Wooda ku kɔsi 29 - Bibeli do fee

Mii iyi Aɔ̃ Lafɛ̃ɛ í cea inɛi Izirɛli ŋa

¹ Moizi í kpe zamaai inɛi Izirɛli ŋa fei nɔ í ni, waati iyi ì tako ì wa ilɛi Ezibiti ŋa, iŋɛ taka nŋɛ ì yɔɔ do iju nŋɛ bɛi Aɔ̃ Lafɛ̃ɛ í cea Faraɔ̃ ilaalui Ezibiti do akaweɛ ŋa do ilɛɛu fei.

² Iŋɛ taka nŋɛ ì yɛ wahala kugaabu ŋa iyi í jɔ̀ í naa si ŋa, do nyinda ŋa do maamaake ŋa iyi í ce.

³ Amma hee ku baa nnyi, Aɔ̃ Lafɛ̃ɛ kù muu nŋɛ lasabu iyi á jɔ̀ i màò yaasei mii iyi í ceu ŋa. Iju nŋɛ ŋa do itĩ nŋɛ ŋau a kù jɔ̀ i kù yɛ hee má jɛ i gbɔ yaasei ngɔgɔ ŋa.

⁴ Í gbã ŋɛi si gbaau adɔ̃ ciiji, nɔ jĩnɛ ku dasi nŋɛ ŋa do baata nŋɛ ŋa a kù gbo.

⁵ I kù jɛ pɛ̃ɛ ŋa i kù nɔ i kù mɔ vɛ̃ɛ ŋa hee má jɛ atɛ̃ ku nɛ gbugbã gɔ. Aɔ̃ Lafɛ̃ɛi í wo ŋɛ ku ba i mà ŋa iyi nŋui í jɛ Aɔ̃ Lafɛ̃ɛ nŋɛ.

⁶ Waati iyi awa inɛi Izirɛli ŋa à to wa si inya gɔ ihɛ̃, Sioni ilaalui Hɛsebɔ̃ɔ do Ɔgu ilaalui Basãa ŋa à naa si wa igũ, amma à jɛ ŋa igũ,

⁷ nɔ à gba ilɛ nŋa à so à na dimii Rubɛ̃ɛ ŋa do ti Gadi ŋa do inɛi dimi bubui Manasee ŋa.

⁸ Na ŋɔi í jɔ̀ ì nɛ i jirima idei akabuuu ihɛ̃ ŋa nɔ i ceò icɛ ŋa ku ba mii iyi ì waa ce ŋa fei ku bɔ waju dee dee.

I mu akabuui iŋɛò Aɔ̃ Lafɛ̃ɛ ŋau ku ce ncɛɛ ŋa

⁹ Iŋɛ inɛi Izirɛli ŋa, nnyi wee ì tɔtɔɔ si wajui Aɔ̃ Lafɛ̃ɛ nŋɛ. Inɛ fei í wa ihɛ̃. Hai inɛ ngboi dimi nŋɛ ŋa, do woo cua nŋɛ ŋa, do inɛ ngbo nŋɛ ŋa, do woo cɔ yaase bɛi mii ŋa wa nɛ si anini nŋɛ ŋa,

¹⁰ do abo nŋɛ ŋa, do ama nŋɛ ŋa, hee do inɛ njoo ŋa iyi à wa asɔ bi tu ŋɛ ŋa, aŋa iyi à jɛ woo da nŋɛ jĩi ŋa wa, walakɔ inɛ ŋa iyi à jɛ woo kpã nŋɛ inyi wau.

¹¹ Aɔ̃ Lafɛ̃ɛ wa dĩ akabuu do iŋɛ, nɔ í bi i jɛsi ŋa do kugbasi iyi í nɛ gbugbã ntɔ ntɔ.

¹² Do yaase bɛɛbɛ nnyi, á jɔ̀ i jɛ zamaaɛ ŋa nɔ nŋu mɔ ku jɛ Aɔ̃ Lafɛ̃ɛ nŋɛ bɛi í cea iŋɛ taka nŋɛ kuwãɛ, nɔ í cea Aburahamu do Izaaki do Zakɔbu bala nŋɛ ŋau mɔ kuwãɛ do kugbasi.

¹³ Kù jɛ na irii iŋɛ akãi à waa dĩ akabuu do kugbasiu ihɛ̃,

¹⁴ nɔ kù jɛ inɛ ŋa iyi à tɔtɔɔ nnyi si wajui Aɔ̃ Lafɛ̃ɛ nwau ihɛ̃ aŋa akãi í kã. Amma í kã hee do tɔku nwa ŋa iyi a kù bí wa titã.

¹⁵ Iŋɛ taka nŋɛ ì mà do yaase bɛi à jɛò kuwɛɛ nwa si ilɛi Ezibiti, ì nɔ ì mà do yaase bɛi à ce à lɔ ilɛi dimi mmu ŋau ŋa.

¹⁶ Si waatiu bɛ, ì yɛ mii laalɔ ŋa, waatɔ iwɛ̃ ŋa iyi inɛ ŋau à ya maa tɔɔ. Iwɛ̃ ŋau à ce ŋai do jĩi, do kuta, do isɔ fũfũ, do wura.

