Wooda ku kɔsi 24 - Bibeli do fee

Abo iyi à kɔ̀si

¹ Bii inɛ gɔ í gba abo gɔ abɔdɔ̃ nɔ í na í to bii kù na kù waa buu má, si na iyi í jɔ̀ wa yɛ taaleɛ si ide gɔ, á kɔa tiai njɛ ku kɔ̀i ku bɛi ku loo hai bi tɛɛ.

² Abou á fitai hai kpasɛ̃ bɛ ku nɛ, nɔ á yɔkɔ koo jɛ aboi inɛ mmu gɔ má.

³ Bii í jɛ mɔkɔ iyi í nyi í koo í sou mɔ kù na kù buu má, nɔ í kɔ tiai njɛ ku kɔ̀ í naa í bɛi í loo hai bi tɛɛ, walakɔ bii í jɛ mɔkɔ iyi í koo í sou mɔkɔu í kui,

⁴ mɔkɔ iyi í tako í leleɛ hai sinteu kù nɛ ku soo ku jɛ aboɛ má, domi abou í baa í jɛ ilu riisi mbɛ bi tɛɛ, nɔ bi Aɔ̃ Lafɛ̃ɛ mii laalɔi. Nɔ ilɛ iyi Aɔ̃ Lafɛ̃ɛ á mu nŋɛu i maà jɔ̀ ku so dulum ŋa.

Awaasũ iyi í gba abɔdɔ̃

⁵ Awaasũ iyi í gba abɔdɔ̃ titɔ̃ titɔ̃ kù nɛ kpãai ku bɔ igũ hee má jɛ a kãa inɛ ngbo ku jɛ gɔ. Á nɛ araɛi zakai adɔ̃ akã ku ba ku yɔkɔ ku gbɔa kpasɛ̃ɛ nɔ ku jɔ̀ inɔi abo iyi í gba abɔdɔ̃u ku maa dɔ̃.

Tɔɔma ŋa

⁶ A kù nɛ a tilasi inɛ gɔ ku na tɔɔmai alɔɛ walakɔ amaalɔɛ ku nyisiò iyi á sã gbeseɛ, domi bii ì ce bɛɛbɛ ŋa, í yɛ bɛi ì gba mii iyi á jɔ̀ lafɛ̃ɛ ku maa wɛɛ mbɛ ŋa.

Inɛ iyi í ce ilei amanɛ

⁷ Bii inɛi Izirɛli gɔ í ce ilei inɛ gɔ si inɔi iŋɛ inɛi Izirɛli ŋau í koo wa jɛ aruɛ, walakɔ bii í jɛ í koo í taai, aa kpa lafɛ̃ɛi. Do yaase bɛɛbɛi aa nyaò laalɔu bɛ hai si anini nŋɛ.

Bɔ̃ɔi batai ara

⁸ I ce laakai ŋa do iyi í jɛ idei bɔ̃ɔi batai ara. I ceò ikɔ ŋa iyi ǹ na inɛi Levii woo wee ŋa iyi aŋa mɔ aa na ŋɛu fei sãa sãa icɛ ŋa.

⁹ I ye gigii mii iyi Aɔ̃ Lafɛ̃ɛ í cea Mariama ŋa waati iyi ì fita ì dasi kpãa ì waa baa hai ilɛi Ezibitiu ŋa.

Tɔɔma ŋa má

¹⁰ Bii ì wɛ̃a inɛi ilɛ nŋɛ mii gɔ, i maà ti i bɔ ideɛ i koo i so siɛ mii gɔ ku nyisiò iyi á na ku sã nŋɛ.

¹¹ I leekĩ waduude ŋa, nɔ inɛ iyi ì wɛ̃a ngɔgɔu ŋa, nŋui á koo so mii iyi á na ŋɛ si tɔɔmau wa ku na ku ba ŋɛò bɛ.

