Wooda ku kɔsi 25 - Bibeli do fee

Yaasei kiiti ku ce

¹ Bii í jɛ inɛ ŋa à waa ja aŋa duusɔ̃ɔ nɔ à bɔ bi ku ce kiiti ku ba a kiiti nŋa, aa na inɛ iyi kù nɛ taaleu ntɔi nɔ à yɛ taalei inɛ iyi í nɛ taaleu.

² Ilu taaleu, bii í jɛ í jɔ a cãai, woo kiitiu á jɔ̀ ku sũ ilɛi nɔ a cãa ijui nŋu takaɛ bɛ zaka bɛi kuraraɛu í to.

³ Amma kaa jɔ̀ a cãa ku re anu ciiji, domi bii kucãu í kpɔ í caa, inɛ nŋɛu kaa na ku nɛ bɛɛrɛ si waju nŋɛ.

Kɛtɛ

⁴ I maà ya dĩ gɛlɛi kɛtɛ iyi wa jojo si bilee wa nya yɔyɔɛ.

Abo jaaɔ̃ gɔ iyi kù nɛ ama

⁵ Bii igbã do ifɔ ŋa à wa inya akã nɔ inɛ akã nŋa í na í ku, nɔ kù ba kù jɔ̀ ama inɛmɔkɔ, aboi inɛ iyi í kuu kaa koo so mɔkɔ inya mmu kãma, ifɔi mɔkɔu walakɔ igbãui á soo ku jɛ aboɛ.

⁶ Nɔ ama inɛmɔkɔ sinte iyi abou á bí, amai mɔkɔ iyi kù wɛɛui á jɛ, nɔ iriɛi aa kpoo do ku ba iriu ku maà ku si ilɛi Izirɛli.

⁷ Bii í jɛ inɛ iyi í nɛ ku so abou kù waa bi ku sooi, abou á bɔ bi inɛ ngboi ilu ŋaui nɔ ku ni, inɛ iyi í nɛ ku som ku ba irii inɛ nŋa ku maà ku si ilɛi Izirɛliu í kɔ̀, kù bi ku som do yaase bɛi à fɔu.

⁸ Waati nŋu bɛ, inɛ ngboi ilu ŋau aa kpooi nɔ a baa ide ku fɔ. Bii í kɔ̀ wa leekĩ si ideu wa ni, n kaa n soo,

⁹ abou á naa bi tɛɛi si wajui inɛ ngboi ilu ŋau nɔ ku bɔ baataɛ nɔ ku tuaa antɔ si waju. Si anyii nŋu nɔ abou ku sɔ̃ɔ má ku ni, bɛi à ya cea inɛ iyi í kɔ̀ ku bíaa igbãɛ walakɔ ifɔɛ ama mbɛ.

¹⁰ Nɔ hai ajɔ nŋu bɛ, si ilɛi Izirɛliu fei aa sɔ kpasɛ̃i lafɛ̃ɛui, kpasɛ̃i inɛ iyi à bɔ baataɛ.

Tengi bii i kù nɛ i cã inɛ si ija

¹¹ Bii í jɛ inɛmɔkɔ ŋa à waa ja aŋa duusɔ̃ɔ, bii aboi gɔgɔ nŋa gɔ í naa mɔkɔɛ ku gba hai si awɔi inɛ iyi wa cã mɔkɔu, bii abou í yɔ awɔ í mu inɛmɔkɔi mbɛɛi mɔkɔɛu,

¹² i maà ce araarei abou ŋa, aa bu awɔu ŋai.

I ya jɛ dee dee si sĩa ku ce nŋɛ ŋa

¹³ I kù nɛ i nɛ mii ku wã ikã ikã minji si bɔgɔ nŋɛ iyi kuwoɛ kù waa munga ŋa.

¹⁴ Nɔ i kù nɛ i nyi i nɛ gũa iyi kù jɛ ntɔ má ŋa, gɔgɔ ŋa a la a re njɛ, gɔgɔ ŋa mɔ a kere a re njɛ.

¹⁵ Gũa nŋɛ ŋa à nɛ a jɛ ntɔ nɔ a jɛ dee deei, ku ba hunde nŋɛ ku sɔ si ilɛ iyi Aɔ̃ Lafɛ̃ɛ nŋɛ í mu nŋɛu.

¹⁶ Ntɔ ntɔ, inɛ baa yooma iyi wa ce mii iyi kù jɛ dee dee bɛɛbɛ fei, mii laalɔi wa ce si wajui Aɔ̃ Lafɛ̃ɛ nŋɛ.

Inɛi Amalɛki ŋau mbɛɛ ŋai hai ku kpɛ

¹⁷ I ye gigii mii iyi inɛi Amalɛki ŋau à ce nŋɛ si kpãa waati iyi ì fita wa hai ilɛi Ezibitiu ŋa.

¹⁸ Inɛ ŋau a kù mà bɛɛrɛi Aɔ̃ Lafɛ̃ɛ baa keeke, ŋɔi í jɔ̀ à ba ŋɛ do ija wa hai si kpãa, wee í bɛi í ko ì gbɛɛji tã ŋa, nɔ à baò zamaa iyi í gbe do anyi wau ija.

¹⁹ Bɛbɛi Aɔ̃ Lafɛ̃ɛ nŋɛ á nya ŋɛ hai si awɔi mbɛɛ ŋa iyi à kaako ŋɛ ŋau si ilɛ iyi á mu nŋɛ i buba si ŋa ku jɛ tu ŋɛu. Nɔ aa kpa inɛi Amalɛki ŋau ŋai do yaase bɛi inɛ kãma kaa yeò gigi nŋa má si ilɛ ihɛ̃. I maà gbɛjɛ ide iyi bɛ ŋa.