Wooda ku kɔsi 27 - Bibeli do fee

Kuta ŋa iyi à gũ si iri kutai Ebali

¹ Ŋɔi Moizi do inɛ ngboi Izirɛli ŋau à sɔ̃ zamaai Izirɛliu à ni, i jirima wooda ŋa iyi ǹ wa n na ŋɛ nnyiu ihɛ̃ fei ŋa.

² Ajɔ iyi aa kua idoi Zuudɛ̃ɛu i lɔ si ilɛ iyi Aɔ̃ Lafɛ̃ɛ nŋɛ á mu nŋɛu, aa gũ kuta nla gɔ ŋa bɛ ŋai, nɔ i jɔsi ila fũfũ ŋa.

³ Nɔ i kɔ idei wooda ŋau fei si kuta ŋau waati iyi aa kua idoi Zuudɛ̃ɛu i lɔ si ilɛ iyi Aɔ̃ Lafɛ̃ɛ á mu nŋɛu, ilɛ bii amɔ do nyikɔ̃ wa kɔ̃, si bɛi Aɔ̃ Lafɛ̃ɛi bala nŋɛ ŋau í sɔ̃ ŋɛ.

⁴ Bii ì na ì kua idoi Zuudɛ̃ɛu ì tã ŋa, aa gũ kuta ŋa iyi ǹ sɔ̃ ŋɛ ideɛ nnyiui si iri kutai Ebali nɔ i jɔsi ila fũfũ ŋa.

⁵ Si anyiɛ nɔ i maa Aɔ̃ Lafɛ̃ɛ bi kuwee tengi bɛ ŋa, nɔ jĩnɛi isɔ kãma ku maà wa si.

⁶ Kuta iyi a kù gbei aa yɔkɔ i ceò icɛ ŋa si bi kuweeu ku ma. Si antaiɛ bɛi aa ya cea Aɔ̃ Lafɛ̃ɛ kuwee iyi à ya jo si ina fei sãa sãau,

⁷ si anyiɛ nɔ i ce kuweei anu akã má ŋa, nɔ i jɔɔ tengi bɛ ŋa nɔ i wɛɛò inɔ didɔ̃ ŋa si wajui Aɔ̃ Lafɛ̃ɛ.

⁸ I kɔ idei wooda ŋau si kuta ŋa iyi ì gũ ŋau dee dee bɛi inɛ á yɔkɔ ku cioɛ ŋa.

⁹ Moizi do inɛi Levii woo wee ŋau à sɔ̃ inɛi Izirɛli ŋau à ni, iŋɛ inɛi Izirɛli ŋa, i sotĩ i gbɔ ŋa, nnyi ì baa ì jɛ inɛi Aɔ̃ Lafɛ̃ɛ nŋɛ mbɛ ŋa.

¹⁰ I ya jirima idei Aɔ̃ Lafɛ̃ɛ nŋɛu ŋa, nɔ i ceò wooda ikã ikãɛ ŋa iyi ǹ wa n sɔ̃ ŋɛ nnyiu ihɛ̃ icɛ ŋa.

¹¹ Ajɔ akãu bɛ, wooda iyi Moizi í nyi í na zamaau má wee.

¹² Í ni, bii ì kua idoi Zuudɛ̃ɛu i tã ŋa, dimii Simeɔ̃ do Levii do Zudaa do Isakaa do Zozɛfu do Bɛnzamɛɛ ŋa aa maa leekĩi si iri kutai Garizimuu a maa fɔ idei kuwee si gãmɛi zamaau,

¹³ nɔ waati bɛɛbɛ, dimii Rubɛ̃ɛ do Gadi do Azɛɛ do Zabulɔ̃ɔ do Dãa do Nɛfitali, aŋai aa wa si antaii iri kutai Ebaliu a maa fɔ idei ikpe.

Ikpe maateeji ŋau

¹⁴ Inɛi Levii ŋau aa so idei a sɔ̃ inɛi Izirɛli ŋau fei hee lele a ni,

¹⁵ ikpei á jɛ ti inɛ iyi í gbe jĩi, walakɔ í gbe kuta, walakɔ í yɔ isɔ gɔ í ceò ngɔgɔ iyi í jɔ iwɛ̃, nɔ í manji wa tɔɔɛ. Aɔ̃ Lafɛ̃ɛ í cé mii dimi bɛɛbɛ iyi amanɛ ŋa à ce do awɔ nŋa. Nɔ zamaau fei á jɛi ku ni, ami.

¹⁶ Ikpei á jɛ ti inɛ iyi í donda iyeò baaɛ. Nɔ zamaau fei á jɛi ku ni, ami.

¹⁷ Ikpei á jɛ ti inɛ iyi í tekĩò nyindai kɔɔi ilɛi inɛ mmu gɔ. Nɔ zamaau fei á jɛi ku ni, ami.

¹⁸ Ikpei á jɛ ti inɛ iyi kù nyisi fɛɛju gɔ kpãa jiida nɔ í jɔ̀ í koo í nyɔ. Nɔ zamaau fei á jɛi ku ni, ami.

¹⁹ Ikpei á jɛ ti inɛ iyi kù cea inɛ njoo kiiti dee dee, walakɔ kɔyɔ walakɔ inaabo jaaɔ̃ gɔ. Nɔ zamaau fei á jɛi ku ni, ami.

²⁰ Ikpei á jɛ ti inɛ iyi í sũò inɛ akãi aboi baaɛ, domi do yaase bɛɛbɛ, í dasi baaɛu anyɔi. Nɔ zamaau fei á jɛi ku ni, ami.

²¹ Ikpei á jɛ ti inɛ iyi í sũò mɛɛmu gɔ. Nɔ zamaau fei á jɛi ku ni, ami.

²² Ikpei á jɛ ti inɛ iyi í sũò wecĩɛ gɔ, ama inaaboi baaɛ walakɔ ama inaaboi iyeɛ. Nɔ zamaau fei á jɛi ku ni, ami.

²³ Ikpei á jɛ ti inɛ iyi í sũò iyei aboɛ. Nɔ zamaau fei á jɛi ku ni, ami.

²⁴ Ikpei á jɛ ti inɛ iyi í kpa inɛ gɔ si asii. Nɔ zamaau fei á jɛi ku ni, ami.

²⁵ Ikpei á jɛ ti inɛ iyi í gba fia si asii nɔ í kpa hai nɛ taale gɔ. Nɔ zamaau fei á jɛi ku ni, ami.

²⁶ Ikpei á jɛ ti inɛ iyi kù jirima idei woodai Aɔ̃ Lafɛ̃ɛ ŋau ihɛ̃ nɔ kù ceò ŋa icɛ. Nɔ zamaau fei á jɛi ku ni, ami.