Wooda ku kɔsi 23 - Bibeli do fee

¹ Inɛ kãma kù nɛ kpãa ku tɔtɔɔ sɛ̃ɛ do inɛ akãi aboi baaɛ ŋa. Inɛ iyi í ce mii dimi bɛɛbɛ, í kua asaiya ŋa iyi à jɛ ti baaɛi.

Inɛ ŋa iyi a kù nɛ a lɔ si igbɛi inɛi Aɔ̃ Lafɛ̃ɛ ŋa

² Inɛ iyi à lɛgɛ njɛi kpangoɛ ŋa, walakɔ à bù afaɛ í gbe kusii, lafɛ̃ɛ kù nɛ kpãa ku lɔ si igbɛi inɛi Aɔ̃ Lafɛ̃ɛ ŋa.

³ Inɛ iyi iyeò baaɛ ŋa à ce sɛ̃ɛ ku tɔtɔɔ hai ce abɔdɔ̃ à bɛi à búu, lafɛ̃ɛ kù nɛ kpãa ku lɔ si kutɔtɔɔi igbɛi inɛi Aɔ̃ Lafɛ̃ɛ ŋa. Baa tɔku mɛɛwasiaɛ ŋa a kù nɛ a lɔ bɛ ajɔ kãma.

⁴ Inɛi Amɔre ŋa do inɛi Moabu ŋau a kaa lɔ bi kutɔtɔɔi inɛi Aɔ̃ Lafɛ̃ɛ ŋau baa ajɔ gɔ. Baa tɔku mɛɛwasia nŋa ŋa a kaa lɔ si ajɔ kãma. Bɛɛbɛi á jɛ hee do ajɔ fei

⁵ si na iyi í jɔ̀ a kù na a kù ko ŋɛ do sɔnda hee má jɛ do inyi si kpãa waati iyi ì fita wa hai ilɛi Ezibitiu ŋa, do si na iyi í jɔ̀ à koo à sãa Balamu amai Beɔɔ fia hai Petɔɔ si ilɛi Mezopotami à ni ku naa ku ceekpe ŋɛ.

⁶ Amma Aɔ̃ Lafɛ̃ɛ nŋɛ í kɔ̀ ku gbɔ idei Balamu, nɔ í kpaasi ikpeu do kuwee si na iyi í jɔ̀ í bi ŋɛ.

⁷ Na nŋu, si kuwɛɛ nŋɛ, i maà ti i maa dɛdɛ laakai ku sũ walakɔ jiida ku jɛ si gãmɛi inɛ ŋau bɛ ŋa ajɔ kãma.

⁸ I maà jilɛ inɛi Edɔmu ŋa si inɛ laalɔ ŋa, domi nyaanze nŋɛ ŋai. I maà jilɛ inɛi Ezibiti ŋa mɔ si inɛ laalɔ ŋa domi ì tako ì jɛ inɛ njoo ŋa si ilɛ nŋa ŋa.

⁹ Inɛ nŋu ŋau bɛ, tɔku gbɛɛtasia nŋa ŋa, aa yɔkɔ a lɔ si inɔi igbɛi inɛi Aɔ̃ Lafɛ̃ɛ ŋau.

Kumái asɔ nŋɛ ŋau

¹⁰ Bii ì bɔ igũ bi mbɛɛ nŋɛ ŋau nɔ ì koo ì ce asɔ ŋa, i ya ce laakai i maà na i ce mii gɔ iyi á yɔkɔ ku dasi ŋɛ riisi.

¹¹ Bii í jɛ inɛ gɔ í wa inɔ nŋɛ nɔ kù maaju si na iyi í jɔ̀ inyii inɛmɔkɔɛ í nikã siɛ waati iyi wa sũ idũ, lafɛ̃ɛ á fita hai si asɔui titã nɔ kaa lɔ bɛ má.

¹² Si kusindai inunui á wɛ, nɔ waati iyi inunu á lɔ, waati bɛɛbɛi á yɔkɔ ku nyi wa si inɔ asɔu má.

¹³ Aa jɔ̀ inya bii gɔ ŋai do angulei asɔ nŋɛu tengi bii aa ya koo i ce angule nŋɛ ŋa.

¹⁴ Si jĩnɛ nŋɛ ŋa, aa nɛ mii ku tu isa ŋai. Waati iyi inɛ í koo í ce angule fei, bii í tã, á ya biiɛi.

