɛɛmu iyi í ba í mu í jɛ sɔndaɛ hai ikpaɛ hee ku koo si iriɛ.

²¹ Inya iyi í jɛ jiida í re si ilɛui Gadi í cica bɛ. Iyi í jɛ ikpɛ̃i inɛ ngboi í so bɛ. Nŋui wa jɛ inɛ ngboi zamaau. Í cei si bɛi Aɔ̃ Lafɛ̃ɛ í ce sɔɔluɛ í jilɔɔ. Í jirima woodai Aɔ̃ Lafɛ̃ɛ ŋaui na zamaai Izirɛliu.

²² Moizi í fɔ si gãmɛi tɔkui Dãa ŋau í ni, Dãa í yɛi bɛi muusu nla saasaabɔ akɔ iyi í fo wa dingaa wa hai Basãa.

²³ Moizi í fɔ si gãmɛi tɔkui Nɛfitali ŋa í ni, jiida ku jɛi í bii Nɛfitali. Í ba didɔ̃i Aɔ̃ Lafɛ̃ɛ nɔ í kɔ̃ do kuweeɛ. Ilɛɛ í wai hai nunui alɛ hee ku bɔ ikpa awɔ cangai kpãai inunu.

²⁴ Moizi í fɔ si gãmɛi tɔkui Azɛɛ ŋa í ni, kuwee kú jɛ ti Azɛɛ si inɔi ama inɛmɔkɔi Zakɔbu ŋa. Ilaaɔ̃ ku jɔ̀ igbãɛ do ifɔɛ ŋa a nyisiɛ kubi. Jĩi ndii oliviɛ ŋau a ce ikpo nkpɔ nkpɔ hee ku ba ku ya sɔsi kutɛɛ si ikpou.

²⁵ Á ya ba ku manjii si anyii gamboɛ ŋa iyi à nɛ sɔkɔi isɔ walakɔ ti isɔ danya ŋa. Gbugbã kú maa wɛɛa zaka bɛi hundeɛ í sɔ wa to fei.

²⁶ Ŋɔi Moizi í nyi í ni má, Yesurunu, iwɛ̃ kãma kù yɛ bɛi Aɔ̃ Lafɛ̃ɛɛ. Si bɛɛrɛ nla nlaɛ, í ya gũ kudũi ijĩ wai bɛ acĩ ku naa ku faabaɛ.

²⁷ Hai ku kpɛ, Aɔ̃ Lafɛ̃ɛi í jɛ bi ku manjiɛ. Hai ku kpɛi wa nyisi gbugbãɛ wa si ilɛ ihɛ̃. Nŋui í lele mbɛɛɛ ŋa hai si wajuɛ nɔ í naɛ wooda í ni, i kpa ŋa.

²⁸ Inɛi Izirɛli ŋa à bubai do laakai ku sũ. Tɔkui Zakɔbu ŋa à bubai do laakai ku sũ si ilɛ iyi í nɛ bilee do vɛ̃ɛ na ikpã nla nla iyi í ya naa hai lelei Aɔ̃u.

²⁹ Iŋɛ ilu inɔ didɔ̃ ŋai iŋɛ inɛi Izirɛli ŋa. Iŋɛ akãi ì jɛ zamaa iyi Aɔ̃ Lafɛ̃ɛ í faaba. Aɔ̃ Lafɛ̃ɛi í jɛ tɛli iyi wa degbe ŋɛ. Nŋui í jɛ taakuba iyi í jɔ̀ ì waa jɛ igũ ŋa. Mbɛɛ nŋɛ ŋa aa ya naa a tɔɔ i ce araarei aŋai, nɔ iŋɛi aa kɛkɛ faau nŋa ŋa.