Wooda ku kɔsi 28 - Bibeli do fee

Kuwã ŋa iyi à jɛ ti ididɔ̃

^1-2 Ŋɔi Moizi í fɔ má í ni, bii ì waa gbɔ idei Aɔ̃ Lafɛ̃ɛ nŋɛ nɔ ì waa jirimaɛ dee dee ŋa, bii ì waa ceò woodaɛ ŋa iyi ǹ wa n sɔ̃ ŋɛ nnyiu ihɛ̃ fei icɛ ŋa, á ce ŋɛ inɛ sinte ŋa si inɛi andunya ŋau ihɛ̃ fei, nɔ á jɔ̀ i ba mii jiida ŋa nkpɔ nkpɔ. Mii jiida ŋau wee.

³ Á weea inɛ nŋɛ ŋa iyi à wa si ilu nla ŋa do inɛ nŋɛ ŋa iyi à wa si ilɛɛko ŋa.

⁴ Á jɔ̀ i ba amu ŋa nɔ i ba amaajɛ nkpɔ nkpɔ i da ŋa. Á jɔ̀ kɛtɛ gaa nŋɛ ŋa do angudã nŋɛ ŋa do iwo nŋɛ ŋa a kpɔ a kɔ̃ɔsi.

⁵ Á jɔ̀ kɔlɔ nŋɛ ŋa a kɔ̃ do isoi jĩi ŋa, nɔ kaale nŋɛ ŋa mɔ a kɔ̃ do iyafũ.

⁶ Á wee nŋɛi si mii baa yooma fei si kuwɛɛ nŋɛ.

⁷ Bii mbɛɛ ŋa à naa si ŋɛ igũ, Aɔ̃ Lafɛ̃ɛ á jɔ̀ i jɛ ŋa igũ ŋai. Bii kpãa akãi à too à naaò wa si ŋɛ, kpãa ikã ikã mɛɛjei aa too a sa a nɛò.

⁸ Aɔ̃ Lafɛ̃ɛi á jɔ̀ suu nŋɛ ŋa a kɔ̃ do amaajɛ ŋa. Mii ŋa iyi ì waa ce ŋa fei, nŋui á ya jɔ̀ ku ce baaka ku maa bɔ do waju. Ntɔ ntɔ á jɔ̀ i ba mii jiida ŋa nkpɔ nkpɔ si ilɛ iyi á muu nŋɛu.

⁹ Bii ì waa ceò woodai Aɔ̃ Lafɛ̃ɛ nŋɛ icɛ, bii ì waa jirimaɛ nɔ ì waa ce idɔɔbiɛ ŋa, á ce ŋɛ inɛ ŋa iyi à jɛ titɛɛ ŋa bɛi nŋu takaɛ í tako í ce nŋɛ kuwãɛ do kugbasiu.

¹⁰ Inɛi ilɛ mmu ŋa fei aa yɔɔ iyi à nya ŋɛ ikãi na icɛi Aɔ̃ Lafɛ̃ɛ, nɔ aa maa ce njo nŋɛ.

¹¹ Aɔ̃ Lafɛ̃ɛ á jɔ̀ i ba amani nkpɔ nkpɔ ŋa si ilɛ iyi í cea bala nŋɛ ŋa kuwãɛ do kugbasi í ni nŋu á muu nŋau. Aa bí amu ŋa nkpɔ nkpɔ. Mɛɛmu nŋɛ ŋa mɔ aa bí nkpɔ nkpɔ, nɔ aa ba amaajɛ nkpɔ nkpɔ i da ŋa.

¹² Aɔ̃ Lafɛ̃ɛ á cĩ nŋɛ lelei Aɔ̃ tengi bii inyi í wa jiida jiida ku ba ku jɔ̀ ijĩ ku wɔ wa si ilɛ nŋɛ ŋa si waati iyi ì nɛ bukaataɛ ŋa, nɔ ku jɔ̀ wũaa nŋɛ ŋa iyi ì waa ce ŋa fei a bɔ do waju jiida jiida. I kaa nɛ bukaatai i koo i maa wɛ̃ fia ŋa, amma iŋɛi aa ya wɛ̃a inɛi ilɛ mmu nkpɔ nkpɔ ŋa fia.

