Wooda ku kɔsi 3 - Bibeli do fee

À gba bommai Ɔgu

¹ Hai bɛ, ŋɔi à sinda à too kpãai Basãa. Ŋɔi Ɔgu ilaalui Basãau í fita í naa ku ko nwa nŋu do zamaaɛ fei ku ba a ce igũ do awa ilui Ederei.

² Ŋɔi Aɔ̃ Lafɛ̃ɛ í sɔ̃m í ni, maà ce njoɛ, domi an soo n daaɛ si awɔ nŋu do zamaaɛ ŋau do ilɛɛu fei. Aa ceaai bɛi ì cea Sioni ilaalui inɛi Amɔre ŋa iyi í wa Hɛsebɔ̃ɔu.

³ Ŋɔi Aɔ̃ Lafɛ̃ɛ nwa í da nwa Ɔgu ilaalui Basãau si awɔ nŋu do zamaaɛ ŋau fei, ŋɔi à jɔɔ igũ nɔ a kù jɔ̀ inɛɛ ŋau baa akã ku fita si.

⁴ Ŋɔi à gba iluɛ ŋau fei, kãma nŋa kù yɔkɔ ku kɔ̀ ide si waju nwa. Ilu kitai à gba si bommai Ɔgu iyi í wa ilɛi Aagobu si ilɛi Basãa.

⁵ Ilu ŋau bɛ fei ilu ku nɛ gbugbã ŋai do bindi kugboka nŋa ŋa, do gambo ku nɛ sɔkɔ ŋa. Ilu hai nɛ bindi ŋau mɔ à wa si nkpɔ nkpɔ.

⁶ Ilu ŋau bɛ fei à lɛgɛ ŋai mam mam, nɔ à kpa inɛmɔkɔ ŋau fei do inaabo ŋau do amu ŋa bɛi à cea ilɛi Sioni ilaalui Hɛsebɔ̃ɔu.

⁷ Nɔ à ko mɛɛmu ŋau do amani ŋa iyi à ba si ilu ŋau.

À kpɛ̃ ilɛi Galaadi

⁸ Do yaase bɛɛbɛi à gbaò ilɛi ilaalu minjii inɛi Amɔre ŋa iyi à wa ikpa idoi Zuudɛ̃ɛ do ikpa nunui daakɔ iyi à wa si afei lɔɔmai Aanɔɔ do geetei Hɛɛmɔɔu waati bɛɛbɛ.

⁹ Inɛi Sidɔ̃ɔ ŋa à sɔ Hɛɛmɔɔu Siriɔ̃ɔ, inɛi Amɔre ŋau mɔ Senii.

¹⁰ Ŋɔi à gba ilu ŋa iyi à wa si lɔɔmau fei hee do ilɛi Galaadi fei do ti Basãa fei hee ku bɔ Salika do Ederei ilui bommai Ɔgu ŋau iyi í wa Basãa.

¹¹ Ɔgu ilaalui Basãau nŋu akãi í gbe si dimii inɛi Refaimu ŋau. Daayiɛ daayii isɔi. Raba ilui inɛi Amɔɔ ŋaui í wa. Kusɔi daayiu í wɛɛi agbãawɔ mɛɛsã, kucĩɛ mɔ agbãawɔ mɛɛ, waatɔ agbãawɔi inɛ ngbo.

¹² Ŋɔi à gba ilɛu, nɔ ǹ na inɛi Rubɛ̃ɛ ŋa do inɛi Gadi ŋa hai Aroɛɛ bi lɔɔmai Aanɔɔu do bubui ilɛi iri kutai Galaadi do iluɛ ŋau.

¹³ Nɔ ǹ na bubui dimii inɛi Manasee ŋau mɔ bubui ilɛi Galaadiu do bommai Ɔgu iyi í wa Basãau fei, do ilɛi Aagobuu fei, do Basãa fei. Bantumai ilɛu bɛ feii à ya kpe ilɛi inɛi Refaimu ŋa.

¹⁴ Yaii tɔkui Manaseei í so ilɛi Aagobuu fei hee ku bɔ kɔɔi ilɛi inɛi Gɛsuu ŋau do ti inɛi Makati ŋa, nɔ í so iriɛ í na ilɛɛkoi Basãa ŋa, nɔ baa nnyi ilɛɛkoi Yaiii à ya kpoo.

¹⁵ Nɔ ǹ na Makii ilɛi Galaadi.