¹² Bii í jɛ ilu are gɔi í so ibɔ nlaɛ í na inɛ gɔ bɛɛbɛ, lafɛ̃ɛ kù nɛ ku mu ibɔu hee iju koo máò.

¹³ Bii inunu í lɔ, í nɛ ku sindoa lafɛ̃ɛ ndɛɛi ku ba ku bii nɔ ku weea, nɔ Aɔ̃ Lafɛ̃ɛ á yɔɔ iyi mii jiidai í ce.

Woo ce icɛ ilu are ŋa ku jirima

¹⁴ I maà ya bɛɛgɛ si are ku jɛi inɛ gɔ iyi ìsãɛ kù re ngɔgɔ i taaò gbugbã ŋa, baa bii í jɛ ilu idei walakɔ baa bii inɛ njoo gɔ iyi í wa ilɛ nŋɛi.

¹⁵ I ya sãa fiai icɛɛ ŋa hee inunu ku maa lɔ, domi ilu arei nɔ í nɛ bukaatai i sãa gbãa gbãa. Bii kù jɛ bɛɛbɛ á yɔkɔ ku kpataò iriɛ bi Aɔ̃ Lafɛ̃ɛ, nɔ i baa i jɛ ilu dulum.

Inɛ fei do idei iriɛi

¹⁶ A kaa kpa iyeò baa ŋa na dulum iyi ama nŋa ŋa à ce. Bɛɛbɛ mɔi a kaa kpa amu ŋa na dulum dii iyeò baa ŋa. Inɛ iyi aa kpa fei, lafɛ̃ɛ á kui na irii dulum dii nŋu takaɛ ŋa.

Gũa ŋa iyi à jɛ aranfãanii ilu are ŋa

¹⁷ I maà ti i cea inɛ njoo walakɔ kɔyɔ gɔ kiiti ibo. Nɔ i maà gba acɔi abo jaaɔ̃ gɔ ku jɛ bɛi tɔɔma.

¹⁸ I ye gigi iyi iŋɛ mɔ ì tako ì jɛ aru ŋa wo si ilɛi Ezibiti, nɔ Aɔ̃ Lafɛ̃ɛ nŋɛ í jɔ̀ ì nɛ ara nŋɛ. Na ŋɔi í jɔ̀ ǹ wa n sɔ̃ ŋɛ i ceò wooda ŋau ihɛ̃ icɛ ŋa.

¹⁹ Bii ì waa da amaajɛi iko nŋɛ ŋa nɔ ì gbɛjɛ kambo gɔ inɔ ilɛ bɛ ŋa, i maà nyi do anyi i koo i soo má ŋa. Aa jɔ̀a inɛ njoo ŋai do kɔyɔ ŋa do jaaɔ̃ ŋa, nɔ si bɛɛbɛ Aɔ̃ Lafɛ̃ɛ á wee nŋɛ si mii iyi ì waa ce fei ŋa.

²⁰ Bɛɛbɛ mɔi bii ì waa ka isoi olivi nŋɛ ŋa, i kù nɛ i nyi wa isɛ gbeejisia i na i ka iso ŋa iyi ì gbɛjɛ ŋau má ŋa. Aa jɔ̀a inɛ njoo ŋai do kɔyɔ ŋa do jaaɔ̃ ŋa.

²¹ Si anyiɛ bii ì na ì waa ka isoi rezɛ̃ɛ nŋɛ ŋa, i maà too ilɛu i sisi i ka saa gɔ ŋa iyi ì gbɛjɛ ŋau. Inɛ nŋu ŋau bɛ, inɛ njoo ŋai aa jɔ̀a ŋa do kɔyɔ ŋa do jaaɔ̃ ŋa.

²² I ye gigi ŋa iyi iŋɛ mɔ ì tako ì jɛ aru ŋa wo si ilɛi Ezibiti. Na ŋɔi í jɔ̀ ǹ wa n sɔ̃ ŋɛ i ceò wooda ŋau ihɛ̃ icɛ ŋa.