¹³ Aɔ̃ Lafɛ̃ɛ kaa jɔ̀ i jɛ akpaamu ŋa, amma iŋɛi aa ya jɛ iri. Waati kãma fei lelei aa wa ŋa. I kaa wa ilɛ ŋa pai. Amma na nŋu, ì nɛ i ceò woodai Aɔ̃ Lafɛ̃ɛ iyi ǹ wa n na ŋɛ nnyiu ihɛ̃ fei icɛ ŋai mam mam.

¹⁴ I kù nɛ i fa ara nŋɛ i too inya mmu ŋa si gãmɛi ide ŋa iyi ǹ wa n sɔ̃ ŋɛ ŋau ihɛ̃ i koo i maa tɔɔ iwɛ̃ ŋa.

Idei wahala ŋa iyi aa naa

¹⁵ Moizi í sɔ̃ ŋa má í ni, bii i kù na i kù waa jirima Aɔ̃ Lafɛ̃ɛ nŋɛ, bii i kù waa ceò woodaɛ ŋa do ikɔɛ ŋa iyi ǹ wa n sɔ̃ ŋɛ nnyiu ihɛ̃ icɛ ŋa, wahala ŋa iyi á jɔ̀ ku naa si ŋɛ wee.

¹⁶ Á ceekpe inɛ nŋɛ ŋa iyi à wa si ilu nla ŋai do inɛ nŋɛ ŋa mɔ iyi à wa si ilɛɛko ŋa.

¹⁷ Kaa da nŋɛ si isoi jĩi ŋa si kɔlɔ nŋɛ ŋa, nɔ i kaa nɛ iyafũ si kaale nŋɛ ŋa.

¹⁸ Kaa jɔ̀ i ba ama nkpɔ nkpɔ ŋa, nɔ i kaa ba amaajɛ nkpɔ nkpɔ i da ŋa. Kɛtɛ gaa nŋɛ ŋa do angudã nŋɛ ŋa do iwo nŋɛ ŋa a kaa kpɔ a kɔ̃ɔsi.

¹⁹ Á ceekpe ŋɛi si mii baa yooma fei si kuwɛɛ nŋɛ.

²⁰ Si wũaa iyi ì waa ce ŋa fei, Aɔ̃ Lafɛ̃ɛ á jɔ̀ ikpe ku naa sii. Zigiida do wahala ŋa mɔ aa naa si ŋɛ, nɔ i kaa kpɛ ŋa mɔm ku ce nfe nŋɛ mam mam si na iyi í jɔ̀ ì fũsiɛ awɔ ŋa nɔ nŋu bɛi á jɛ taale iyi ì ce ŋa.

²¹ Aɔ̃ Lafɛ̃ɛ á jɔ̀ patapoo ku naa si ŋɛ nɔ ku ce nfe nŋɛ si ilɛ iyi aa koo i buba si ŋau.

²² Aɔ̃ Lafɛ̃ɛ á jɔ̀ bɔ̃ɔ ŋa a naa si ŋɛi nɔ aa wahala ŋai ntɔ ntɔ. Aa gbɛ ŋa, aa ba juju ŋa do amɔɔdĩ ŋa. Á jɔ̀ agbɛ ku mu, nɔ amaajɛ ŋa aa gbɛ si icu nŋa walakɔ mɔ a sãmi. Wahala ŋau bɛ fei aa naa si ŋɛi hee i koo i ceò nfe ŋa.

²³ Lelei Aɔ̃ á lei bɛi isɔ danya do lelei iri nŋɛ ŋa. Nɔ ilɛ mɔ á lei bɛi isɔ si lɛlɛi kutɛ nŋɛ ŋa.

²⁴ Ilùlù do sãai Aɔ̃ Lafɛ̃ɛ á jɔ̀ ku maa wɔ wa, kaa jɛ ijĩ. Bɛɛbɛi á ce hee koo ceò nfe nŋɛ mam mam.

