Wooda ku kɔsi 31 - Bibeli do fee

À cica Zozue ku jɛ nsũi Moizi

¹ Ŋɔi Moizi í sɔ̃ inɛi Izirɛli ŋau fei í ni,

² adɔ̃ cĩɔ do kɔnfiai (120) ǹ nɛ bɛbɛi. N kù nɛ gbugbã bɛi an maa n gbã ŋɛ má. Nɔ Aɔ̃ Lafɛ̃ɛ í sɔ̃m mɔm í ni n kaa n kua idoi Zuudɛ̃ɛu.

³ Aɔ̃ Lafɛ̃ɛ nŋɛ takaɛi á nɛ ku maa cua nŋɛ. Nŋui á kpa inɛi ilɛ ŋa iyi à wa ice do ikpa ihɔ̃u ku ba i yɔkɔ i gba ilɛ nŋau ŋa. Zozuei á cua nŋɛ bɛi Aɔ̃ Lafɛ̃ɛ í fɔu.

⁴ Aɔ̃ Lafɛ̃ɛ á ce nfei inɛi ilɛ ŋau bɛi í cea Sioni do Ɔgu ilaalui inɛi Amɔre ŋa do ilɛ nŋau.

⁵ Á so ŋai ku da nŋɛ si awɔ, nɔ i ce nŋa dee dee yaase bɛi ǹ jilɛ ŋɛu.

⁶ I jɔ̀ i ce wɔɔkɔ nɔ i dasi gbugbã ŋa. I maà jɔ̀ njo ku mu ŋɛ, nɔ i maà jɔ̀ zigi nŋɛ ku daò ŋa ŋa, domi Aɔ̃ Lafɛ̃ɛ takaɛi á maa nɛ do iŋɛ, nɔ kaa fũsi ŋɛ awɔ ajɔ kãma.

⁷ Ŋɔi Moizi í kpe Zozue nɔ í sɔ̃ɔ si wajui inɛi Izirɛli ŋau fei í ni, jɔ̀ i ce wɔɔkɔ nɔ i dasi gbugbã. Awɔi aa gbã inɛi Izirɛli ŋau i bɔò ŋa si ilɛ iyi Aɔ̃ Lafɛ̃ɛ í cea bala nŋa ŋa kuwãɛ do kugbasiu. Awɔi aa na ŋa a buba si ku jɛ tubu nŋa.

⁸ Aɔ̃ Lafɛ̃ɛ takaɛi á maa cuaɛ do waju. Nŋui á maa wɛɛ do awɔ nɔ kaa fũsiɛ awɔ ajɔ kãma. Debɛi, maà jɔ̀ njo ku muɛ nɔ i maà jɔ̀ zigiɛ ku da.

À ya cioa zamaa wooda ŋaui si adɔ̃ mɛɛje do mɛɛje fei

⁹ Ŋɔi Moizi í kɔ woodai Aɔ̃ Lafɛ̃ɛu nɔ í so í na woo wee ŋa do inɛ ngboi Izirɛli ŋau. Woo wee ŋau tɔkui Levii ŋai nɔ aŋai à jɛ woo so kpakoi akabuui Aɔ̃ Lafɛ̃ɛu.

^10-11 Ŋɔi Moizi í sɔ̃ ŋa í ni, si adɔ̃ mɛɛje do mɛɛje fei, adɔ̃ si bii à jilɛ a ya kpa idei gbese ŋau, aa ya cio wooda ŋau ihɛ̃ ŋai si waatii jingaui Kusu ŋau. Aa ya cioɛ ŋai hee lele si wajui inɛi Izirɛli ŋau fei waati iyi à naa à leekĩ si wajui Aɔ̃ Lafɛ̃ɛ tengi bii nŋu takaɛ á cicau.

¹² Aa tɔtɔɔ zamaau feii, hai inɛmɔkɔ ŋa do inaabo ŋa do amu ŋa hee do inɛ njoo ŋa iyi à wa bi tu ŋɛ ŋa bɛ fei ku ba a gbɔ kuciou nɔ a màa, nɔ a mà bɛɛrɛi Aɔ̃ Lafɛ̃ɛ nŋɛ nɔ a maa jirima idei wooda ŋau fei.

¹³ Amu ŋa iyi a kù màa titã aa gbɔɔ nɔ a kɔkɔ Aɔ̃ Lafɛ̃ɛ ku jirima si kuwɛɛ nŋa si ilɛ iyi aa na i koo i buba si ŋa ku jɛ tu ŋɛ ikpa icei idoi Zuudɛ̃ɛ ihɔ̃ ŋa.

Dee dee hai jɛi Izirɛli

¹⁴ Ŋɔi Aɔ̃ Lafɛ̃ɛ í sɔ̃ Moizi í ni, waatii ikuɛ í ce amɛɛ wa. Kpe Zozue wa nɔ iŋɛ fei i naa i leekĩ si inɔ ile bi kukou. Tengi bɛi an naa woodam ŋau. Ŋɔi Moizi do Zozue à koo à leekĩ si inɔ ile bi kukou.

¹⁵ Nɔ Aɔ̃ Lafɛ̃ɛ í naa si ŋa si ile bi kukou si kudũi ijĩ gɔ. Kudũi ijĩu í naa í wai si anui ile bi kukou.

¹⁶ Ŋɔi Aɔ̃ Lafɛ̃ɛ í sɔ̃ Moizi í ni, kaa kpɛ má aa nyi i koo i ba balaɛ ŋa. Amma si anyii ikuɛ, inɛi Izirɛli ŋau aa lɔsi iwɛ̃ ŋa iyi à wa si ilɛ bii aa lɔ siu ku tɔɔi. Aa fũsim awɔi nɔ a fũ akabuu iyi í wa si gãmɛi awaò ŋau.