¹⁶ Inɛi Rubɛ̃ɛ do inɛi Gadi ŋau mɔ ǹ na ŋa ilɛ iyi í wa si afei Galaadi do lɔɔmai Aanɔɔ. Acãi inyii Aanɔɔi í jɛ kɔɔu do ikpa awɔ cangai kpãai inunu, nɔ acãi inyii Yabɔku mɔi í jɛ kɔɔ do bi inɛi Amɔɔ ŋau.

¹⁷ Do nunui alɛ, kɔɔu í too lɔɔmai Zuudɛ̃ɛui hai tenku iyi à ya kpe Kinerɛti hee ku bɔ Tenku ku da Imuu nɔ í koo í faata si isɛi kutai Pisigaa ikpa nunui daakɔu.

¹⁸ Waati bɛɛbɛ wooda iyi ǹ na ŋa wee. Ǹ ni, Aɔ̃ Lafɛ̃ɛ nŋɛ í da nŋɛ ilɛu si awɔ ku ba ku jɛ tu ŋɛ. Iŋɛ sooge ŋau fei, aa nɛ i maa cuaa inɛi Izirɛli ŋaui do jĩnɛi igũ nŋɛ ŋa.

¹⁹ Abo nŋɛ ŋa do ama nŋɛ ŋa aŋa akãi aa gbe ihɛ̃ do mɛɛmu gaa nŋɛ ŋa, domi ǹ mà iyi ì nɛ mɛɛmu gaa nkpɔ nkpɔ ŋa. Ihɛ̃i inɛ nŋu ŋau aa gbe si ilu ŋa iyi ǹ mu nŋɛ ŋau,

²⁰ hee Aɔ̃ Lafɛ̃ɛ koo muaò kpaasi nŋɛ ŋau mɔ kusĩmi bɛi iŋɛ, nɔ aŋa mɔ a ba ilɛ iyi Aɔ̃ Lafɛ̃ɛ nŋɛ í mu nŋa do icei idoi Zuudɛ̃ɛu. Si anyiɛ nɔ inɛ fei ku bɛi ku nyi si tubu iyi ǹ naa.

²¹ Waati bɛɛbɛi ǹ na Zozue wooda ǹ ni, í jɔ ijuɛ í yɛ yaase bɛi Aɔ̃ Lafɛ̃ɛ nŋɛ í cea ilaalu minji ŋau bɛ ya, bɛɛbɛ mɔi á cea bomma ŋa iyi aa nɛ siu fei.

²² I maà ce njo nŋa ŋa, domi Aɔ̃ Lafɛ̃ɛ nŋɛi á ja nŋɛ.

Moizi kaa lɔ si ilɛi Kanaãu

²³ Waati bɛɛbɛ, ŋɔi ǹ tɔɔ Aɔ̃ Lafɛ̃ɛ ǹ ni,

²⁴ Aɔ̃ Lafɛ̃ɛm, wee ì sinti ku nyisi amu woo ce icɛɛ kulaɛ do gbugbãɛ. Ntɔ ntɔ iwɛ̃ kãma kù wa lele walakɔ si ilɛ ihɛ̃ iyi á yɔkɔ ku ce icɛ ŋa do mii nla ŋa iyi ì ce.

²⁵ Ǹ wa n tɔɔɛi, jɔ̀ n ba n yɛ ilɛ jiida iyi í wa icei idoi Zuudɛ̃ɛ do ikpa ihɔ̃u, do iri kuta kusĩaɛ ŋa, do iri kutai Libãa ŋa.

²⁶ Amma idɔi Aɔ̃ Lafɛ̃ɛ í kɔ̃ sim na iri nŋɛ, nɔ í kɔ̀ ku gbɔ idem. Nɔ í sɔ̃m í ni, í to bɛɛbɛ, maà bam ide iyi bɛ ku fɔ má.

²⁷ Ŋɔi í sɔ̃m má í ni, gũ iri kutai Pisigaau nɔ i cɔ do ikpa awɔ njɛi kpãai inunu, nɔ i nyi i cɔ do awɔ cangai kpãai inunu má, nɔ i cɔ ikpa nunui alɛ do ikpa nunui daakɔ. Amma jɔ̀ i mà iyi i kaa kua idoi Zuudɛ̃ɛu bɛ.

²⁸ Koo na Zozue wooda, jɔ̀ ku nɛ wɔɔkɔ, nɔ i muaa gbugbã, domi nŋui á cuaa zamaau nɔ ku jɔ̀ a buba si ilɛ iyi ì waa hɔ̃nnɛu bɛ.

²⁹ Lɔɔma ihɛ̃i à wa hai waati bɛɛbɛ si tengii ilui Bɛti-Peɔɔ.