²⁵ Aɔ̃ Lafɛ̃ɛ á jɔ̀ mbɛɛ nŋɛ ŋa à jɛ ŋɛ igũ. Bii kpãa akãi ì too ì bɔò igũ bi tu ŋa ŋa, kpãa ikã ikã mɛɛjei aa too i saò hai si waju nŋa ŋa. Bomma ŋa iyi à wa si andunyau fei aa wɛɛò zigiida waati iyi aa yɛ mii iyi í ba ŋɛ.

²⁶ Iku nŋɛ ŋau, sɔndai yɛi ŋa do ti mɛɛmui sako ŋai aa jɛ, nɔ inɛ kãma kaa bitandi ŋa.

²⁷ Aɔ̃ Lafɛ̃ɛ á jɔ̀ bɔ̃ɔi ngoli ku naa si ŋɛ bɛi í tako í naa si inɛi Ezibiti ŋau. Á jɔ̀ i ce bɔ̃ɔi icu ku yɔ ŋa, do bɔ̃ɔi kuusa do dimii bɔ̃ɔ gɔ iyi í ya jɔ̀ batai ara ku wu. Nɔ i kaa ba iri si kãmaɛ ŋa.

²⁸ Aɔ̃ Lafɛ̃ɛ á jɔ̀ i sũmu ŋai nɔ i fɛɛju ŋa, nɔ i maa fɔ ide hai nɛ yaase ŋa.

²⁹ Aa nɛ ŋai i maa babii inya dasã nkpa bɛi fɛɛju, nɔ wũaa nŋɛ ŋa kãma kaa bɔ do waju. Waati kãma fei inɛ ŋa aa ta nŋɛ gbugbãi a maa gba mii ndu ŋɛ ŋa, nɔ inɛ kãma kaa naa ku sobi ŋɛ.

³⁰ Bii à mua inɛ gɔ nŋɛ mudɛ̃ɛ, inɛ mmu gɔ á sũò ndɛɛi. Bii inɛ gɔ nŋɛ í ma ile, kaa ba ku sũ si. Bii inɛ gɔ nŋɛ í lɔ jĩi ndii rezɛ̃ɛ, kaa ba ku ka iso sinteɛ ŋa.

³¹ Aa mu kɛtɛ kombo nŋɛ a sakaɛ si waju nŋɛ nɔ i kaa ba iŋaɛ i ŋɔ ŋa. Aa mu gbankɛlɛ nŋɛ ŋa si waju nŋɛ a nɛò, nɔ i kaa ba i gbaa má ŋa. Mbɛɛ ŋa aa mu iwo nŋɛ ŋai, nɔ inɛ kãma kaa naa ku sobi ŋɛ.

³² Aa mu ama inɛmɔkɔ nŋɛ ŋa do ama inaabo nŋɛ ŋa iju nŋɛ ku maa yɔɔ a so ŋa a daa inɛ njoo ŋa si awɔ a jɛ aru ŋa. Aa cɔ kpãa i maa degbeò kubaa nŋa hee i gbɛɛji ŋa, i kaa nɔ i yɔkɔ i ce nkãma ŋa.

³³ Zamaa gɔ iyi i kù mà ŋa, aŋai aa na a jɛ amaajɛi iko nŋɛ ŋa. Aranfãanii icɛi iko nŋɛ ŋa fei aŋai aa nɔɔ. Aa ta nŋɛ gbugbã nɔ a wahala ŋɛ.

³⁴ Mii ŋa iyi aa yɛ do iju nŋɛ á jɔ̀ i sũmu ŋa.

³⁵ Aɔ̃ Lafɛ̃ɛ á jɔ̀ ngoli kugaabu gɔ ku naa si ŋɛi si ilugũ nŋɛ ŋa do si tãnga nŋɛ ŋa i kaa nɔ i yɔkɔ i ba iri ŋa. Aɔ̃ Lafɛ̃ɛ á jɔ̀ bɔ̃ɔu ku naa si ŋɛi hai isɛ nŋɛ ŋa hee ku koo si iri nŋɛ ŋa.

³⁶ Aɔ̃ Lafɛ̃ɛ á jɔ̀ a mu ŋɛi iŋɛ do ilaalu iyi aa jilɛa ara nŋɛu a nɛò ŋɛ ilɛ mmu gɔ bii iŋɛ taka nŋɛ do bala nŋɛ ŋa i kù mà ŋa. Nɔ tengi bɛ, iwɛ̃ ŋai aa maa tɔɔ ŋa. Iwɛ̃ ŋau, kuta do jĩi ŋa iyi à gbei.