¹⁷ Nɔ na nŋu, an wɛɛò idɔɔkɔ̃ nla nlai na iri nŋa. An fũsi ŋa awɔi nɔ n sinda n to nŋa anyi. Aa dasi awɔi dimi mmu ŋai, nɔ wahala do inɔ kufɔ ku naa si ŋa. Waati bɛɛbɛi aa fɔ a maa ni, wahala ŋau ihɛ̃ wa ba wai si na iyi í jɔ̀ Aɔ̃ Lafɛ̃ɛ kù wa bi tu wa.

¹⁸ Ntɔ ntɔ waati bɛɛbɛ, an sinda n to nŋa anyii na laalɔ ŋa iyi aa na a maa ce si gãmɛi iwɛ̃ ŋa ku tɔɔu.

¹⁹ Nsɛi, i kɔ iriu ihɛ̃ ŋa. Awɔ Moizi, awɔi aa kɔ inɛi Izirɛli ŋa si iriu. Kɔ ŋa si hee a màa, domi iriu bɛi á jɛ sɛɛdam si gãmɛ nŋa.

²⁰ An gbã zamaai Izirɛliui n lɔòɛ si ilɛ iyi ǹ cea bala nŋa ŋa kuwãɛ do kugbasi bii amɔ do nyikɔ̃ wa kɔ̃. Tengi bɛ, aa ba a jɛ hee a yo, nɔ aa maa wa si ididɔ̃. Aa na a sinda si iwɛ̃ ŋa a maa tɔɔ ŋa. Aa na a dondam nii nɔ aa fũ akabuu iyi í wa si gãmɛi awaò ŋa.

²¹ Nɔ wahala do inɔ kufɔ á na ku bii si ŋa. Waati bɛɛbɛ, iriu ihɛ̃i á jɛ nŋa sɛɛda, domi baa tɔku nŋa ŋa a kaa gbɛjɛ iriu ihɛ̃ ku kɔ̃ ajɔ kãma. Hai nnyi, hee n gbã ŋa n maa n bɔò ŋa si ilɛ iyi ǹ ce nŋa kuwãɛ do kugbasiu, ǹ mà mii iyi í wa si idɔ nŋa tã.

²² Ajɔ nŋu bɛi Moizi í kɔ iri iyi Aɔ̃ Lafɛ̃ɛ wa sɔ̃ɔu, nɔ í kɔ inɛi Izirɛli ŋau si.

²³ Si anyii nŋu bɛi Aɔ̃ Lafɛ̃ɛ í sɔ̃ Zozue amai Nunu í ni, jɔ̀ i ce wɔɔkɔ nɔ i dasi gbugbã. Awɔi aa gbã inɛi Izirɛli ŋau i bɔò ŋa si ilɛ iyi ǹ ce nŋa kuwãɛ do kugbasiu nɔ amu takam an maa n wɛɛ do awɔ.

²⁴ Moizi í kɔ woodai idei Aɔ̃ Lafɛ̃ɛu si tia gɔ fei mam mam. Waati iyi í kɔɔ í tã,

²⁵ waati bɛɛbɛi í ba inɛi Levii ŋa iyi à ya so kpakoi akabuui Aɔ̃ Lafɛ̃ɛu ide ku fɔ í na ŋa wooda í ni,

²⁶ i gba tiau ihɛ̃ ŋa si bii à kɔ woodai Aɔ̃ Lafɛ̃ɛu i jilɔɔ kɔkɔi kpakoi akabuui Aɔ̃ Lafɛ̃ɛ nŋɛu. Tengi bɛi á maa wa ku jɛ sɛɛda si gãmɛi inɛi Izirɛli ŋau.

²⁷ Ntɔ ntɔ, ǹ mà zaka bɛi idɔ kulele nŋɛ í to. Ǹ mà iyi iŋɛ fei woo kɔ̀ ide ŋai. Bii nnyi, baa do iyi ǹ wa si anini nŋɛ fei, ì kɔ̀ ì waa ce ide ku kɔ̀ si gãmɛi Aɔ̃ Lafɛ̃ɛ, si anyii ikum aa coo má ŋa hee ku caa.

²⁸ Nsɛi, i tɔtɔɔ inɛ ngboi dimi nŋɛ ŋa do inɛ ŋa iyi à ya maa cɔ yaase bɛi mii ŋa wa nɛ si anini nŋɛ wa bi titom ihɛ̃ ŋa. Ide iyi an fɔ, an fɔɔi si waju nŋa, nɔ ilɛ do lelei an so a jɛ sɛɛda.

²⁹ Ǹ mà iyi si anyii ikum, iŋɛ inɛi Izirɛli ŋa aa dasi dulum nii nɔ aa sinda i jɔ̀ kpãa iyi ǹ nyisi ŋɛ ŋau. Nɔ do waju, wahalai á ba ŋɛ na mii ŋa iyi à jɔ iwɛ̃ ŋa iyi aa ce ŋa i fɔ́ò inɔi Aɔ̃ Lafɛ̃ɛ nŋɛu fei nɔ idɔɛ ku kɔ̃.

Iri iyi Moizi í kɔ̃

³⁰ Ŋɔi Moizi í tɔtɔɔ inɛi Izirɛli ŋau fei nɔ wa kɔ̃ iri iyi Aɔ̃ Lafɛ̃ɛ í jɔ̀ í kɔu aŋa fei à waa gbɔ.