Wooda ku kɔsi 26 - Bibeli do fee

Amaajɛ sintei ilɛ ŋa do idɔ ku kpaasi

¹ Aa lɔ si ilɛ iyi Aɔ̃ Lafɛ̃ɛ á mu nŋɛ ku jɛ tubu nŋɛu ŋa. Waati iyi ì na ì buba si ŋa,

² inɛ baa yooma iyi í da amaajɛ sinte si ikoɛ si ilɛ iyi Aɔ̃ Lafɛ̃ɛ í mu nŋɛu fei á ya nya ku dasi kɔlɔi ku kooò tengi bii Aɔ̃ Lafɛ̃ɛ á cica ku jɛ bi kuwaɛu.

³ Á koo ba woo wee iyi í nɛ icɛ ku ce si waati nŋu bɛi, nɔ ku sɔ̃ɔ ku ni, nnyi ǹ wa n sɔ̃ Aɔ̃ Lafɛ̃ɛɛi iyi ǹ lɔ wa si ilɛ iyi í wãò bala nwa ŋa nŋu ku mu nwau.

⁴ Woo weeu á gba kɔlɔui hai si awɔɛ nɔ ku jilɔɔ wajui bi kuweei Aɔ̃ Lafɛ̃ɛu.

⁵ Lafɛ̃ɛ á nyi ku fɔi má si wajui Aɔ̃ Lafɛ̃ɛ ku ni, balam inɛi Aramu woo dabii. Í dede í bɔ ilɛi Ezibitii do zamaa keeke gɔ, nɔ í buba bɛ. Hai bɛ nɔ í na í baa í ce zamaa nla nla. Akpɔ nŋau í kɔ̃ɔsi nɔ à jɛ ilu gbugbã ŋa.

⁶ Amma inɛi Ezibiti ŋau à kpã wa iju, à ta nwa gbugbã nɔ à ce wa aru à dasi wa icɛ kugaabu ŋa.

⁷ Ŋɔi à dɔ̃ anu à tɔɔ Aɔ̃ Lafɛ̃ɛi bala nwa ŋau ku faaba wa, ŋɔi í gbɔ kutɔɔ nwa nɔ í yɛ zaka bɛi à waa kpã wa iju à waa wahala wa nɔ à waa ta nwa gbugbã.

⁸ Aɔ̃ Lafɛ̃ɛ í nya wa hai ilɛi Ezibiti do awɔ gbugbãɛ iyi í yɔ wa do maamaake nla nla ŋa iyi à nɛ zigiida do nyinda ŋa.

⁹ Nŋui í gbã wa wa hee ihɛ̃, nɔ í mu nwa ilɛu ihɛ̃ bii amɔ do nyikɔ̃ wa kɔ̃.

¹⁰ Na ŋɔi í jɔ̀ nsɛi ǹ naa Aɔ̃ Lafɛ̃ɛ amaajɛ sintei ikom ŋa iyi í muum nɔu wa. Inɛɛu á jilɛ mii ŋa iyi í naaò waui si wajui Aɔ̃ Lafɛ̃ɛ bɛ, nɔ ku gulɛ hee ilɛ ku tɔɔɛ.

¹¹ Si anyiɛ nɔ iŋɛ do inɛi Levii ŋa do inɛ njoo ŋa iyi à wa si ilɛ nŋɛu i tɔtɔɔ i kpɛ̃ inɔ didɔ̃ ŋa na saabui mii jiida ŋa iyi Aɔ̃ Lafɛ̃ɛ í cea iŋɛ do nyaanze nŋɛ ŋau.

Si mɛɛwa fei akã iyi aa nya si adɔ̃ mɛɛtasia

¹² Adɔ̃ mɛɛta do adɔ̃ mɛɛta fei, adɔ̃i akã ku nya si mɛɛwa feii á jɛ. Bii ì nya akã si mɛɛwa fei si amaajɛi iko nŋɛ ŋa iyi ì da ŋa, inɛi Levii ŋai aa na ŋa do inɛ njoo ŋa do kɔyɔ ŋa do inaabo jaaɔ̃ ŋa. Aŋa mɔ aa ya ba mii iyi aa jɛ hee ku to ŋa si ilu nŋɛ ŋau.

¹³ Nɔ aa fɔ ŋai si wajui Aɔ̃ Lafɛ̃ɛ i ni, Aɔ̃ Lafɛ̃ɛ, iyi í jɛ titɛɛ kãma n kù jɔ̀ kù gbe ihɛ̃. Si bɛi ì fɔ, ǹ so fei ndɛɛ ǹ daa inɛi Levii ŋau si awɔ do inɛ njoo ŋau do kɔyɔ ŋau do inaabo jaaɔ̃ ŋau. N kù ce atafii si nkãma. N kù gbɛjɛ nkãma si ide iyi ì fɔ.

¹⁴ N kù jɛ mii ŋau bɛ kãma baa si waati iyi ǹ wɛɛò inɔ kufɔi iku, nɔ n kù na mii ŋau kãmaɛ si waati iyi ǹ wɛɛò riisi, nɔ n kù cea iku kãma amuaɛ. Ǹ jirima ideɛ ŋaui fei, nɔ ǹ ceò wooda ŋa iyi ì nam ŋau fei icɛ.

¹⁵ Hai lelei Aɔ̃ bi kuwa kumáɛu, cɔ inɛi Izirɛli inɛɛ ŋau nɔ i wee nŋa. Weea ilɛ iyi ì mu nwau si bɛi ì tako ì cea bala nwa ŋa kuwãɛ do kugbasiu, ilɛ bii amɔ do nyikɔ̃ wa kɔ̃.

Inɛi Izirɛli ŋa inɛi Aɔ̃ Lafɛ̃ɛ ŋai

¹⁶ Nnyi, Aɔ̃ Lafɛ̃ɛ wa tɔɔ ŋɛ i ceò wooda ikã ikãi nŋu ŋau icɛ ŋai. Na nŋu, aa jirima woodau ŋai nɔ i ceò icɛ do idɔ nŋɛ fei do lasabu nŋɛ fei.

¹⁷ Nnyi, ì jɔ̀ Aɔ̃ Lafɛ̃ɛ í ce nŋɛ kuwã í ni nŋu á jɛ Aɔ̃ Lafɛ̃ɛ nŋɛ bii ì waa jirima woodai nŋu ŋa do idei nŋu ŋa do asaiyai nŋu ŋa.

¹⁸ Nɔ iŋɛ mɔ ì ceaa kuwã ì ni iŋɛ inɛi Izirɛli ŋau aa jɛ inɛɛ ŋa nɔ i jirima woodaɛ ŋau fei ŋa,

¹⁹ ku ba ku jɔ̀ i wa antaii dimi ŋa iyi í taka ŋau fei nɔ i nɛ bɛɛrɛ ŋa do yiiko nɔ iri nŋɛ ku fangaa bii fei, nɔ i jɛ inɛ ŋa iyi à nya ikã na iriɛ ŋa si bɛi í sɔ̃ ŋɛu.