³⁷ Bi inɛ ŋa iyi Aɔ̃ Lafɛ̃ɛ á jɔ̀ a mu ŋɛ a nɛò ŋau, aa biti do mii iyi í ba ŋɛ. Aa maa nyaanyi ŋɛi nɔ a maa yaako ŋɛ.

³⁸ Dimi nkpɔ nkpɔi aa ya koo i gbɛ̃ si iko nŋɛ ŋa, amma amaajɛ iyi aa ya ba i da i baaò wa ŋa, kaa ya kpɔ, domi kɛtɛngbo ŋa aa ya jɔɔi.

³⁹ Aa ya lɔ jĩi ndii rezɛ̃ɛ ŋa nɔ i logooɛ ŋa, amma i kaa ya ba vɛ̃ɛ i mɔ ŋa, domi i kaa ba iso ŋa iyi aa ka i koo i fɔ̃ inyiɛ. Kokoo ŋa aa ya jɛ iso ŋaui.

⁴⁰ Aa nɛ jĩi ndii olivi ŋa si ilɛ nŋɛ fei ŋa, amma i kaa ba ikpo ku kpɔ iyi aa jɔsi ara nŋɛ ŋa, domi isoi olivi ŋau aa wɔ a cukui hee a maa jĩa.

⁴¹ Aa bí ama inɛmɔkɔ ŋa do ama inaabo ŋa, amma a kaa maa wa bi tu ŋɛ, domi aa mu ŋa aru a nɛò ŋa ilɛ mmui.

⁴² Jĩi ndu ŋɛ ŋa do amaajɛi ilɛ nŋɛ ŋa fei, sɔndai kɛtɛngbo ŋai aa jɛ.

⁴³ Inɛ njoo ŋa iyi aa wa si inɔ nŋɛ, gbugbã nŋa á la ku maa kooi, nɔ ti iŋɛ á kaye ku maa baai kpɛlɛ kpɛlɛ.

⁴⁴ Aŋai aa ya wɛ̃ nŋɛ fia, nɔ iŋɛ i kaa nɛ nkãma iyi aa wɛ̃ nŋa ŋa. Aŋai aa jɛ iri, nɔ iŋɛi aa jɛ akpaamu ŋa.

⁴⁵ Wahala ŋau bɛ fei aa naa si ŋɛi, nɔ aa maa too ŋɛi hee a koo a ceò nfe nŋɛ mam mam si na iyi í jɔ̀ ì kɔ̀ ku gbɔ idei Aɔ̃ Lafɛ̃ɛ nŋɛ nɔ ì kɔ̀ ku ceò woodaɛ ŋa do ikɔɛ ŋau icɛ ŋa bɛi nŋu takaɛ í jilɛ nŋɛu.

⁴⁶ Ide ŋau ihɛ̃ aa maa wɛɛi waati kãma fei nɔ ku jɛ bɛi mii iyi aa maa faò laakai nŋɛ ŋa do ti tɔku nŋɛ ŋa.

⁴⁷ Debɛi bii i kù cea Aɔ̃ Lafɛ̃ɛ nŋɛ icɛ do inɔ didɔ̃ do idɔ nŋɛ fei si waati iyi mii fei wa to ŋɛ,

⁴⁸ aa baa i jɛ arui mbɛɛ nŋɛ ŋa iyi Aɔ̃ Lafɛ̃ɛ á jɔ̀ a naa si ŋɛi. Ari do agbɛ á kpa ŋɛ. Aa baa i gbe basĩ, nɔ i kua mii fei ŋa. Aɔ̃ Lafɛ̃ɛ á le nŋɛ zuugui isɔ si kɔngɔ nŋɛ ŋa hee koo ceò nfe nŋɛ mam mam.

⁴⁹ Aɔ̃ Lafɛ̃ɛ á jɔ̀ dimi gɔ ku naa si ŋɛ wa hai hee jĩijĩ, hai kɔɔi andunya wa. Dimiu á naa si ŋɛ wai bɛi kungbã í ya naa si sɔndaɛ, nɔ dimiu, dimi gɔi iyi i kaa gbɔ feeɛ ŋa.