¹⁷ Na nŋu nsɛi, hai inɛmɔkɔ walakɔ inaabo, hai si dimi gɔ walakɔ hai si nyaanze gɔ, inɛ kãma ku maà sinda hai bi Aɔ̃ Lafɛ̃ɛ nwa koo maa tɔɔ iwɛ̃i dimi ŋau bɛ. Si inɔ nŋɛ, inɛ kãma ku maa jɔ̀ ku yɛ bɛi jĩi iyi isoɛ í ro nɔ í nɛ acĩ.

¹⁸ Idei kugbasi ku nɛ gbugbãu ihɛ̃, bii si inɔ nŋɛ inɛ gɔ iyi í gbɔ ide ŋau, wa fɔ si idɔɛ wa ni mii fei á nɛa nŋui dee dee baa bii nŋu wa mɔsi do itĩ ku yikai nŋu bɛi nŋu í tako wa ce isɛɛnɛi nŋu wo, bii í tale si inɛ gɔ ŋa iwɛ̃ ku tɔɔ,

¹⁹ Aɔ̃ Lafɛ̃ɛ kaa cea suuru. Aɔ̃ Lafɛ̃ɛ kaa jɛsi mii hai jɛ dee dee iyi inɛɛu bɛ í ce. Á jɔ̀ idɔɔkɔ̃ɛ ku naa siɛi, nɔ idei ikpe ŋa iyi à wa si tiau ihɛ̃ fei, á jɔ̀ ku baai. Nɔ mii iyi á jɔ̀ a ye gigiɛ si ilɛu ihɛ̃ fei, á kpaai.

²⁰ Aɔ̃ Lafɛ̃ɛ á nyaai hai si inɔi dimii inɛi Izirɛli ŋau nɔ ku jɔ̀ idei ikpe ŋa iyi à fɔ si tiau ihɛ̃ fei ku naa siɛ.

Bɛi Aɔ̃ Lafɛ̃ɛ í fɔ bɛɛbɛi á ce

²¹ Moizi í ni, inɛ ŋa iyi aa na a dede si anyi nŋɛ, waatɔ ama nŋɛ ŋa, do inɛ njoo ŋa iyi aa naa hai ilɛ jĩijĩ, waati iyi aa yɛ wahala ŋa do bɔ̃ɔ ŋa iyi Aɔ̃ Lafɛ̃ɛ á jɔ̀ a naa si ilɛ nŋɛu, aa fɔi a maa ni,

²² fainwita do imui í jo ilɛu ihɛ̃. Inɛ kaa yɔkɔ ku gbɛ̃ si nkãma. Nkãma kaa jɛ ku fita si, nɔ fɔfɔ kãma kaa fita si. Mii iyi í baa, dimi akãi do iyi í ba Sodomu do Gomɔɔ do Adima do Seboimu. Ilu ŋau bɛ, Aɔ̃ Lafɛ̃ɛ í ce nfe nŋai si idɔɔkɔ̃ nlaɛ.

²³ Waati bɛɛbɛ, inɛi ilɛ mmu ŋa aa maa ni, na mii í jɔ̀ Aɔ̃ Lafɛ̃ɛ í cea ilɛu ihɛ̃ bɛɛbɛ. Na mii í jɔ̀ idɔɔkɔ̃ɛ í la hee zaka bɛɛbɛ.

²⁴ Aa jɛ nŋai a ni, si na iyi í jɔ̀ à fũsi akabuu iyi à dĩ do Aɔ̃ Lafɛ̃ɛ nŋu iyi í jɛ Aɔ̃ Lafɛ̃ɛi bala nŋa ŋa awɔi. Í dĩ akabuuu do aŋai si waati iyi í nya ŋa wa hai ilɛi Ezibitiu.

²⁵ Iwɛ̃ ŋai à na à lɔsi ku tɔɔ, à ya maa sɛɛbata nŋa. Iwɛ̃ ŋa iyi à waa tɔɔu, a kù mà ŋa baa hai tako, nɔ Aɔ̃ Lafɛ̃ɛ í ganji ŋa iwɛ̃ ŋa ku tɔɔ.

²⁶ Na ŋɔi í jɔ̀ Aɔ̃ Lafɛ̃ɛ, si idɔɔkɔ̃ nla nlaɛ, í jɔ̀ ikpe ŋa iyi à fɔ ideɛ si tiau ihɛ̃ fei í naa si ŋa.

²⁷ Í jɔ̀ idɔɔkɔ̃ nla nlaɛu í naa si zamaaɛu, nɔ í nyaa hai si ilɛɛ í leleɛ í jɔ̀ í nɛ ilɛ mmu nɔ bɛi í wa baa nnyi.

²⁸ Mii iyi wa singa, Aɔ̃ Lafɛ̃ɛ nŋu akãi í màa. Amma mii iyi í nyisi wa, nŋui awa à ya ka mà hee do ajɔ fei hai awa hee do tɔku nwa ŋa fei ku ba ka ceò idei wooda ŋau fei icɛ.