¹⁵ Asɔ nŋɛu í nɛ ku jɛ inya gɔ iyi à nyaa ikãi, domi Aɔ̃ Lafɛ̃ɛ á ya nɛ ku kaako asɔ nŋɛui ku maa degbe ŋɛ nɔ ku jɔ̀ i jɛ mbɛɛ nŋɛ ŋau igũ. Si isɛɛnɛu, bii í koo í yɛ mii sãmi gɔ, kaa leekĩ kɔkɔ nŋɛ má.

Aru iyi í sa

¹⁶ Maà ti i so aru gɔ iyi í sa í jɔ̀ lafɛ̃ɛɛ í naa í manji bi tɛɛ i daa lafɛ̃ɛɛu si awɔ.

¹⁷ I jɔ̀ ku buba si inɔ nŋɛ tengi bii í bi fei si ilu iyi í sĩaa si. I maà jɔɔ takii ŋa.

Sakara ku cei inɛmɔkɔ do inaabo ŋa si inɔ kpasɛ̃i Ilaaɔ̃

¹⁸ Inɛi Izirɛli kãma hai inɛmɔkɔ walakɔ inaabo gɔ ku maà na araɛ si sakara ku ce si waatii kutɔɔ si inɔ kpasɛ̃i Ilaaɔ̃.

¹⁹ Bii inɛ wa bi ku cea Aɔ̃ Lafɛ̃ɛ kuwã, bii í jɛ amua iyi wa naaò wa si kpasɛ̃i Aɔ̃ Lafɛ̃ɛ na kuwãu, mii iyi à sãa si sakara iyi í cei, i maà gba ŋa. Ntɔ ntɔ, woo ce mii dimi bɛɛbɛ ŋa, Aɔ̃ Lafɛ̃ɛ á kiiti kuce laalɔ nŋa ŋau bɛ.

Gbese ku dasi inɛ do inyi

²⁰ Bii í jɛ ì wɛ̃a inɛi ilɛ nŋɛ gɔ ngɔgɔ ŋa, bii fiai, walakɔ bii mii ku jɛi, walakɔ bii í nɔ í jɛ mii mmu gɔi, i maà tilasiɛ i daa si inyi ŋa.

²¹ Aa yɔkɔ i tilasi inɛ njoo gɔ iyi í wa bi tu ŋɛ i daa si inyi. Amma inɛ iyi iŋɛò fei ì jɛ inɛi ilɛ akã, i kù nɛ i daa si inyi. I jirima woodau bɛ ŋa ku ba Aɔ̃ Lafɛ̃ɛ ku wee nŋɛ si mii iyi aa koo i maa ce ŋa fei si ilɛ bii aa koo i buba ŋau.

Kuwã ŋa

²² Bii ì cea Aɔ̃ Lafɛ̃ɛ kuwãi ngɔgɔ ŋa, i maà ya jɔ̀ ku kpɛ iyi i kù coo ŋa, domi Aɔ̃ Lafɛ̃ɛ á na ku bee ŋɛi nɔ i baa i jɛ ilu dulum ŋa.

²³ Bii ì mu ara nŋɛ mɔm i kù ce kuwã kãma ŋa, dulum dii inɛ bɛ kaa ba ŋɛ.

²⁴ Amma bii ì ce kuwã, i jɔ̀ i kɔ̃ɔ dee dee ŋa. Kuwã iyi ì cea Aɔ̃ Lafɛ̃ɛ do idɔɔbi nŋɛ fei, aa jɔ̀ ku kɔ̃ ŋai dee dee.

Asaiyai isoi jĩi gɔ ŋa ku ka

²⁵ Bii ì lɔ si ikoi jĩi ndii rezɛ̃ɛi inɛ gɔ, aa yɔkɔ i ka zaka bɛi ì bi fei i jɛ hee i yo ŋa, amma i kù nɛ kpãai i ka i dasi kɔlɔ nŋɛ i nɛò ŋa.

²⁶ Bɛɛbɛ mɔi bii ì lɔ si ilɛi bileei kpaasi nŋɛ gɔ, aa yɔkɔ i ga bileeu do awɔ i maa ŋɔ ŋa. Amma i kù nɛ kpãai i dasi kɔɔma si bileei kpaasi nŋɛu i kpa ndu ŋɛ i nɛò ŋa.