⁵⁰ Inɛ ŋau aa gaabui ntɔ ntɔ. A kaa mà jirimai mɔkɔ ngbo ŋa, nɔ a kaa nɛ araarei ama keeke ŋa.

⁵¹ Aa gba mɛɛmu nŋɛ ŋai do amaajɛi iko nŋɛ ŋa, nɔ aa ku ŋai do ari. A kaa jɔ̀ nŋɛ bilee nŋɛ ŋa do vɛ̃ɛ nŋɛ ŋa, do ikpo nŋɛ ŋa, nɔ a kaa jɔ̀ nŋɛ ama kɛtɛ gaa nŋɛ ŋa, do angudã nŋɛ ŋa do iwo nŋɛ ŋa fei hee i koo i ceò nfe mam mam ŋa.

⁵² Aa bu ŋɛ koei si ilu ŋa iyi aa wa si ilɛ iyi Aɔ̃ Lafɛ̃ɛ nŋɛ á muu nŋɛu fei. Aa jɛ ŋɛ igũi hee idĩ kugboka iyi í nɛ gbugbã tengi bii ì tamaa aa ba i koo i manji ŋau a cuku.

⁵³ Mbɛɛ nŋɛ ŋau aa jɛ ŋɛ igũi tengi bii ì wa ŋau nɔ aa wa si inɔ kufɔ nla nla hee i na i maa ŋɔ ama nŋɛ ŋa. Aa maa ŋɔ ama inɛmɔkɔ nŋɛ ŋa do ama inaabo nŋɛ ŋa iyi Aɔ̃ Lafɛ̃ɛ í mu ŋɛ ŋau.

⁵⁴ Si inɔ nŋɛ, inɛ iyi kuwɛɛɛ í nya ikã iyi bii ngɔgɔ wa ce í ya tosiɛ gbãa gbãa, á ya maa cɔ nyaanzeɛi do iju laalɔ. Nɔ bɛɛbɛi á ya maa ce má si gãmɛi aboi nŋu takaɛ hee do amaɛ ŋa iyi à gbea fei.

⁵⁵ Kaa ya bi iŋai arai amaɛ ŋa ku kpɛ̃ do inɛ akã nŋa gɔ, si na iyi í jɔ̀ iyi bɛ nŋu akãi í gbea iyi í jɛ sɔndaɛ. Si anyiɛ, nkãma kaa gbea iyi á jɛ sɔndaɛ má si inɔ kufɔ nla nla iyi mbɛɛ ŋa à dasi si iluu fei.

⁵⁶ Inaabo iyi si kuwɛɛɛ wo ci ya bi riisi, iyi bii ngɔgɔ wa ce í ya tosiɛ gbãa gbãa, iyi ci ya bi baa kutɛɛ ku lu ilɛ, bɛɛbɛi nŋu mɔ á ce. Bɛbɛi, á maa cɔ mɔkɔɛi do ama inɛmɔkɔɛ do ama inaaboɛ do iju laalɔ.

⁵⁷ Nɔ baa ama kpɔtɔɔ iyi í bí wa nsɛi, hee do mii iyi í fita wa hai si inɔɛ fei, á bi ku manji ku ŋɔɔi si na iyi í jɔ̀ nkãma kù wɛɛ nɔ inɛ fei í wa si inɔ kufɔ nla nla na mbɛɛ ŋa iyi à wa anu koofai iluu ku ba a ce nfeɛ.

⁵⁸ Na nŋu, i ceò woodai Aɔ̃ Lafɛ̃ɛ iyi à tɔtɔɔ si tiau ihɛ̃ fei icɛ ŋa nɔ i jirima Aɔ̃ Lafɛ̃ɛ nŋu iyi iriɛ í nɛ bɛɛrɛ nɔ í to njou.

⁵⁹ Bii ì nɔ ì kɔ̀ ŋa, Aɔ̃ Lafɛ̃ɛ takaɛ á jɔ̀ wahala nla nla hai nɛ kɔɔ do bɔ̃ɔ kugaabu ŋa a naa si ŋɛ hee ku mu ŋɛ biti iŋɛ do tɔku nŋɛ ŋa.

