Wooda ku kɔsi 30 - Bibeli do fee

Inɛi Izirɛli ŋa aa sinda a baa bi Aɔ̃ Lafɛ̃ɛ

¹ Ŋɔi Moizi í ni, ide ŋa iyi ǹ ni aa na a naa si ŋɛ ŋau, waatɔ kuwee walakɔ ikpe iyi ǹ jilɛ na iri nŋɛu aa naa si ŋɛi. Waati iyi Aɔ̃ Lafɛ̃ɛ nŋɛ á na ku jɔ̀ i koo i maa wa ilɛ mmu si inɔi dimi mmu ŋa, bii ì lasabu si

² nɔ ì sinda ì nyi wa bi tɛɛ, nɔ ì de itĩ ì waa gbɔ ideɛ dee dee do lasabu nŋɛ fei do idɔ nŋɛ fei iŋɛ do ama nŋɛ ŋa bɛi ǹ wa n sɔ̃ ŋɛ nnyiu ihɛ̃,

³ Aɔ̃ Lafɛ̃ɛ nŋɛ á nyi ku teese kuwɛɛ nŋɛ má. Á ce araare nŋɛ, nɔ á tɔtɔɔ inɛ nŋɛ ŋa wa hai si dimi mmu ŋa bii í jɔ̀ ì fangaa ì nɛ̀ ŋau fei ŋa.

⁴ Baa bii ì koo ì waa jɛ aru hee kɔɔi andunyau ŋai, Aɔ̃ Lafɛ̃ɛ nŋɛ á tɔtɔɔ ŋɛ nɔ ku so ŋɛ wa hai bɛ.

⁵ Aɔ̃ Lafɛ̃ɛ nŋɛ á baaò ŋɛ wa si ilɛ bii bala nŋɛ ŋa à bubau ku baa ku jɛ tu ŋɛ. Aɔ̃ Lafɛ̃ɛ á ce nŋɛ jiida nɔ ku jɔ̀ akpɔ nŋɛ ku kɔ̃ɔsi ku re waatii bala nŋɛ ŋau.

⁶ Aɔ̃ Lafɛ̃ɛ nŋɛ takaɛi á jɔ̀ idɔ nŋɛ do ti tɔku nŋɛ ŋau ku má nɔ i buu do lasabu nŋɛ fei do idɔ nŋɛ fei ku ba i maa wɛɛ ŋa.

⁷ Aɔ̃ Lafɛ̃ɛ nŋɛ á jɔ̀ ikpe ŋau bɛ fei a cukui si mbɛɛ nŋɛ ŋa do si inɛ ŋa iyi à cé ŋɛ nɔ à waa wahala ŋɛ.

⁸ Amma iŋɛ, aa nyi i maa gbɔ idei Aɔ̃ Lafɛ̃ɛ má ŋai nɔ i maa jirima woodaɛ ŋa iyi ǹ wa n na ŋɛ nnyiu ihɛ̃ fei.

⁹ Aɔ̃ Lafɛ̃ɛ nŋɛ á ce nŋɛ jiida nɔ ku jɔ̀ icɛ nŋɛ fei ku maa bɔ do waju. Aa ba amu ŋa nkpɔ nkpɔ. Mɛɛmu nŋɛ ŋa mɔ aa bí nkpɔ nkpɔ, nɔ aa ba amaajɛ ŋa mɔ nkpɔ nkpɔ. Ntɔ ntɔ do yaase bɛi Aɔ̃ Lafɛ̃ɛ í bi í cea bala nŋɛ ŋa jiida, bɛɛbɛ mɔi wa bi ku cea iŋɛ mɔ

¹⁰ bii ì waa gbɔ ideɛ ŋa nɔ ì waa ceò woodaɛ ŋa do ikɔɛ ŋa iyi à wa si tiai woodau icɛ ŋa, do bii ì sinda ì nyi wa bi titɛɛ do idɔ nŋɛ fei do lasabu nŋɛ fei ŋa.

Idei Aɔ̃ Lafɛ̃ɛ í wɛɛ do awa

¹¹ Idei ikɔ iyi ǹ wa n jilɛ nŋɛ nnyiu ihɛ̃, ku gbɔɛ do ku jirimaɛ kù gaabu kù caa.

¹² Kù jɛ lelei Aɔ̃i idei ikɔu í wa hee inɛ ku ni, yooi á gũ lele koo dɛdɛɛ wa ku naa ku sɔ̃ wa ku ba ka yɔkɔ ka ceò icɛ.

¹³ Kù nɔ kù wa do icei tenku ikpa ihɔ̃ hee inɛ ku ni, yooi á kua tenkuu koo dɛdɛɛ wa nɔ ku naa ku sɔ̃ wa ku ba ka yɔkɔ ka ceò icɛ.

¹⁴ Aawo, idei Aɔ̃ Lafɛ̃ɛu í wa kɔkɔ nŋɛ bɛ. Í wa si gɛlɛ nŋɛ do si idɔ nŋɛ ŋa, ku ba i ceò icɛ ŋa.

I cica kuwɛɛ ŋa

¹⁵ Iŋɛ inɛi Izirɛli ŋa, i cɔ ŋa. Nnyiu ihɛ̃, ǹ jilɛ kuwɛɛ do ididɔ̃ si waju nŋɛ, nɔ ǹ jilɛ iku do wahala si waju nŋɛ.

¹⁶ Na nŋu, i ce laakai si ikɔ ŋa iyi ǹ wa n na ŋɛ nnyiu ihɛ̃. I jɛsi i bi Aɔ̃ Lafɛ̃ɛ nŋɛ ŋa, i too kpãa iyi í jilɛ nŋɛ. I jirima ikɔɛ ŋa do woodaɛ ŋa do asaiyaɛ ŋa ku ba i maa wɛɛ ŋa, nɔ i kpɔ i kɔ̃ɔsi ŋa, nɔ Aɔ̃ Lafɛ̃ɛ ku wee nŋɛ si ilɛ bii aa lɔ i koo i buba ŋau.

¹⁷ Amma bii ì sinda i toaa anyi ŋa, nɔ i kù waa gbɔ ideɛ ŋa, bii ì jɔ̀ à fa ŋɛ à dasi ŋɛ iwɛ̃ ŋa ku tɔɔ ŋa,

¹⁸ hai nnyi, ǹ wa n sɔ̃ ŋɛi, aa kpa iri nŋɛi mam mam, nɔ kuwɛɛ nŋɛ kaa sɔ si ilɛ bii aa koo i buba si do icei idoi Zuudɛ̃ɛu ŋa.

¹⁹ Ntɔ ntɔ ǹ wa n na ŋɛ baauɛi hai nnyi, nɔ lele do ilɛi à jɛ sɛɛdam. Kuwɛɛ do ikui ǹ jilɛ nŋɛ, nɔ ǹ jilɛ nŋɛ kuwee mɔ do ikpe. Na nŋu, i cica kuwɛɛ ŋa ku ba i maa wɛɛ ŋa iŋɛ do tɔku nŋɛ ŋa.

²⁰ I bi Aɔ̃ Lafɛ̃ɛ nŋɛ ŋa, i gbɔ ideɛ ŋa, i leekĩ dim dim do nŋu ŋa. Do yaase bɛɛbɛ, aa maa wɛɛ ŋai nɔ i ce adɔ̃ nkpɔ nkpɔ si ilɛ bii Aɔ̃ Lafɛ̃ɛ í ce kuwã do kugbasi í ni nŋu á mua Aburahamu do Izaaki do Zakɔbu bala nŋɛ ŋau.