⁶⁰ Á jɔ̀ wahala ŋa iyi à da zigi nŋɛ ŋa si ilɛi Ezibitiu fei a naa si ŋɛ. Wahala ŋau fei, aa cuku si ŋɛ wai.

⁶¹ Aɔ̃ Lafɛ̃ɛ á jɔ̀ bɔ̃ɔ dimi ikã ikã hee do wahala ŋa iyi a kù fɔ ide nŋa si tiai woodau ihɛ̃ a naa si ŋɛ hee i koo i ceò nfe mam mam ŋa.

⁶² Iŋɛ iyi akpɔ nŋɛ í yɛ bɛi leleaɔ̃ ŋa wo, akpɔ nŋɛu á baa ku gbei keeke si na iyi í jɔ̀ i kù jirima idei Aɔ̃ Lafɛ̃ɛ nŋɛ.

⁶³ Do yaase bɛi Aɔ̃ Lafɛ̃ɛ í nɛ inɔ didɔ̃ í ce nŋɛ jiida nɔ í jɔ̀ akpɔ nŋɛ í la, bɛɛbɛ mɔi á nɛ inɔ didɔ̃ ku ce nfe nŋɛ nɔ ku kpa iri nŋɛ. Á nya ŋɛi hai si ilɛ iyi aa koo i gba i buba si ŋau,

⁶⁴ nɔ á jɔ̀ i fangaa ŋai si ilɛi dimi mmu ŋa hai si kɔɔi andunya tengi bii ì wa ŋa hee ku bɔ si kɔɔ mmu. Nɔ tengi bɛ, iwɛ̃ ŋa iyi bala nŋɛ ŋa do iŋɛ taka nŋɛ i kù mà ŋai aa koo i maa tɔɔ ŋa. Iwɛ̃ ŋau, jĩi ŋa walakɔ kuta ŋa iyi à gbe à jɔ ŋa ŋai.

⁶⁵ I kaa wɛɛ sɛ̃ɛ si inɔi inɛ ŋau ŋa, nɔ i kaa ba i sĩmi si inɔi inɛ ŋau ŋa. Aɔ̃ Lafɛ̃ɛ á jɔ̀ idɔ nŋɛ ku dedei, nɔ iju nŋɛ ŋa aa kua gbugbã. Si inɔ kufɔ nla nlai aa maa wa ŋa.

⁶⁶ Kuwɛɛ nŋɛ kaa nɛ gbugbã kãma, nɔ aa ya maa yaya do njo ŋai dasãò idũ fei. I kaa nɛ naanɛ kãma si mii iyi á na ku ce do waju má ŋa.

⁶⁷ Waati iyi aa na i yɛ mii iyi wa ce ŋa, zigiidai á maa kɔ̃ si idɔ nŋɛ. Bii iju í má daakɔ, aa ya ni ŋai, alɛ ku lɛ wa ńya ńya. Nɔ bii alɛ í lɛ, aa ya ni ŋai, iju ku má wa ńya ńya.

⁶⁸ Aɔ̃ Lafɛ̃ɛ á gbã ŋɛ ku bɔò ŋɛ Ezibitii do akɔi inyi ŋa. Á jɔ̀ i sinda i nyi ilɛ bii ǹ sɔ̃ ŋɛ ǹ ni i kaa yɛ do iju má ŋau. Do ikpa bɛ, inɛmɔkɔ do inaabo ŋa, aa dɛdɛ bɛi aa ce i ta ara nŋɛ bi mbɛɛ nŋɛ ŋa i jɛ aru nŋa ŋa, amma inɛ kãma kaa bi ku ra ŋɛ.

Inyiimu ankãanyii Moizi

⁶⁹ Akabuu iyi Moizi í jɔ̀ inɛi Izirɛli ŋa à dĩ do Aɔ̃ Lafɛ̃ɛ si ilɛi Moabu wee. Akabuu iyi ihɛ̃ kù jɛ akã do iyi í tako í dĩ do aŋa si antaii iri kutai Ɔrɛbu.